កូនផ្សោតទី៣ សម្រាប់ឆ្នាំ២០២៥នេះបានកើតនៅអន្លង់ជ្រោយបន្ទាយ ខេត្តក្រចេះ នៅថ្ងៃទី៩ ខែកុម្ភៈ ដែលជាដំណឹងរីករាយសម្រាប់ការអភិរក្សសត្វប្រភេទកម្រមួយនេះ។
បើតាមក្រសួងកសិកម្ម កូនផ្សោតទើបកើតថ្មីមួយក្បាលនេះ មានអាយុទើបតែ ២ថ្ងៃប៉ុណ្ណោះហើយវាត្រូវបានប្រទះឃើញដោយក្រុមការងារស្រាវជ្រាវនៃរដ្ឋបាលជលផលនិងអង្គការ WWF នៅរសៀល ថ្ងៃទី៩ ខែកុម្ភៈ នៅអន្លង់ជ្រោយបន្ទាយ ភូមិជ្រោយបន្ទាយ ឃុំជ្រោយបន្ទាយ ស្រុកព្រែកប្រសព្វ ខេត្តក្រចេះ។
កូនផ្សោតនេះត្រូវបានប្រទះឃើញជាមួយក្រុមសត្វផ្សោតពេញវ័យចំនួន ៨ ក្បាលផ្សេងទៀត។ ក្រសួងកសិកម្ម រុក្ខាប្រមាញ់ និងនេសាទ ថ្លែងអំណរគុណចំពោះឆ្មាំទន្លេ អាជ្ញាធរមូលដ្ឋាន និងប្រជាពលរដ្ឋដែលបាន ចូលរួមថែរក្សានិងការពារធនធានជលផលដ៏មានតម្លៃនេះ ព្រមទាំងលើកទឹកចិត្តឲ្យប្រជាពលរដ្ឋរាយការណ៍ជូនសមត្ថកិច្ចប្រសិនបើពួកគេបានឃើញសត្វផ្សោតទើបកើតថ្មី ដើម្បីបុព្វហេតុអភិរក្ស។
ឆ្នាំ ២០២៤ គឺជាឆ្នាំដែលមានកូនផ្សោតបានកើតច្រើនជាងគេ ក្នុងរយៈពេល៤ឆ្នាំចុងក្រោយ គឺមានចំនួន ៩ ក្បាល ប៉ុន្តែ កូនផ្សោត ៤ ក្បាលបានងាប់។ នៅឆ្នាំ ២០២២ ចំនួនកូនផ្សោតដែលបានងាប់មានចំនួនរហូតដល់ ១១ ក្បាល ខណៈដែលក្នុងឆ្នាំដដែលនេះ កូនផ្សោតថ្មីកើតបានតែ ៦ ក្បាលប៉ុណ្ណោះ។ ឆ្នាំ ២០២១ ក៏មានតួលេខងាប់ច្រើនដែរ រហូតដល់ ៩ ក្បាល និងកើតថ្មី ៦ ក្បាល។
កូនផ្សោតថ្មីនេះ បន្ថែមចំនួនចំនួនសត្វផ្សោតសរុបរហូតដល់ ១០៦ បូកនឹងចំនួនផ្សោតដែលមានចំនួន ១០៥ ដែលមាននៅក្នុងខែមករា៕
