សត្វក្រៀលនៅដីសណ្ដមេគង្គក្រោម ដែលត្រូវបានធ្វើជំរឿនកាលពីចុងខែធ្នូ ២០២៤។ អង្គការជីវិតធម្មជាតិនៅកម្ពុជា
លទ្ធផលនៃការធ្វើជំរឿនសត្វក្រៀលនៅតំបន់ដីសណ្ដមេគង្គក្រោមនៃប្រទេសកម្ពុជា បង្ហាញពីការធ្លាក់ចុះចំនួនសត្វក្រៀល ១៥ ក្បាល ពី ៦៧ក្បាលកាលពីខែធ្នូ ឆ្នាំ២០២៣ មកនៅត្រឹម ៥២ក្បាល នៅខែធ្នូឆ្នាំ២០២៤។
ការធ្វើជំរឿនសត្វក្រៀលនេះធ្វើឡើងកាលពីថ្ងៃទី៣០ និង៣១ ខែធ្នូ ឆ្នាំ២០២៤ ដោយអង្គការជីវិតធម្មជាតិនៅកម្ពុជា មន្ទីរបរិស្ថានខេត្តតាកែវ មន្ទីរបរិស្ថានខេត្តកំពត នៅតំបន់ការពារទេសភាពបឹងព្រែកល្ពៅ ខេត្តតាកែវ និងតំបន់ការពារទេសភាពអន្លង់ព្រីង ខេត្តកំពត។
ការជំរឿននេះ មានការចូលរួមពី មន្ត្រីឧទ្យានុរក្ស មន្ត្រីកងរាជអាវុធហត្ថ សហគមន៍មូលដ្ឋាន អ្នកស្ម័គ្រ និងបុគ្គលិកអង្គការជីវិតធម្មជាតិនៅកម្ពុជា សរុបចំនួន ១៣រូប។
ក្នុងចំណោមសត្វក្រៀលទាំង ៥២ ក្បាលនេះ សត្វក្រៀលចំនួន៤៤ក្បាល (ជំទង់ចំនួន១១) មានវត្តមានក្នុងតំបន់ការពារទេសភាពបឹងព្រែកល្ពៅ និងចំនួន ៨ក្បាល មានវត្តមានក្នុងតំបន់ការពារទេសភាពអន្លង់ព្រីង។
យ៉ាងណាក៏ដោយ នេះជាការធ្វើជំរឿនលើកដំបូង ខណៈដែលជំរឿនបែបនេះនឹងត្រូវធ្វើឡើង៤ដងទៀតមុននឹងទទួលលទ្ធផលជំរឿនសរុបប្រចាំឆ្នាំ២០២៤-២០២៥។
អង្គការជីវិតធម្មជាតិនៅកម្ពុជា បានថ្លែងថា៖ «ការថយចុះនេះបណ្ដាលមកពីកត្តាប្រឈមមួយចំនួនដូចជា ការប្រែប្រួលទីជម្រក ការរំខានពីសកម្មភាពមនុស្សចូលនេសាទក្នុងតំបន់ការពារ និងការលែងសត្វក្របីច្រើនពាសវាលពាសកាលក្នុងតំបន់ការពារជាដើម។
អង្គការជីវិតធម្មជាតិនៅកម្ពុជា សំណូមពរដល់សហគមន៍ អាជ្ញាធរមូលដ្ឋាន និងប្រជាពលរដ្ឋទូទាំងប្រទេស ចូលរួមការពារតំបន់ដីសើមនេះ និងនិយាយថាទេចំពោះការបរិភោគសាច់សត្វព្រៃគ្រប់ប្រភេទ។
អង្គការដដែលនេះ សរសេរថា៖ «រួមទាំងអស់គ្នា យើងអាចការពារបក្សីដ៏កម្រនេះ និងទីជម្រករបស់វា»៕
