
លោក ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងលោក Dominic Williams ឯកអគ្គរាជទូតចក្រភពអង់គ្លេសប្រចាំកម្ពុជា ក្នុងជំនួបកាលពីថ្ងៃទី៣០ ខែមករា។ ក្រសួងការបរទេស
ចក្រភពអង់គ្លេសនឹងបន្តផ្ដល់ភាពអនុគ្រោះដល់កម្ពុជា រយៈពេល ៣ ឆ្នាំទៀតបន្ទាប់ពីកម្ពុជាចាកចេញពីក្រុមប្រទេសក្រីក្រនៅខែធ្នូ ឆ្នាំ២០២៩ នៅពេលដែលកម្ពុជានឹងត្រូវបាត់បង់ភាពអនុគ្រោះនានាដែលផ្ដល់ឲ្យប្រទេសអភិវឌ្ឍន៍តិចតួច។
ការប្ដេជ្ញាបន្តគាំទ្រដល់កម្ពុជានេះ ត្រូវបានលើកឡើងនៅក្នុងជំនួបពិភាក្សាការងាររវាងលោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងលោក Dominic Williams ឯកអគ្គរាជទូតចក្រភពអង់គ្លេសប្រចាំកម្ពុជា កាលពីថ្ងៃទី៣០ ខែមករា ដែលជំនួបនេះធ្វើឡើងដើម្បីលើកកម្ពស់វិនិយោគនិងពាណិជ្ជកម្មរវាងប្រទេសទាំងពីរ។
យោងតាមសេចក្ដីប្រកាសព័ត៌មានរបស់ក្រសួងការបរទេស ភាគីទាំងពីរបានទទួលស្គាល់ពីសារៈសំខាន់នៃបញ្ចូលកម្ពុជាទៅក្នុងគម្រោងពាណិជ្ជកម្មប្រទេសកំពុងអភិវឌ្ឍន៍ (DCTS)។ DCTS គឺជាគម្រោងពាណិជ្ជកម្មរបស់ចក្រភពអង់គ្លេសដែលត្រូវបានបង្កើតឡើងនៅឆ្នាំ ២០២៣ ដើម្បីជំនួសប្រព័ន្ធអនុគ្រោះពន្ធ GSP សម្រាប់ប្រទេសកំពុងអភិវឌ្ឍន៍។
ក្រសួងបរទេសបញ្ជាក់ថា លោក ប្រាក់ សុខុន «បានសម្ដែងការកោតសរសើរចំពោះការគាំទ្ររបស់ចក្រភពអង់គ្លេស រួមទាំងការសម្រេចបន្តអត្ថប្រយោជន៍ដល់កម្ពុជា ក្រោមគម្រោង DCTS សម្រាប់រយៈពេល ៣ ឆ្នាំបន្ថែមរហូតដល់ឆ្នាំ ២០៣២ បន្ទាប់ពីកម្ពុជាចាកចេញពីឋានៈប្រទេស LDC (ប្រទេសអភិវឌ្ឍន៍តិចតួច) ដើម្បីជួយធានាឲ្យមានការផ្លាស់ប្ដូរ»។
ភាគីទាំងពីរក៏បានសាទរដល់កំណើនចំនួនភ្ញៀវទេសចរចក្រភពអង់គ្លេសមកកាន់កម្ពុជា និងបានឯកភាពដើម្បីបង្កើនចំនួនទេសចរឲ្យកាន់តែច្រើនឡើង។ នៅឆ្នាំ២០២៤ ចំនួនភ្ញៀវទេសចរពីចក្រភពអង់គ្លេសឈរលំដាប់ថ្នាក់ទី៩ ដែលមានចំនួនសរុប ជាង ១១ម៉ឺន ៥ពាន់នាក់។
ចំណែកការវិនិយោគវិញ ចក្រភពអង់គ្លេស គឺជាដៃគូពាណិជ្ជកម្មធំជាងគេទី១០ របស់កម្ពុជា បន្ទាប់ពីប្រទេសចិន អាមេរិក វៀតណាម ថៃ ជប៉ុន កាណាដា ឥណ្ឌូនេស៊ី អាល្លឺម៉ង់ និងអេស្ប៉ាញ។
ទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា (GDCE) បានឱ្យដឹងថា ក្នុងឆ្នាំ ២០២៤ ការនាំចេញនាំចូលទំនិញរវាងកម្ពុជា និងចក្រភពអង់គ្លេស មានទឹកប្រាក់សរុបជាង ១ ០១២ លានដុល្លារ កើនឡើង ១៦ ភាគរយបើធៀបនឹងឆ្នាំ ២០២៣ ក្នុងនោះកម្ពុជានៅទៅចក្រភពអង់គ្លេសមានជាង ៩៥៨ លានដុល្លារ កើន ២០,៤ ភាគរយ និងចក្រភពអង់គ្លេសនាំមកកម្ពុជាមានជាង ៥៣ លានដុល្លារ ថយចុះ ២៩,៩ ភាគរយ។
បើមើលទៅលើតុល្យភាពជញ្ជីងពាណិជ្ជកម្ម គឺកម្ពុជាមានឧត្តមភាពប្រមាណជាង ៩០៥ លានដុល្លារ។ ចក្រភពអង់គ្លេស គឺជាប្រទេសដែលទទួលទិញទំនិញច្រើនពីកម្ពុជាលំដាប់ទី ៨ បន្ទាប់ពីអាមេរិក វៀតណាម ចិន ជប៉ុន កាណាដា អេស៉្បាញ និងអាល្លឺម៉ង់៕