កណ្តាលៈ បុរស២នាក់ត្រូវបានឃាត់ខ្លួន បន្ទាប់ពីពួកគេបានដុតសំរាម និងជញ្រ្ជាំងស្រូវបង្កអគ្គិភ័យ ក្នុងឃុំក្រាំងម្កាក់ និងឃុំបែកចាន ស្រុកអង្គស្នួល ដោយបំពានទៅនឹងការណែនាំរបស់អាជ្ញាធរមូលដ្ឋាន និងក្រសួងពាក់ព័ន្ធ ស្តីពីវិធានការការពារ និងទប់ស្កាត់ភ្លើងឆេះព្រៃនៅក្នុង​រដូ​វ​ប្រាំងនេះ។

រដ្ឋបាលស្រុកអង្គស្នួលបានឱ្យដឹងថា កម្លាំងអាជ្ញាធរស្រុកបានចាត់វិធានច្បាប់ ដោយធ្វើការឃាត់ខ្លួនបុរស២នាក់ ដែលបានធ្វើសកម្មភាពដុតស្មៅ និងជញ្រ្ជាំង ក្នុង២ករណីផ្សេងគ្នា​ នៅថ្ងៃទី៩ ខែកុម្ភៈនេះ ក្រោយពីបានធ្វើការអប់រំ និងណែនាំផង ប៉ុន្តែពួកគេនៅតែបំពាន។

ករណីទី១ បុរសអាយុ៣១ឆ្នាំត្រូវបានឃាត់ខ្លួន ដោយសារតែករណីដុតជញ្រ្ជាំងស្រូវបង្កជាអគ្គិភ័យនៅក្នុងភូមិព្រៃពពេល ឃុំក្រាំងម្កាក់ ស្រុកអង្គស្នួល។ ចំណែកឯ ករណីមួយទៀត បុរសអាយុ៣៥ឆ្នាំ ក៏ត្រូវបានឃាត់ខ្លួន ក្រោយពីបានដុតសំរាម ​បង្កអគ្គិភ័យ នៅដីទំនេរមួយកន្លែង ស្ថិតនៅក្នុងភូមិអណ្តូង ឃុំបែកចាន។

រដ្ឋបាលស្រុកបានបញ្ជាក់ថា៖«អប់រំផង ណែនាំផង នៅតែមិនគោរព មានតែវិធានការច្បាប់។ កម្លាំងគណៈបញ្ជាការឯកភាពរដ្ឋបាលស្រុក ចាត់វិធានការឃាត់ខ្លួនបុរស២នាក់ ដែលបានធ្វើសកម្មភាពដុតស្មៅ និងជ​ញ្រ្ជាំង ២ករណីផ្សេងគ្នា ដែលឆាប់ឆេះរាលដាលស្ទើរតែបង្កឱ្យឆាប់ឆេះផ្ទះប្រជាពលរដ្ឋ ដើម្បីកសាងសំណុំរឿង ចាត់ចែងតាមនីតិវិធី»។

ទោះយ៉ាងណា អធិការស្រុកអង្គស្នួល លោកមាន សំណាងបានប្រាប់ភ្នំពេញប៉ុស្តិ៍ដោយខ្លី នៅអង្គារ ទី១១ ខែកុម្ភៈនេះថា បុរសទាំង២នាក់នោះ ត្រូវបានធ្វើកិច្ចសន្យា អប់រំ ណែនាំ ហើយអនុញ្ញាតឱ្យត្រឡប់ទៅផ្ទះវិញ។

រដ្ឋបាលស្រុកអង្គស្នួលបានធ្វើការអំពាវនាវ ដល់ប្រជាពលរដ្ឋ ឱ្យបញ្ឈប់សកម្មភាពដុតសំរាម ស្មៅ និងជញ្រ្ជាំងជាដើម ព្រោះវាអាចបង្កហានិភ័យ និងបណ្តាលឱ្យប៉ះពាល់បរិស្ថាន។

សេចក្តីជូនដំណឹង នាពេលកន្លងមក ស្តីពី វិធានការការពារ និងទប់ស្កាត់ភ្លើងឆេះព្រៃនៅក្នុង​រដូ​វ​ប្រាំងរបស់ក្រ​​សួង បានឱ្យដឹងថា អ្នកមិនប្រុងប្រយ័ត្ន បង្កឱ្យមានភ្លើងឆេះព្រៃ គឺជា​បទល្មើសត្រូវផ្តន្ទាទោសដាក់ពន្ធ​នាគារ រហូតដល់១ឆ្នាំ និងពិន័យជាប្រាក់រហូតដល់១០០លានរៀល។ 

នគរបាល និងពលរដ្ឋជួយអន្តរាគមន៍ពន្លត់អគ្គិភ័យ ដែលបណ្តាលមកពីការដុតសំរាម និងជញ្រ្ជាំងស្រូវ។ រូបថត រដ្ឋបាលស្រុកអង្គស្នួល

លើសពីនោះ បុគ្គលណា ដែលបង្កឱ្យមានភ្លើងឆេះព្រៃ ឬឆេះតំបន់ដីមមោក ដោយចេតនា ជា​បទល្មើសធនធានធម្មជាតិ ថ្នាក់ទី៣ ក្នុងតំបន់ការពារធម្មជាតិ ដែលត្រូវផ្តន្ទាទោសដាក់ពន្ធនាគារពី៥ឆ្នាំ ទៅ​១០​ឆ្នាំ​ផង​ដែរ។

ក្រោយពីមានបញ្ហាធ្លាក់ចុះគុណភាពខ្យល់មួយចំនួន អាជ្ញាធរខេត្ត ជាពិសេសមន្ទីរបរិស្ថានខេត្តបានណែនាំមិនឱ្យមានការដុតសំរាម សំណល់រឹងតាមគេហ​ដ្ឋាន ឬតាមទីសាធារណៈ។

ក្រសួងបរិស្ថានបានជូនដំណឹងថា គុណភាពខ្យល់នៅកម្ពុជា សម្រាប់ថ្ងៃទី១០ ខែកុម្ភៈ ឆ្នាំ២០២៥ ចាប់ពីម៉ោង ៦ ល្ងាច ដល់ម៉ោង ៦ ព្រឹក ថ្ងៃទី១១ ខែកុម្ភៈ ឆ្នាំ២០២៥ មានកំហាប់ភាគល្អិតនិចលគិតជាមធ្យមស្មើនឹង ៤៦.៦១ µg/m3 ធៀបនឹងស្តង់ដា ៥០ ug/m3 និងគិតជាសន្ទស្សន៍គុណភាពខ្យល់ (Air Quality Index) គឺ “ល្អ”។

ទោះយ៉ាងណា នៅក្នុងខេត្ត ខេត្តពោធិ៍សាត់ និងខេត្តកោះកុង មានពណ៌ទឹកក្រូច ដែលមានការ«បំពុលខ្យល់មធ្យម»។ រីឯ ខេត្តបន្ទាយមានជ័យ កណ្តាល​ ព្រះវិហារ  សៀមរាប ព្រះសីហនុ ស្ទឹងត្រែង និងខេត្តប៉ៃលិន​មានពណ៌លឿង ដែលមានការ«បំពុលខ្យល់កម្រិតស្រាល»។

ចំពោះ ពណ៌បៃតង ដែលគុណភាពខ្យល់«ល្អ» មានខេត្តបាត់ដំបង កំពង់ចាម កំពង់ស្ពឺ កំពង់ធំ រាជធានីភ្នំពេញ​តាកែវ និងខេត្តកែប។ ចំណែកឯ ពណ៌ខៀវ ដែល គុណភាពខ្យល់ «ល្អណាស់« មាន ខេត្តកំពង់ឆ្នាំង កំពត ស្វាយរៀង​  ក្រចេះ ព្រៃវែង រតនគិរី​ ឧត្តរមានជ័យ មណ្ឌលគីរី និងខេត្តត្បូងឃ្មុំ៕