ការប្រកួតដណ្តើមតំណែងស្តេចអុកចត្រង្គអង្គរសង្ក្រាន្ត នៅខេត្តសៀមរាប នាពេលកន្លងមក។ រូបថត សហការី
ការប្រកួតកីឡាអុកចត្រង្គដើម្បីស្វែងរក «ស្ដេចអុកចត្រង្គអង្គរសង្ក្រាន្ដ» ក្នុងពិធីបុណ្យចូលឆ្នាំថ្មី ប្រពៃណីជាតិខ្មែរ នាខែមេសា ឆ្នាំ២០២៥នេះ នឹងមានការរៀបចំកាន់តែពិសេស ដោយមានការប្រកួតជម្រុះទាំងក្រុមមហាជន និងជម្រុះតាមសាកលវិទ្យាល័យជាលើកដំបូង ដើម្បីស្វែងរកអ្នកខ្លាំងសរុបចំនួន១០នាក់ ឡើងទៅប្រកួតវគ្គជុំផ្តាច់ព្រ័ត្រ ហេតុនេះនិស្សិតឆ្នើម ក៏មានឱកាសក្លាយទៅជាស្តេចអុកដូចគ្នា។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានថ្លែងថា៖ «ល្បែងអុកចត្រង្គខ្មែរ ជាក្បួនយុទ្ធសាស្រ្តសង្រ្គាមមួយដ៏មានប្រសិទ្ធភាពនៅសម័យអង្គរ ដែលយើងត្រូវតែលើកឡើងនូវព្រលឹងយុទ្ធសាស្រ្តសង្រ្គាមនេះ ទៅក្នុងព្រលឹងវប្បធម៌ដូនតារបស់យើងដែរ អ៊ីចឹងការរៀបចំនៅឆ្នាំនេះ យើងមានការពិភាក្សាគ្នាយ៉ាងល្អិតល្អន់ អំពីវិធីសាស្រ្តរៀបចំ និងវិធីសាស្រ្តបំផុសដល់ចលនាសង្គម ដើម្បីឱ្យមានការចូលរួមកាន់តែគគ្រឹកគគ្រេង និងមានអត្ថន័យ»។
លោក ចំរើន បានលើកឡើងបែបនេះ បន្ទាប់ពីលោកបានជួបពិភាក្សាការងារ និងបន្ស៊ីគ្នាលើការរៀបចំការប្រកួតកីឡាអុកចត្រង្គអង្គរសង្ក្រាន្ដ ជាមួយរដ្ឋលេខាធិការ ក្រសួងឧស្សាហកម្ម វិទ្យាសាស្ដ្រ បច្ចេកវិទ្យា និងនវានុវត្តន៍ លោក ហេង សុខគង់ ជាប្រធានក្រុមការងាររៀបចំការប្រកួត និងតាំងបង្ហាញបញ្ជ្រាបការយល់ដឹងអំពីល្បែងអុកចត្រង្គខ្មែរ នៅទីស្នាក់ការ NOCC កាលពីល្ងាចថ្ងៃទី១១ ខែកុម្ភៈ ឆ្នាំ២០២៥។
នៅក្នុងជំនួបនោះ លោក ហេង សុខគង់ ដែលបានទទួលការណែនាំដ៏ខ្ពង់ខ្ពស់ពីលោកឧបនាយករដ្ឋមន្ដ្រី ហ៊ុន ម៉ានី ប្រធានសហភាពសហព័ន្ធយុវជនកម្ពុជានោះ បានបង្ហាញពីគោលការណ៍ គម្រោង និងផែនការយ៉ាងល្អិតល្អន់ ទៅកាន់ភាគីពាក់ព័ន្ធ ដើម្បីធ្វើយ៉ាងណារៀបចំការប្រកួតអុកចត្រង្គអង្គរសង្រ្កាន្តឆ្នាំនេះ ឱ្យកាន់តែពិសេស និងមានអត្ថន័យស៊ីជម្រៅជាងឆ្នាំមុន។
ការជួបពិភាក្សាការងារ និងបន្ស៊ីគ្នាលើការរៀបចំការប្រកួតកីឡាអុកចត្រង្គអង្គរសង្ក្រាន្ដ នៅទីស្នាក់ការ NOCC កាលពីល្ងាចថ្ងៃទី១១ ខែកុម្ភៈ ឆ្នាំ២០២៥។ រូបថត NOCC
ជាក់ស្ដែងក្រៅពីការប្រកួតស្វែងរក «ស្ដេចអុកចត្រង្គអង្គរសង្ក្រាន្ដ» ដែលនឹងចាប់ផ្ដើមប្រកួតជម្រុះក្នុងស្រទាប់មហាជន ពីខែមីនា រហូតដល់កំឡុងពិធីបុណ្យចូលឆ្នាំថ្មីប្រពៃណីជាតិខ្មែរ ក៏មានបន្ថែមការប្រកួតជម្រុះស្វែងរកនិស្សិតឆ្នើម ឡើងទៅជុំផ្ដាច់ព្រ័ត្រដែរ ដែលជាគំនិតផ្ដួចផ្ដើមរបស់លោកឧបនាយករដ្ឋមន្ដ្រី ហ៊ុន ម៉ានី។
លោក វ៉ាត់ ចំរើន បញ្ជាក់ថា៖ «ការប្រកួតជម្រុះឆ្នាំនេះ មានលក្ខណៈពិសេសជាងឆ្នាំមុនៗ ដោយសារយើងមានបន្ថែម ការប្រកួតស្វែងរកនិស្សិមឆ្នើមផ្នែកអុកចត្រង្គ តាមសាកលវិទ្យាល័យនានា ដើម្បីស្វែងរកអ្នកមានទេពកោសល្យ២នាក់ ពោលគឺនិស្សិត ដែលឡើងវគ្គផ្ដាច់ព្រ័ត្រ នឹងទទួលបានការរៀបចំឱ្យចូលរួមប្រកួតជុំផ្ដាច់ព្រ័ត្រ ដើម្បីស្វែងរកស្ដេចអុកចត្រង្គអង្គរសង្ក្រាន្ដ អ៊ីចឹងនិស្សិតរបស់យើង ក៏អាចក្លាយជាស្ដេចអុកដែរ។ ដូច្នេះសូមលើកទឹកចិត្តនិស្សិតចូលចិត្តលេងអុកចត្រង្គចូលរួមឱ្យបានច្រើន»។
សម្រាប់ការប្រកួតជម្រុះអុកចត្រង្គឆ្នាំ២០២៥នេះ នឹងបែងចែកជា៨តំបន់ (រាជធានី-ខេត្ត) ក្រោមកិច្ចសហការរវាងសហភាពសហព័ន្ធយុវជនកម្ពុជា និងសហព័ន្ធកីឡាអុកចត្រង្គកម្ពុជា ហើយក្នុងមួយតំបន់យកកីឡាករជយលាភីម្នាក់ សរុប៨នាក់ បូកជាមួយបេក្ខភាពនិស្សិតឆ្នើម២នាក់ ដើម្បីឡើងទៅប្រកួតជុំផ្ដាច់ព្រ័ត្រ នៅមុខប្រាសាទអង្គរវត្ត។
លោក វ៉ាត់ ចំរើន បានថ្លែងថា៖ «ឆ្នាំនេះយើងយក១០នាក់ គឺមហាជន៨នាក់ និងនិស្សិត២នាក់ ឡើងទៅប្រកួតជុំផ្តាច់ព្រ័ត្រ ដណ្តើមយកតំណែងស្តេចអុក ហើយនេះជាការបំផុសចលនាមួយ ដើម្បីជំរុញការផ្សព្វផ្សាយ និងស្វែងយល់នូវបញ្ញាស្មារតី ក្នុងការលេងកីឡាអុចត្រង្គខ្មែរយើងកាន់តែផុសផុលថែមទៀត»។
ក្រៅពីការប្រកួតខាងលើ ក្នុងបរិវេណឆាកប្រកួតអុកចត្រង្គនោះដែរ នឹងមានការបង្ហាញនូវអុកយក្ស ក៏ដូចជាការផ្សព្វផ្សាយ និងអប់រំអំពីប្រវត្តិអុកចត្រង្គ ក៏ដូចជាទស្សនទាន សម្រាប់ល្បែងប្រពៃណីជាតិខ្មែរនេះ តាមរយៈការរៀបចំនូវវេទិកាសំណួរចម្លើយ ក៏ដូចជាការបង្ហាត់បង្រៀនអំពីរបៀបលេងកីឡាអុកចត្រង្គនេះផងដែរ ដើម្បីឱ្យអ្នកមិនចេះសោះ ចេះលេង ហើយអ្នកចេះលេង កាន់តែពូកែ។
នៅត្រង់ចំណុចនេះ លោក ចំរើន បញ្ជាក់ថា៖ «នេះជាការងារសំខាន់មួយទៀត ដែលសហព័ន្ធ កំពុងរៀបចំជាមួយសហភាពសហព័ន្ធយុវជនកម្ពុជា គឺក្រៅពីការប្រកួត គឺការបញ្ជ្រាបចំណេះដឹងទាំងអស់នេះ ទៅក្នុងស្រទាប់មហាជន និងអ្នកចូលរួមព្រឹត្តិការណ៍អង្គរសង្ក្រាន្ដហ្នឹង ដើម្បីឱ្យពួកគាត់បង្កើនការទុកចិត្ត និងមានជំនឿទៅលើដូនតាយើង ហើយស្រលាញ់ និងចូលរួមថែរក្សា និងអភិរក្សនូវព្រលឹងវប្បធម៌នៃកីឡាប្រពៃណីខ្មែរទាំងអស់គ្នា»៕
