![](https://pppkhmer.sgp1.digitaloceanspaces.com/image/main/20252/12_2_2025_aaa7.jpg)
ការដុតបំផ្លាញគ្រឿងញៀននៅកោះពេជ្រ កាលពីឆ្នាំ២០២៣។ ភ្នំពេញប៉ុស្តិ៍
កម្ពុជាចាប់បានគ្រឿងញៀនសរុបជាង ៤២តោន និងសាធារគីមីផ្សំជាង ៥៩៦តោន ក្នុងយុទ្ធនាការយុទ្ធនាការប្រយុទ្ធប្រឆាំងគ្រឿងញៀនខុសច្បាប់ពីឆ្នាំ២០១៧ ដល់ដំណាច់ឆ្នាំ២០២៤ ខណៈដែលសភាពការណ៍គ្រឿងញៀននៅកម្ពុជាក៏នៅតែមាននិន្នាការមិនទាន់ថមថយនៅឡើយ។
យោងតាមផែនការស្ដីពីការប្រយុទ្ធប្រឆាំងគ្រឿងញៀនខុសច្បាប់លើកទី១០ ដែលនឹងអនុវត្តពីថ្ងៃទី១មករា ដល់ដាច់ឆ្នាំ២០២៥នេះ ក្នុងរយៈពេល៩ឆ្នាំ អាជ្ញាធរមានសមត្ថកិច្ចបានអនុវត្តវិធានការរដ្ឋបាល និងវិធានការច្បាប់ ដោយបានបិទទីតាំងអាជីវកម្មសរុបចំនួន ៤៨ កន្លែង និងបានបើកប្រតិបត្តិការបង្ក្រាបបទល្មើស គ្រឿងញៀនដោយឃាត់ខ្លួនជនសង្ស័យជាច្រើនម៉ឺននាក់ ព្រមទាំងបានចាប់យកគ្រឿងញៀនគ្រប់ប្រភេទមានទម្ងន់ប្រមាណ ៤២ ៨៤៨ គីឡូក្រាម និងសារធាតុគីមីផ្សំប្រមាណ ៥៩៦ ៣៩៩ គីឡូក្រាម។ បន្ថែមពីលើនេះ អាជ្ញាធរមានសមត្ថកិច្ចក៏បានរឹបអូសមធ្យោបាយ សម្ភារៈ និងវត្ថុតាង ទ្រព្យសម្បត្តិ និងបង្កកអចលនទ្រព្យជាច្រើនកន្លែង។
ក្នុងអំឡុង ៩ ឆ្នាំនេះ សមត្ថកិច្ចបានស្រាវជ្រាវរកឃើញ និងបង្ក្រាបបទល្មើសគ្រឿងញៀនដែលមានអង្គការចាត់តាំងចំនួន ៦២៧ ករណី ឃាត់ខ្លួនឧក្រិដ្ឋជនមេខ្លោង ១៩៥ នាក់ និងបណ្តាញខ្សែរយៈ ១ ៤៥៣ នាក់ កសាងសំណុំរឿងបញ្ជូនទៅតុលាការ ដើម្បីផ្តន្ទាទោសតាមច្បាប់។
អ្នកញៀនគ្រឿងញៀនចំនួន ១៤៥ ៧៩០ នាក់ ត្រូវបានបញ្ជូនទៅទទួលការព្យាបាលនិងស្តារនីតិសម្បទាសរុបចំនួន ហើយ ៨១ ៦៧៥ នាក់ក្នុងចំណោមពួកគេត្រូវបានធ្វើសមាហរណកម្មចូលទៅសហគមន៍វិញ។
ក្រៅពីការបង្ក្រាប សមត្ថកិច្ចក៏បានអនុវត្តវិធានការចុះអប់រំសរុបចំនួន ៧៥៦ ៩៣៤ លើក ដែលមានអ្នកចូលរួមនិងទទួលសារអប់រំជាច្រើនលាននាក់។ យ៉ាងណាក៏ដោយ សភាពការណ៍គ្រឿងញៀននៅកម្ពុជានៅតែមាននិន្នាការមិនទាន់ថមថយនៅឡើយ ដោយក្នុងនោះ ការប្រើប្រាស់ ការចែកចាយ ការជួញដូរ និង ការកែច្នៃផលិតគ្រឿងញៀន នៅតែបន្តកើតមានក្នុងសង្គមកម្ពុជា។
បើតាមឯកសារផែការដដែល «ការផលិត និងការជួញដូរ គ្រឿងញៀនខុសច្បាប់នៅតែបន្តកើតមានឡើងដូចជានៅតំបន់ត្រីកោណមាសនិងនៅតំបន់អឌ្ឍចន្ទមាស ហើយពួកឧក្រិដ្ឋជនគ្រឿងញៀនតែងតែផ្លាស់ប្តូរយុទ្ធសាស្ត្រនិងប្រើប្រាស់បច្ចេកវិទ្យាទំនើបដើម្បីផលិតគ្រឿងញៀន ប្រភេទថ្មីៗដែលកំពុងកើនឡើង និងគេចវេះពីការចាប់ខ្លួន»។
លោក ហ៊ុន ម៉ាណែត ដែលបានដាក់ចេញយុទ្ធនាការលើកទី១០នេះ បានថ្លែងនៅក្នុងឯកសារផែនការនេះថា៖ «យើងបានពិនិត្យឃើញបញ្ហាប្រឈមថ្មីមួយចំនួនដែលបានកើតឡើង ដូចជា ការប្រើប្រាស់ ល្បិចកលនាំចូលនូវសារធាតុគីមីបម្រើឱ្យវិស័យកសិកម្ម ឧស្សាហកម្ម បន្លំយកមកកែច្នៃផលិតជាសារធាតុញៀន សំយោគ ការផ្លាស់ប្តូរច្រក និងផ្លូវចរាចរ រួមទាំងរូបភាពនៃការនាំចូលឆ្លងកាត់ ការកែច្នៃផលិតជាដើម។
ក្តីបារម្ភ ដែលជាបញ្ហាប្រឈមរ៉ាំរ៉ៃ និងកំពុងបង្កហានិភ័យដល់សង្គមជាតិនោះគឺ ការប្រើប្រាស់គ្រឿងញៀននៅតាមសហគមន៍នៅតែបន្តកើតមាននៅឡើយ និងកំពុងតែទាមទារឱ្យចាត់វិធានការជាអាទិភាព ដើម្បីដោះស្រាយ ប្រកបដោយប្រសិទ្ធភាពបានទាន់ពេលវេលា»។
លោកបន្តថា ផែនការស្តីពីយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី១០ នេះគឺក្នុងគោលដៅដើម្បីបន្តកិច្ចខិតខំប្រឹងប្រែងរួមគ្នាក្នុងការកាត់បន្ថយផលប៉ះពាល់អវិជ្ជមាននៃគ្រឿងញៀនព្រមទាំងកសាង សង្គមដែលមានសុខុមាលភាពនិងសុវត្ថិភាពសម្រាប់ប្រជាពលរដ្ឋគ្រប់រូប ព្រមទាំងការពារកិត្តិយស។
គោលការណ៍ថ្មីក៏មិនខុសពីគោលការណ៍មុនៗដែរ ពោលគឺវិធានការអប់រំ វិធានការរដ្ឋបាល វិធានការព្យាបាល ស្ដារនីតិសម្បទា និងសមាហរណ្ណកម្ម វិធានការអនុវត្តច្បាប់ វិធានការអនុវត្តបទបញ្ជា ០១បប របស់រដ្ឋាភិបាលក្នុងការធ្វើតេស្តមន្ត្រីរាជការនិងកងកម្លាំងប្រដាប់អាវុធ និងកិច្ចសហប្រតិបត្តិការអន្តរជាតិដើម្បីប្រយុទ្ធប្រឆាំងគ្រឿងញៀនពីចម្ងាយ។ លោក នេត សាវឿន ឧបនាយករដ្ឋមន្ត្រី និងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀននឹងដឹកនាំយុទ្ធនាការនេះ៕