បុរសជនជាតិម៉ាឡេស៊ី Jimmy អាយុ៣១ឆ្នាំ កាលពីខែកក្កដាឆ្នាំមុន បានចាញ់បោកមិត្តភក្តិ សន្យាជួយរកការងារធ្វើនៅកម្ពុជា និងជួយទិញសំបុត្រយន្តហោះឱ្យ។ រូបថត China Press
ភ្នំពេញ៖ បុរសម៉ាឡេស៊ីម្នាក់ ដែលត្រូវបានបណ្ដាញផ្សព្វផ្សាយបរទេសចុះផ្សាយថា រូបគេត្រូវបានបង្ខាំងដោយទង្វើនៃការឆបោកផ្ដល់ការងារនៅកម្ពុជា បានចាញ់បោកមិត្ដភក្ដិ និងបង្ខំចិត្ដបន្ដបោកប្រាស់អ្នកដទៃ។
ដោយសារតែបុរសម៉ាឡេស៊ីនេះមិនសហការជាមួយសមត្ថកិច្ចកម្ពុជា និងផ្ដល់ភ័ស្ដុតាងឈានទៅការចាប់ជនល្មើស សមត្ថកិច្ចពាក់ព័ន្ធ កំពុងបើកការស្រាវជ្រាវយ៉ាងយកចិត្តទុកដាក់បំផុត ដើម្បីលាងជម្រះព័ត៌មានមិនពិតនេះ និងស្វែងរកទឡ្ហករណ៍ភស្តុតាងគ្រប់គ្រាន់ ដើម្បីដាក់បន្ទុកបុរសរូបនេះវិញ។
យោងតាមអ្នកនាំពាក្យក្រសួងមហាផ្ទៃ លោក ទូច សុឃៈ បានឱ្យដឹងថា៖ «ប្រសិនបើករណីនេះកើតនៅកម្ពុជា ហេតុអ្វីបុរសជនជាតិម៉ាឡេស៊ីរូបនេះ មិនផ្តល់ព័ត៌មានដល់សមត្ថកិច្ច នៅពេលសមត្ថកិច្ចកម្ពុជាជួយអន្តរាគមន៍សង្គ្រោះខ្លួន អំពី សាច់រឿងលម្អិត តម្រុយព័ត៌មាន ប្រភព ទីតាំងប្រព្រឹត្តបទល្មើស និងមុខសញ្ញាជនសង្ស័យនោះ?»។
ក្រោយពីបានឃើញសារព័ត៌មានចិនចុះផ្សាយថ្ងៃទី៧ ខែកុម្ភៈ ចំណងជើងថា «ដោយសារតែសំបុត្រយន្តហោះមិនគិតថ្លៃត្រូវគេបោកឱ្យទៅកម្ពុជា បុរសម៉ាឡេស៊ីជាប់បង្ខាំងកន្លះឆ្នាំរស់នៅពឹងលើបរិភោគសាច់កណ្តុរ» លោក សុឃៈ បានបន្ដថា លោកមានការសោកស្តាយនឹងបុរសម៉ាឡេស៊ីមួយរូបដែលមិនសហការផ្តល់ព័ត៌មានជនល្មើសដល់សមត្ថកិច្ចកម្ពុជា ដើម្បីស្រាវជ្រាវនិងបង្ក្រាបជនល្មើសឱ្យដល់ឫសគល់ ប៉ុន្តែបែរជាបុរសរូបនេះ ផ្តល់បទសម្ភាសន៍ដល់បណ្ដាញព័ត៌មានអន្តរជាតិទៅវិញ។
លោកបានលើកឡើងថា៖ «បុរសរូបនេះបែរជាគេលាក់ព័ត៌មាន រហូតទៅដល់ប្រទេសខ្លួនទើប ប្រាប់ណ្ដាញព័ត៌មានឱ្យចុះផ្សាយ។ តើអាចការប្រឌិតព័ត៌មាន ធ្វើឱ្យមានការភាន់ច្រឡំប៉ះពាល់កេរ្តិ៍ឈ្មោះកម្ពុជា?»។
លោក សុឃៈ បានបន្ដថា យោងតាមសារព័ត៌មានភាសាចិន China Press ជនរងគ្រោះឈ្មោះ Jimmy អាយុ៣១ឆ្នាំ កាលពីខែកក្កដាឆ្នាំមុនបានស្គាល់មិត្តភក្តិមា្នក់ ដោយមិត្តភក្តិនោះសន្យាជួយរកការងារធ្វើនៅកម្ពុជា និងជួយទិញសំបុត្រយន្តហោះឱ្យលោកមកកម្ពុជា។
កាសែតភាសាចិន បានបន្ដថា លោក Jimmy បានយល់ព្រម តែចុងក្រោយត្រូវបានគេបោកបញ្ឆោតឱ្យទៅកន្លែងបោកប្រាស់តាមអនឡាញ។ បន្ទាប់ពីចូលទៅក្នុងកន្លែងធ្វើការងារបោកប្រាស់ លោក Jimmy ត្រូវបានតម្រូវឱ្យសម្រេចផែនការការងារបោកបញ្ចោតអ្នកដទៃយ៉ាងតិចឱ្យបា ៦ម៉ឺនរីងហ្គីត (ប្រហែល ១៣៥០០ដុល្លារ) ក្នុងមួយខែ ទើបអនុញ្ញាតឱ្យប្រើទូរស័ព្ទដៃ។
លោក សុឃៈ បានដកស្រង់ប្រភពដដែលដោយបានបន្ដថា៖ «ប៉ុន្តែគាត់មិនចង់ក្លាយជាសមាជិកនៃក្រុមឆបោកទេ ដូច្នេះគាត់ត្រូវបានគេវាយដំ និងបង្អត់អាហារ ហើយថែមទាំងបង្ខំឱ្យបរិភោគសាច់ជ្រូក និងសាច់កណ្តុរទៀតផង»។
ទីបំផុត លោក Jimmy ធ្វើពុតជាទាក់ទងទៅបោកបញ្ឆោតស្ត្រីម្នាក់ ដោយតាមរយៈស្រី្តនោះ លោកលួចប្រាប់ពីស្ថានភាពរបស់ខ្លួន និងសុំឱ្យស្ត្រីនោះ ជួយទាក់ទងម្តាយរបស់ខ្លួន ដើម្បីស្វែងរកជំនួយពីអង្គការមនុស្សធម៌ម៉ាឡេស៊ី(MHO)។
លោកបានបញ្ជាក់ថា អង្គការមនុស្សធម៌ម៉ាឡេស៊ី MHO បានទាក់ទងទៅរាជរដ្ឋាភិបាលកម្ពុជា និងប៉ូលិសកម្ពុជាសង្គ្រោះ លោក Jimmy បន្ទាប់រៀបចំឯកសារ និងសាកសួរពីប៉ូលិស រយៈពេលមួយខែកន្លះក្រោយមក គឺនៅព្រឹកថ្ងៃទី៧ លោក Jimmy បានត្រឡប់ដល់ប្រទេសខ្លួនវិញហើយ»៕
