សិស្សានុសិស្សកំពុងសិក្សានៅក្នុងសាលាបឋមសិក្សាស្វាយជ្រំ ខេត្ដស្វាយរៀង។ រូបថត យូសុះ អាប់ឌុលរ៉ាស់ហ៊ីម
ខេត្ដពោធិ៍សាត់៖ រដ្ឋមន្ដ្រីក្រសួងអប់រំ យុវជន និងកីឡា បានប្រកាសផែនការផ្ដល់ពានរង្វាន់ស្តង់ដាសាលារៀនគំរូចំនួន ១៣០ ពង្រីកការប្រើប្រាស់បច្ចេកវិទ្យាឌីជីថល និងផ្សព្វផ្សាយគំនិតផ្ដួចផ្ដើមសាលារៀនគ្មានសំរាមឆ្នាំសិក្សា២០២៤-២០២៥នេះ។
សេចក្ដីប្រកាសនេះ ត្រូវបានធ្វើឡើងក្នុងពិធីបើកសន្និបាតបូកសរុប វាយតម្លៃការងារអប់រំ យុវជន និងកីឡា ឆ្នាំសិក្សា ២០២៣-២០២៤ និងលើកទិសដៅការងារ ឆ្នាំសិក្សា ២០២៤-២០២៥ របស់អប់រំ យុវជន និងកីឡា ខេត្តពោធិ៍សាត់ កាលពីថ្ងៃទី៣០ ខែមករា។
លោក ណារ៉ុន បានសង្កត់ធ្ងន់ថា កម្មវិធីស្តង់ដាសាលារៀនគំរូនឹងបន្តជាមូលដ្ឋានគ្រឹះនៃគោលនយោបាយអប់រំរបស់រាជរដ្ឋាភិបាល ដោយនឹងផ្ដល់សាលារៀនថ្មីចំនួន ១៣០ ទៀតឆ្នាំនេះ។ នាពេលកន្លងមក ក្រសួងអប់រំ បានវាយតម្លៃ និងប្រគល់ពានរង្វាន់ជូនសាលារៀនគំរូចំនួន១២០រួចមកហើយ។
សម្រាប់ឆ្នាំសិក្សា ២០២៣-២០២៤ សាលារៀនចំនួន៧៩៣ ត្រូវបានជ្រើសរើសជាសាលារៀន គោលដៅអនុវត្តស្តង់ដាសាលារៀនគំរូ ដើម្បីធ្វើអធិការកិច្ច ផ្ដល់ការគាំទ្រ និងជំរុញការអនុវត្ត ក្នុងនោះសាលាមត្តេយ្យសិក្សា៩៦ សាលាបឋមសិក្សា ៣៤៨ និងសាលាមធ្យមសិក្សា ៣៤៩។
លោកបានថ្លែងថា៖ «ដើម្បីសម្រេចបានស្តង់ដាសាលារៀនគំរូក្នុងឆ្នាំសិក្សា ២០២៤-២០២៥ ស្របតាមស្តង់ដាទាំង ៥៖ (ស្តង់ដាទី១) លទ្ធផលសិក្សារបស់សិស្ស (ស្តង់ដាទី២) ការបង្រៀននិងរៀន (ស្តង់ដាទី៣) ការចូលរួមរបស់សហគមន៍ (ស្តង់ដាទី៤) ដំណើរប្រតិបត្តិការនិងរដ្ឋបាលសាលារៀន និង(ស្តង់ដាទី៥) គណនេយ្យភាពរបស់សាលារៀន»។
ស្របតាមនិន្នាការនៃការអប់រំជាសកល ក្រសួងក៏កំពុងផ្តល់អាទិភាពដល់ការផ្លាស់ប្តូរឌីជីថលនៅក្នុងសាលារៀនផងដែរ។ គំនិតផ្តួចផ្តើមដ៏សំខាន់មួយ រួមមានការបង្កើតមជ្ឈមណ្ឌលបច្ចេកវិទ្យានៅក្នុងខេត្តពោធិ៍សាត់ ក្នុងគោលបំណងលើកកម្ពស់អក្ខរកម្មឌីជីថល និងការសិក្សាផ្អែកលើបញ្ញាសិប្បនិម្មិត AI។គម្រោងនេះចាប់ផ្តើមពីដំណាក់កាលសាកល្បង ដើម្បីពង្រឹងការរៀននិងបង្រៀន ឆ្លើយតបនឹងយុគសម័យឌីជីថល។
រដ្ឋមន្ដ្រីក្រសួងអប់រំ យុវជន និងកីឡា បានប្រកាសផែនការផ្ដល់ពានរង្វាន់ស្តង់ដាសាលារៀនគំរូចំនួន ១៣០ សម្រាប់ឆ្នាំសិក្សា២០២៤-២០២៥នេះ។ រូបថត យូសុះ អាប់ឌុលរ៉ាស់ហ៊ីម
លើសពីនេះ បណ្ណាល័យសតវត្សរ៍ទី ២១ នឹងត្រូវបង្កើតឡើង ដើម្បីគាំទ្រដល់ការអប់រំបែបឌីជីថល ដោយភ្ជាប់ស្ថាប័ននានា ដូចជាវិទ្យាល័យព្រះស៊ីសុវត្ថិ ជាមួយសាលារៀនផ្សេងទៀតទូទាំងប្រទេស។
លោករដ្ឋមន្ដ្រីបានថ្លែងថា៖ «បច្ចេកវិទ្យាកំពុងផ្លាស់ប្តូរការអប់រំយ៉ាងឆាប់រហ័ស ហើយយើងត្រូវតែសម្របខ្លួនដោយការបញ្ចូល AI និងឧបករណ៍ឌីជីថលដើម្បីបង្កើនការរៀន និងការបង្រៀន»។
គំនិតផ្តួចផ្តើមគួរឱ្យកត់សម្គាល់មួយទៀតដែលត្រូវបានណែនាំនៅក្នុងសន្និបាតគឺការប្រកួតប្រជែងសាលារៀនគ្មានសំរាមដែលមានគោលបំណងលើកកម្ពស់ការទទួលខុសត្រូវបរិស្ថានក្នុងចំណោមសិស្ស។
លោក ណារ៉ុន បានឱ្យដឹងថា សម្រាប់វិទ្យាល័យក្នុងខេត្តពោធិ៍សាត់ទាំងអស់ ជាពិសេសអាចប្រែក្លាយសាលារៀនដែលមានធុងសំរាមទៅជាសាលារៀនគ្មានធុងសំរាម។
ជាផ្នែកនៃកំណែទម្រង់វិស័យអប់រំដែលកំពុងបន្ត ក្រសួងបានសង្កត់ធ្ងន់លើសារៈសំខាន់នៃហេដ្ឋារចនាសម្ព័ន្ធសាលារៀន គុណភាពគ្រូបង្រៀន សុខុមាលភាពសិស្ស និងការចូលរួមរបស់មាតាបិតា។
លោក ណារ៉ុន បានលើកឡើងពីកត្តាសំខាន់ៗចំនួនបួនដែលចាំបាច់សម្រាប់ការជំរុញកំណែទម្រង់ការអប់រំប្រកបដោយប្រសិទ្ធភាពនៅកម្ពុជា។
ដំបូង កត្តាសាលារៀន ដែលត្រូវតែមានអគារហេដ្ឋារចនាសម្ព័ន្ធសមស្រប បន្ទប់ពិសោធន៍ បន្ទប់កុំព្យូទ័រ រៀបចំបរិស្ថានសាលារៀនស្អាត ជាពិសេសការដឹកនាំគ្រប់គ្រងបានល្អពីសំណាក់នាយក នាយិកាសាលារៀន ដែលជំរុញបាននូវអភិបាលកិច្ចសាលារៀនប្រកបដោយប្រសិទ្ធភាពខ្ពស់។
លោកបានថ្លែងថា៖ «ចំពោះកត្តាសិស្ស ពួកគេត្រូវមានសុខភាពរឹងមាំល្អ ខួរក្បាលឆ្លាតវៃ មានការខិតខំប្រឹងប្រែងក្នុងការរៀនសូត្រ ចេះស្វ័យសិក្សា និងត្រិះរិះពិចារណា និងមានវិធីសាស្ត្ររៀនច្បាស់លាស់»។
ក្រសួងអប់រំ បាននិងកំពុងយកចិត្តទុកដាក់យ៉ាងខ្លាំងលើការបណ្ដុះបណ្តាលគ្រូបង្រៀន ការបង្កើនប្រាក់បៀវត្សគ្រូបង្រៀន ទាក់ទាញអ្នកមានសមត្ថភាពចូលធ្វើគ្រូបង្រៀន លើកស្ទួយកិត្តិយស និងតួនាទីរបស់គ្រូបង្រៀននៅក្នុងសង្គម ដោយពង្រឹងការបណ្ដុះបណ្ដាលគ្រូប្រកបដោយគុណវុឌ្ឍិ ចំពោះកត្តាគ្រូបង្រៀន។
លោកបានបញ្ជាក់ថា សម្រាប់កត្តាឪពុកម្តាយ អ្នកអាណាព្យាបាល ពួកគេត្រូវមានការចូលរួមជំរុញកូនឱ្យទៅរៀន និងប្រឹងប្រែងសិក្សាពីអ្នកអាណាព្យាបាល។ ទន្ទឹមនឹងការខិតខំប្រឹងប្រែងរបស់សិស្សផ្ទាល់ ក៏ត្រូវមានការគាំទ្រទាំងផ្នែកស្មារតី និងធនធានពីសំណាក់ក្រុមគ្រួសារ ឪពុកម្តាយ អ្នកអាណាព្យាបាល និងសហគមន៍ផងដែរ៕
