រាជធានី​ភ្នំពេញត្រូវបានចាត់ថ្នាក់លេខ ៤១ ក្នុងចំណោម​ទីក្រុង​ចំនួន ១០០នៅ​ក្នុងតំបន់អាស៊ី-ប៉ាស៊ីហ្វិកសម្រាប់«ភាពអាចរស់នៅបានល្អ ភាព​​ទាក់ទាញ និង​វិបុលភាព»។ សិង្ហបុរីឈរ​នៅ​កំពូល​តារាង​ ខណៈទីក្រុងឡាហ័រ (Lahore) នៃប្រទេស​ប៉ាគីស្ថានឈរ​នៅ​បាត​តារាង។ នេះបើយោងតាមរបាយការណ៍ថ្មីបំផុត Asia-Pacific’s Best Cities​ ដែលស្រាវ​ជ្រាវ​ដោយក្រុមហ៊ុនប្រឹក្សា Resonance។

របាយការណ៍ដែលចេញផ្សាយនៅ​ថ្ងៃ​ទី១២​ខែកុម្ភៈ​ បាន​បញ្ជាក់​ថា ស្នាមរបួស​នៃ​របបខ្មែរក្រហម​បានជា​សះ​ស្បើយ​ជា​បណ្ដើរៗ​ ដែលជួយ​រាជធានី​នេះ​កំពុងក្លាយជាតំបន់សំខាន់សម្រាប់អ្នកវិនិយោគ, ជនបរទេស និងអាជីវកម្មអន្តរជាតិ។

លើស​ពី​នេះ​ទៀត ទីក្រុង​ភ្នំពេញមានអត្រាអ្នក​អត់​ការងារ​ធ្វើ​ទាបបំផុត និង អត្រាចូលរួមក្នុងកម្លាំងពលកម្មខ្ពស់លំដាប់​ទី២ នៅ​ក្នុង​ចំណាត់​ថ្នាក់​​វាយ​តម្លៃ​។

កត្តា​ទាំង​ពីរ​នេះ​បាន​ធ្វើ​ឲ្យ​ទីក្រុង​ភ្នំពេញ​​មានចំណាត់ថ្នាក់ «លេខ​២៥​ដ៏​ឲ្យអស្ចារ្យ» នៅ​ក្នុង​​ចំណាត់​ថ្នាក់​វាយ​តម្លៃ​​ទៅ​លើ​​​កត្តា​វិបុលភាព​ (prosperity category)។

របាយការណ៍​ដដែល​នេះ​បញ្ជាក់​ថា៖ «ក្នុងរយៈពេល១០ឆ្នាំខាងមុខ នឹងមានការពង្រីកដ៏សំខាន់ ដោយ​រួម​មាន​គម្រោងធំៗដូចជា ការអភិវឌ្ឍបន្តនៃ​គម្រោង​ Olympia City និងការពង្រីក​ការ​អភិវឌ្ឍ​នៅ​កោះពេជ្រ ដែលមិនត្រឹមតែប្តូរទេសភាពរាជធានីប៉ុណ្ណោះទេ វា​ថែមទាំងទាក់ទាញការវិនិយោគបរទេស និងអាជីវកម្មអន្តរជាតិផងដែរ»។

បច្ចុប្បន្ន​នេះ ផ្សារទំនើប​អ៊ីអន (Aeon Mall) និង​សណ្ឋាគារ Raffles Hotel គឺ​ជា​ម៉ាកអន្តរជាតិល្បីៗ​នៅ​លើ​ពិភពលោក ដែល​មាន​វត្ត​មាន​នៅ​ភ្នំពេញ ដែល​​រួម​ចំណែក​ធ្វើ​ឲ្យ​ទីក្រុង​នេះ​មាន​ភាពខ្លាំង។

របាយការណ៍បន្ថែមថា គម្រោងថ្មី​ដូចជា​ The City Center 2 នឹងធ្វើ​ឲ្យ​មាន​ការ​ប្រែប្រួល​ទៅ​លើ​ទេសភាពអាគារពាណិជ្ជកម្មនិងលំនៅដ្ឋានប្រណីត ដែល​ធ្វើ​ឲ្យ​ភ្នំពេញ​ក្លាយ​ជា​​មជ្ឈមណ្ឌល​ពាណិជ្ជកម្ម​ដ៏​សំខាន់​នៅ​ក្នុង​តំបន់។

ស្រប​ពេល​ជាមួយគ្នា​នេះ ក៏​នឹង​មាន​គម្រោង Global Tech Exchange ដែលជាទីតាំង​មាន​ឯកទេសសម្រាប់វិស័យបច្ចេកវិទ្យា ដែល​អាច​ទាក់​ទាញ​ក្រុមហ៊ុនបច្ចេកវិទ្យាអន្តរជាតិ និង​ជំរុញ​ឲ្យ​មាន​ការអភិវឌ្ឍប្រព័ន្ធ​​ផ្តួចផ្តើម​អាជីវកម្ម​ថ្មីៗ។

វិធីសាស្ត្រ​នៃ​ការ​ប្រមូល​​​ទិន្នន័យ​សម្រាប់​របាយការណ៍នេះ ធ្វើ​ឡើង​ដោយ​យក​ការ​លើក​ឡើង​របស់​អ្នកប្រើប្រាស់ពីប្រភពអនឡាញដូចជា Google, Tripadvisor និង Instagram បញ្ចូល​ទៅ​តាម​កត្តា​វាយ​តម្លៃ​ ដើម្បីវាស់ស្ទង់គុណភាពជីវិតនៅ​ក្នុង​ទីក្រុង​នីមួយៗ។

ក្រុមហ៊ុនប្រឹក្សា Resonance បាន​កំណត់​​ភាពអាច​រស់នៅបានល្អ (livability) ដោយោ​វិភាគ​ទៅ​លើ​​គុណភាពបរិស្ថានធម្មជាតិ និងសំណង់អគារសង្គម រួមមាន ឧទ្យាន, ទីតាំងសំខាន់, សង្កាត់​នានា និង​សម្បត្តិបេតិកភណ្ឌ។

ចំណែក​ភាពទាក់ទាញ (lovability) វាស់ស្ទង់​ទៅ​លើ​ភាពរស់រវើក និងអ្វីដែលធ្វើឲ្យទីក្រុងមាន​ភាព​គួរឲ្យស្រឡាញ់ ដូចជា​​វប្បធម៌, អាហារ និងជីវិត​នា​ពេល​រាត្រី។

ចំណែក​ វិបុលភាព (prosperity) វាយតម្លៃលើធនធានមនុស្ស, ការគាំទ្រអាជីវកម្ម និងការតភ្ជាប់ហេដ្ឋារចនាសម្ព័ន្ធ និង​កត្តា​ពាក់​ព័ន្ធ៕