នគរបាលចរាចរណ៍រាជធានីភ្នំពេញ ចុះត្រួតពិនិត្យ និងរឹតបន្តឹងអនុវត្តច្បាប់ចរាចរណ៍លើយានយន្ត នៅតាមបណ្តោយផ្លូវ៦០ម៉ែត្រនៅពេលយប់។ រូបថត ស្នងការដ្ឋានគរបាលរាជធានីភ្នំពេញ
ភ្នំពេញៈ ផ្លូវ៦០ម៉ែត្រនឹងត្រូវរៀបចំដាក់រនាំងដែកពុះចែកទ្រូងផ្លូវ បន្ទាប់ពីមានគ្រោះថ្នាក់ចរាចរណ៍បានកើតឡើង ដែលបណ្តាលមនុស្សស្លាប់ជាច្រើននាក់ ដោយសារតែការបើកបរលើសល្បឿន និងក្រោមឥទ្ទិពលនៃគ្រឿងស្រវឹង នាពេលថ្មីៗនេះ។
ក្នុងពិធីបិទសន្និបាត ក្រសួងសាធារណការ និងដឹកជញ្ជូន នាថ្ងៃទី ២៣ ខែមករានេះ លោកនាយករដ្ឋមន្រ្តី ហ៊ុន ម៉ាណែតបានមានប្រសាសន៍ថា ក្រោយពីមានការចុះពិនិត្យ ជាមួយនឹងក្រសួងសាធារណការរួចមក សាលារាជធានីភ្នំពេញបានឯកភាព រៀបចំរនាំងដែក ដើម្បីដាក់លើផ្លូវ៦០ម៉ែត្រ ដើម្បីកាត់បន្ថយគ្រោះថ្នាក់ចរាចរណ៍។
លោកនាយករដ្ឋមន្រ្តីបញ្ជាក់ថា៖«ថ្ងៃមិញឯកឧត្តមឃួង ស្រេងក៏បានបញ្ជាក់ឯកភាពថា ឱ្យរៀបចំដាក់ដែក នៅកណ្តាលផ្លូវហ្នឹងទៅ ដើម្បីពុះ។ ប៉ុន្តែទោះបីជាដែកក៏ដោយ បើមនុស្សបើកបរ មិនប្រយ័ត្នហើយ គឺ បុកទាំងដែកហ្នឹងបាក់ទៀត។ អញ្ជឹងទាល់តែប្រយ័ត្ន ហើយអនុវត្តច្បាប់»។
ប្រមុខរដ្ឋាភិបាលបានធ្វើការកត់សម្គាល់ថា ក្រោយពីមានការរឹតបន្តឹងការត្រួតពិនិត្យលើ ការបើកបរក្រោមឥទ្ធិពលនៃគ្រឿងស្រវឹងមក គ្រោះថ្នាក់ចរាចរណ៍ ដែលបង្កឡើងដោយកត្តាគ្រឿងស្រវឹងនេះបានថយចុះមួយរយៈពេល។ ប៉ុន្តែវាបានកើតឡើងវិញ ក្នុងរយៈពេលប៉ុន្មានសប្តាហ៍មកនេះ។
លោកបានណែនាំឱ្យមានការបន្ត ពង្រឹងលើការត្រួតនិត្យការបើកបរក្រោមឥទ្ធិពលនៃគ្រឿងស្រវឹងនេះ ជាពិសេស នៅពេលយប់ និងពេលបុណ្យចូលឆ្នាំចិន វៀតណាមខាងមុខនេះ។
លោកមានប្រសាសន៍ថា៖«រាជធានីខេត្តបានខិតខំត្រួតពិនិត្យលើការបើកបរស្រវឹង បានក្រាបបន្តិច [តែ]ប៉ុន្មានថ្ងៃនេះ ប៉ុន្មានអាទិត្យនេះចាប់ផ្តើមឃើញឡើងវិញ។ សូមពិនិត្យមើល ជាតិស្រវឹងឡើងវិញ។ ជាពិសេសក្នុងពេលប៉ុន្មានថ្ងៃនេះ ចូលឆ្នាំ គេថាចូលឆ្នាំចិន ស្រវឹងខ្មែរ ជាពិសេសនៅក្នុងការប្រើប្រាស់ពេលយប់។ ឥលូវនៅផ្លូវ៦០ម៉ែត្រនេះ សាលារាជធានី ត្រូវរៀបចំ»។
លោកនាយករដ្ឋមន្រ្តីក៏បានណែនាំឱ្យក្រសួងសាធារណការ បន្តកិច្ចសហការជាមួយក្រសួងមហាផ្ទៃ ជាពិសេសជាមួយអគ្គស្នងការដ្ឋាននគរបាលជាតិ នៅក្នុងការលើកកម្ពស់សុវត្ថិភាពចរាចរណ៍ផ្លូវគោក និងពង្រឹងការអនុវត្តច្បាប់ស្តីពីចរាចរណ៍ផ្លូវគោក ឱ្យបានម៉ឺងម៉ាត់។
លើសពីនោះ ជំរុញបន្តប្រើប្រាស់កម្មវិធីដកពិន្ទុបណ្ណបើកបរ ឬផាកពិន័យបទល្មើសចរាចរណ៍ផ្លូវគោក ដើម្បីបង្កើនការចូលរួមគោរពច្បាប់ចរាចរណ៍ផ្លូវគោក និងឈានទៅដល់ការ បន្ថយអត្រាគ្រោះថ្នាក់ចរាចរណ៍ ឱ្យនៅកម្រិតទាប។
លោកមានប្រសាសន៍ដូច្នេះថា៖«ការគ្រោះថ្នាក់ដោយភាពស្រវឹងក៏មានការថយចុះ ប៉ុន្តែអត្រានៃការគ្រោះថ្នាក់ចរាចរណ៍នៅច្រើននៅឡើយ ហើយនៅកម្ពុជាយើង ក្រោយពីចប់សង្រ្គាម គឺមូលហេតុ ដែលសម្លាប់មនុស្ស ធ្វើឱ្យបាត់បង់ជីវិតមនុស្សច្រើនជាងគេ គឺគ្រោះថ្នាក់ចរាចរណ៍»។
កម្លាំងនគរបាល នៃការិយាល័យនគរបាលចរាចរណ៍ជើងគោករាជធានីភ្នំពេញ ក៏បានកំពុងតែ បន្តការចុះអនុវត្តច្បាប់ចរាចរណ៍ រួមទាំងការបាញ់ល្បឿនលើយានយន្ត ដែលល្មើសផងដែរ នៅតាមបណ្តោយផ្លូវ៦០ម៉ែត្រ។ សមត្ថកិច្ចបានរកឃើញយានយន្តល្មើសជាច្រើន។
រដ្ឋមន្រ្តីក្រសួងសាធារណការ និងដឹកជញ្ជូន លោកប៉េង ពោធិ៍នា ថ្លែងក្នុងឱកាសនោះថា ក្នុងឆ្នាំ២០២៤ ក្រសួងបានចុះបញ្ជីយានយន្តប្រមាណជា ៣៧ម៉ឺនគ្រឿង។ ក្នុងនោះទោចក្រយានយន្តប្រមាណជា ៣១ម៉ឺនគ្រឿង និងរថយន្តគ្រប់ប្រភេទប្រមាណជា៥៥ ០០០គ្រឿង។
ក្រៅពីនោះ ក្រសួងបានចុះបញ្ជីរថយន្តបំពាក់ផ្លាកលេខពិសេស និងផ្លាកលេខផ្ទាល់ខ្លួនប្រមាណជា៣ម៉ឺនគ្រឿង និងទទួលបានចំណូលសរុបប្រមាណជាង១៨លានដុល្លារអាមរិក និងយានយន្តដើរដោយថាមពលអគ្គិសនី៣ពាន់គ្រឿង។
ក្រសួងក៏បានចេញបណ្ណបើកបរចំនួន ១១ម៉ឺនបណ្ណ។ ក្នុងនោះ ទោចក្រយានយន្តប្រមាណ៩ម៉ឺនបណ្ណ និងរថយន្តប្រណិតជិត១៤ ០០០បណ្ណជាដើម។ លើសពីនោះ ក្រសួងបានត្រួតពិនិត្យលក្ខណៈបច្ចេកទេស(ឆៀក)បានប្រមាណ៤៦ម៉ឺនគ្រឿង ត្រួតពិនិត្យយានយន្តដឹកជញ្ជូនលើសទំងន់កម្រិតកំណត់ប្រមាណ២លាន ៨៥ម៉ឺនគ្រឿង និងពិន័យប្រមាណជាង១ពាន់គ្រឿង។
មួយវិញទៀត យានយន្តកែច្នៃខុសលក្ខណៈបច្ចេកទេសប្រមាណជា៥៥ ០០០គ្រឿង ក៏ត្រូវបានត្រួតពិនិត្យ ហើយរកឃើញយានយន្តខុសលក្ខណៈបច្ចេកទេសប្រមាណ១៤ ០០០គ្រឿងផងដែរ៕
