លោកទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន ថ្លែងនៅក្នុងសិក្ខាសាលានៅថ្ងៃទី១៣ ខែកុម្ភៈ។ UNDP
អាជ្ញាធរមីននិងដៃគូអភិវឌ្ឍន៍ពិភាក្សាសេចក្តីព្រាងគោលនយោបាយជាតិសកម្មភាពមីន ២០២៦-២០៣៥ ដើម្បីការតាក់តែងគោលនយោបាយជាតិសកម្មភាពមីនមួយ ឆ្ពោះទៅសម្រេចបានចក្ខុវិស័យ «កម្ពុជាមួយគ្មានផលប៉ះពាល់ដោយសារមីន និងសំណល់ជាតិផ្ទុះពីសង្គ្រាម»។
កិច្ចពិភាក្សាដែលធ្វើឡើងនៅថ្ងៃទី១៣ ខែកុម្ភៈនេះ ធ្វើឡើងក្រោមការគាំទ្រពីគម្រោងបោសសម្អាតមីនដើម្បីលទ្ធផលដំណាក់កាលទី៤ ដែលទទួលបានមូលនិធិពីប្រទេសអូស្ត្រាលី នូវែលសេឡង់ សាធារណរដ្ឋកូរ៉េ អង្គការយូណឌីភី និងដៃគូមួយចំនួនទៀត។
លោកទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន បានលើកឡើងថា ថ្វីបើសកម្មភាពមីន បានទទួលលទ្ធផលដ៏ធំធេងយ៉ាងណាក៏ដោយ ផ្ទៃដីមានមីនដែលនៅសេសសល់ នៅមានទំហំធំ និងមានភាពស្មុគស្មាញខ្លាំង ដែលត្រូវការបន្តបង្កើនកិច្ចខិតខំប្រឹង ទាំងការបោសសម្អាតមីន កិច្ចសហការ និងកៀរគរធនធាន។
ខណៈដែលឆ្នាំនេះ ជាឆ្នាំចុងក្រោយនៃការអនុវត្តផែនការយុទ្ធសាស្ត្រជាតិសកម្មភាពមីន ២០១៨-២០២៥ លោក លី ធុជ ថ្លែងថា៖ «យើងបានពង្រីកមហិច្ឆតារបស់យើង ដោយទិសដៅបន្ទាប់សម្រាប់ក្រោយឆ្នាំ២០២៥ យើងនឹងប្រែក្លាយពីផែនការយុទ្ធសាស្ត្រជាតិ ទៅជាគោលនយោបាយជាតិសកម្មភាពមីន ២០២៦-២០៣៥ ដើម្បីសម្រេចបាននូវចក្ខុវិស័យវែងឆ្ងាយក្រោមគំនិតផ្តួចផ្តើមរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី គឺ កម្ពុជាមួយគ្មានផលប៉ះពាល់ដោយសារមីន និងសំណល់ជាតិផ្ទុះពីសង្គ្រាម»។
លោកស្រី Alissar Chaker តំណាងអង្គារយូអិនឌីភី នៅកម្ពុជា បានថ្លែងថា សិក្ខាសាលាពិភាក្សានេះគឺដំណើរការសំខាន់ក្នុងការពិភាក្សាទៅលើការរីកចម្រើននៃវិស័យបោសសម្អាតមីននៅកម្ពុជា យល់ដឹងពីបញ្ហាប្រឈម ចំណុចអាទិភាព និងគោលដៅទៅអនាគត។
យោងតាមលោក លី ធុជ គិតចាប់ពីឆ្នាំ១៩៩២ ដល់ឆ្នាំ២០២៤ ផ្ទៃដីទំហំ ៣ ២៩៧ គីឡូម៉ែត្រក្រឡា ត្រូវបានបោសសម្អាតសម្រាប់យកទៅប្រើប្រាស់ បង្កបង្កើនផល កសាងហេដ្ឋារចនាសម្ព័ន្ធ លំនៅឋាន ភូមិករ សាលារៀន មណ្ឌលសុខភាពជាដើម ដោយមានប្រជាពលរដ្ឋទទួលផលជាង ១០លាននាក់។
ក្នុងរយៈពេលនេះ ប្រតិបត្តិករដោះមីនបានរកឃើញ និងបំផ្លាញចោល មីនប្រឆាំងមនុស្សចំនួនជាង ១,១ លានគ្រាប់ មីនប្រឆាំងរថក្រោះចំនួនជាង ២,៦ ម៉ឺនគ្រាប់ និងសំណល់ជាតិផ្ទុះពីសង្គ្រាមជាង ៣,១ លានគ្រាប់។
លោកបន្តថា ចំនួនជនរងគ្រោះបានថយចុះពី ៤ ៣២០នាក់ ក្នុងឆ្នាំ១៩៩៦ មកត្រឹម ៤៩នាក់ ក្នុងឆ្នាំ២០២៤ និងមកនៅ ក្រោម ១០០នាក់ ក្នុងមួយឆ្នាំជាមធ្យមរយៈពេល ១០ឆ្នាំចុងក្រោយ។
លោកថ្លែងថា៖ «ទិន្នន័យត្រឹមដើមឆ្នាំ២០២៥នេះបង្ហាញថា កម្ពុជានៅសល់ផ្ទៃដីដែលមានមីនចំនួន ៣៤៨គីឡូម៉ែត្រការ៉េ និងសំណល់ជាតិផ្ទុះពីសង្គ្រាមរួមទាំងគ្រាប់បែកចង្កោមចំនួន ១ ២២៩ គីឡូម៉ែត្រកាក្រឡាបន្ថែមទៀត ដើម្បីសម្រេច»។
លោកបន្ថែមថា ផ្ទៃដីជាក់ស្ដែងអាចធំជាងនេះ ខណៈដែលការសិក្សាស្រាវជ្រាវកំពុងធ្វើឡើងអំពីទីតាំងមានមីន និងគ្រាប់បែកចង្កោម ជាពិសេសនៅតាមព្រំដែន៕
