ការធ្វើជំរឿនសត្វក្រៀល លើកទី១ នៅរដូវកាលថ្មី បានធ្វើឡើងនៅចុងឆ្នាំ២០២៤ បាររកឃើញមានចំនួន១២៣ក្បាល ដែលចំនួននេះ គឺបានកត់ត្រាមកពីតំបន់ផ្សេងគ្នា ទូទាំងប្រទេសកម្ពុជា។ រូបថត សហការី
កំពត៖ តំបន់ការពារទេសភាពអន្លង់ព្រីង ស្ថិតនៅក្នុងភូមិសាស្ត្រស្រុកកំពង់ត្រាច ខេត្តកំពត ជាទីជម្រកដ៏សុខសាន្ត និងប្រភពចំណីដ៏សំខាន់ សម្រាប់សត្វក្រៀល និងសត្វស្លាបទេសន្តរប្រវេសន៍ជាច្រើនប្រភេទ បានស្វាគមន៍វត្ដមានសត្វស្លាបធំៗ។
តំបន់ដីសើមនេះបានទាក់ទាញសត្វក្រៀលអំឡុងខែធ្នូដល់ខែមេសាក្នុងការស្វែងរកចំណី ហើយនៅដើមខែឧសភា សត្វស្លាបទេសន្តរប្រវេសន៍ទាំងនោះធ្វើការផ្លាស់ទីទៅកាន់ទីតាំងពងកូនដើម្បីបន្តពូជ។
យោងតាមក្រសួងបរិស្ថាន បានឱ្យដឹងា៖ «នៅរដូវរកចំណីចាប់ពី ខែធ្នូ ដល់ ខែមេសា សត្វក្រៀលធ្វើការផ្លាស់ទីទៅភាគពាយ័ព្យ និងភាគអាគ្នេយ៍នៃប្រទេសកម្ពុជា ជាទីជម្រកដ៏សំខាន់សម្រាប់រកចំណីបំប៉នសុខភាពសម្រាប់រដូវបន្តពូជ ជាពិសេសនៅតំបន់ដែនដីសណ្ដរទន្លេមេគង្គ នៃប្រទេសកម្ពុជា រួមមានតំបន់ការពារទេសភាពអន្លង់ព្រីង និងតំបន់ការពារទេសភាពបឹងព្រែកល្ពៅ។ ពួកវាធ្វើការផ្លាស់ទីពីទីតាំងរកចំណីទៅទីតាំងបន្តពូជវិញនៅចន្លោះខែមេសានិងខែមិថុនា»។
លោក ប៊ូ វរសក្ស ប្រធានអង្គការជីវិតធម្មជាតិនៅកម្ពុជា (NatureLife Cambodia) បានឱ្យដឹងថា ថ្វីដ្បិតតែស្ថិតក្នុងតំបន់ការពារតូចត្រឹមតែ ២១០ហិកតាយ៉ាងណាក៏ដោយ ក៏ទីតាំងនេះមានភាពទាក់ទាញ និងទទួលបានការពេញនិយមរបស់ហ្វូងសត្វក្រៀលក្នុងរដូវមិនបន្ដពូជចាប់ពីធ្នូដល់ខែឧសភា។
វត្ដមានរបស់ហ្វូងក្រៀលទាំងនេះនៅសហគមន៍តំបន់ការពារទេសភាពអន្លង់ព្រីងមានចំនួនរហូតដល់៥០ភាគរយនៃចំនួនសត្វក្រៀលនៅទូទាំងប្រទេសកម្ពុជា។
លោក វរសក្ស បានពន្យល់ថា៖ «វាដោយសារតែទីតាំងនេះសម្បូរចំណីរបស់សត្វក្រៀល ដូចជា មើមផ្លុង និងពូជស្រូវរបស់ប្រជាកសិករ រួមមាន គ្រាប់សម្បកទទឹម និងគ្រាប់ពងលលក»។
សហគមន៍តំបន់ការពារទេសភាពអន្លង់ព្រីង នឹងមានវត្ដមានសត្វក្រៀលប្រមាណ ៨០ក្បាល និងបន្ដរហូតដល់ខែឧសភាព។ រូបថត សហការី
យ៉ាងណាមិញ លោកបានឱ្យដឹងថា បញ្ហាប្រឈមគឺពូជស្រូវទាំងពីរប្រភេទនេះ ប្រជាកសិករមួយចំនួនឈប់ដាំ ហើយកសិផលរបស់ពួកគេប្រើប្រាស់ជីគីមីខ្ពស់ ដែលបង្កឱ្យសត្វក្រៀលស្លាប់។
លោកបានបន្ដថា អង្គការជីវិតធម្មជាតិនៅកម្ពុជា ឬអតីតអង្គការ Bird Life បានផ្ដួចផ្ដើមធ្វើគម្រោងស្រូវមិត្ដក្រៀល ដោយលើកទឹកចិត្ដប្រជាកសិករកាត់បន្ថយការប្រើប្រាស់សារធាតុគីមី និងរក្សាការដាំពូជស្រូវ ដែលសត្វក្រៀលចូលចិត្ដ ក៏ដូចជាមិនរំខាន និងបរបាញ់សត្វក្រៀល ជាមួយលក្ខខណ្ឌសរុបចំនួន ១២។
លោក វរសក្ស បានប្រាប់ភ្នំពេញប៉ុស្ដិ៍ថា៖ «បច្ចុប្បន្ននេះ ប្រជាកសិករ ១២០គ្រួសារចូលរួមធ្វើស្រូវមិត្ដក្រៀល ដែលធ្វើឱ្យវាលស្រែរបស់ពួកគាត់មានសុវត្ថិភាពជាងមុន កាត់បន្ថយពីការរំខាន សារធាតុពុល។ ដូច្នេះ ស្រែរបស់ពួកគាត់បានទាញសត្វក្រៀលទៅរកចំណីនៅទីនោះ»។
សហគមន៍តំបន់ការពារទេសភាពអន្លង់ព្រីង នឹងមានវត្ដមានសត្វក្រៀលប្រមាណ ៨០ក្បាល និងបន្ដរហូតដល់ខែឧសភាព។ វាពិតជាអំណោយផលដល់វិស័យទេសចរណ៍ ដែលភ្ញៀវនិយមទស្សនាសត្វស្លាបរស់នៅតាមធម្មជាតិ។
វាពិតជាអំណោយផលដល់វិស័យទេសចរណ៍ ដែលភ្ញៀវនិយមទស្សនាសត្វស្លាបរស់នៅតាមធម្មជាតិ។ រូបថត សហការី
លោកបាននិយាយថា៖ «នៅតំបន់អន្លង់ព្រីងនេះ ផ្ដល់អំណោយដល់ការទស្សនាសត្វក្រៀល ដោយគ្រាន់តែមើលប៉ម ឬពីផ្លូវ យើងនឹងបានឃើញសត្វក្រៀលក្នុងទីតាំងធម្មជាតិតែម្ដង»។
សហគមន៍ផ្ដល់សេវាកម្មទាក់ទងទេសចរណ៍ដែលផ្ដល់ទាំងអាហារ និងមគ្គុទេសក៍នាំផ្លូវក្នុងការទស្សនាសត្វក្រៀល និងតំបន់មួយចំនួនទៀត ដូចជា ភ្នំទឹក និងភ្នំកំពង់ត្រាចជាដើម។
ការធ្វើជំរឿនសត្វក្រៀល លើកទី១ នៅរដូវកាលថ្មី បានធ្វើឡើងនៅចុងឆ្នាំ២០២៤ បាររកឃើញមានចំនួន១២៣ក្បាល ដែលចំនួននេះ គឺបានកត់ត្រាមកពីតំបន់ផ្សេងគ្នា ទូទាំងប្រទេសកម្ពុជា៕
