រដ្ឋមន្ត្រីក្រសួងមហាផ្ទៃ ស សុខា ថ្លែងក្នុងពិធីបិទសន្និបាតប្រចាំឆ្នាំរបស់ក្រសួងមហាផ្ទៃ កាលពីថ្ងៃទី១៣ ខែកុម្ភៈ។ ស សុខា
លោក ស សុខា រដ្ឋមន្ត្រីក្រសួងមហាផ្ទៃបានប្រាប់មន្ត្រីគ្រប់ជាន់ថ្នាក់នៃក្រសួងមហាផ្ទៃ ក៏ដូចមន្ត្រីចុះមូលដ្ឋានកុំឲ្យមានការធ្វើអន្តរាគមន៍ទៅលើការស្នើសុំផ្ទេរការងារពីកន្លែងមួយទៅកន្លែងមួយ ព្រមទាំងប្រាប់ពលរដ្ឋកុំឲ្យសងប្រាក់ដែលខ្ចីតាមអនឡាញពីប្រភពខុសច្បាប់។
លោកថ្លែងដូច្នេះនៅក្នុងពិធីបិទសន្និបាតត្រួតពិនិត្យលទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥ របស់ក្រសួងមហាផ្ទៃ និងបូកសរុបចលនាប្រឡងប្រណាំងអនុវត្តគោលនយោបាយភូមិ-ឃុំ-សង្កាត់មានសុវត្ថិភាព កាលពីថ្ងៃទី១៣ ខែកុម្ភៈ។
ព័ត៌មាននៅលើទំព័រហ្វេសប៊ុកផ្លូវការរបស់លោកបានស្រង់សម្ដីរបស់លោក ដែលបានស្នើដល់ក្រុមការងាររាជរដ្ឋាភិបាល ឬក្រុមការងារចុះមូលដ្ឋានឲ្យ «បញ្ឈប់ការអន្តរាគមន៍ដើម្បីយកមន្ត្រីពីកន្លែងផ្សេង ឬមូលដ្ឋានផ្សេងឲ្យទៅនៅមូលដ្ឋានដែលខ្លួនចុះទៅ»។ លោកបន្តថា អាជ្ញាធរនៅមូលដ្ឋានមានសិទ្ធិអំណាចក្នុងការសម្រេចតែងតាំងមន្ត្រីនៅក្នុងមូលដ្ឋានរបស់ខ្លួន មិនមែនមន្ត្រីផ្សេងជាអ្នកមានសិទ្ធិធ្វើបែបនេះទេ។
ពាក់ព័ន្ធនឹងការឲ្យខ្ចីប្រាក់តាមអនឡាញ ដែលអាជ្ញាធរធ្លាប់បានហាមប្រាមពីមុននោះ លោក ស សុខា បានបញ្ជាក់ថា អាជ្ញាធរត្រូវបន្តទប់ស្កាត់ការផ្ដល់កម្ចីខុសច្បាប់នេះ ដែលខ្លះផ្ដល់ដោយជនបរទេស ហើយកម្ចីបែបនេះតែងមានគំនាបទៅលើអ្នកខ្ចី។
ទំព័រហ្វេសប៊ុករបស់លោកលើកឡើងថា៖ «ឯកឧត្តមបានឲ្យក្រសួងមហាផ្ទៃអប់រំប្រជាពលរដ្ឋ ប្រសិនបើក្រុមដែលឲ្យខ្ចីប្រាក់នោះគឺជាក្រុមដែលខុសច្បាប់ ឬ ក្រុមជនបរទេសដែលផ្ដល់កម្ចីតាមអនឡាញជាដើម គឺកុំសងតែម្ដង។ បើសិនជាមានការរករឿងណាមួយ សូមផ្ដល់ព័ត៌មានដល់សមត្ថកិច្ច»។
យ៉ាងណាក៏ដោយ លោកស្នើឲ្យមានការបែងចែកឲ្យដាច់រវាងការផ្ដល់កម្ចីដែលធ្វើឡើងដោយមីក្រូហិរញ្ញវត្ថុស្របច្បាប់ និងការផ្ដល់កម្ចីរវាងបុគ្គលនិងបុគ្គល ដែលអ្នកខ្ចីត្រូវទៅតាមការព្រមព្រៀងគ្នា និងតាមច្បាប់៕
