ទឹកឃ្មុំដែលសមត្ថកិច្ចសង្ស័យថាបានបន្លំប្រភពដើម នៅខណ្ឌច្បារអំពៅ រាជធានីភ្នំពេញ នៅថ្ងៃទី១២ កុម្ភៈ ២០២៥។ នាយកដ្ឋាននគរបាលប្រឆាំងបទល្មើសសេដ្ឋកិច្ច
នាយកដ្ឋាននគរបាលប្រឆាំងបទល្មើសសេដ្ឋកិច្ច រឹបអូសទឹកឃ្មុំរបស់ក្រុមហ៊ុន Chan Honey Import Export ចំនួន ១៣០ធុង ដែលមានទម្ងន់សរុបជិត ២០តោន ដោយសង្ស័យថាក្រុមហ៊ុននេះបានក្លែងបន្លំប្រភពដើមទំនិញ ដែលជាការរំលោភកម្មសិទ្ធិបញ្ញា។
ការរឹបអូសនេះធ្វើឡើងនៅទីតាំងក្រុមហ៊ុនផ្ទាល់ដែលស្ថិតនៅភូមិតាងៅកណ្តាល សង្កាត់និរោធ ខណ្ឌច្បារអំពៅ រាជធានីភ្នំពេញ កាលពីថ្ងៃទី១២ ខែកុម្ភៈកន្លងទៅ ដែលអនុវត្តដោយកម្លាំងជំនាញការិយាល័យប្រឆាំងបទល្មើសកម្មសិទ្ធិបញ្ញា នៃនាយកដ្ឋាននគរបាលប្រឆាំងបទល្មើសសេដ្ឋកិច្ច ដោយមានវត្តមានលោក ឆាយ ហុង ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ និងមន្រ្តីសាខាអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ រាជធានីភ្នំពេញ។
នាយកដ្ឋាននគរបាលប្រឆាំងបទល្មើសសេដ្ឋកិច្ចបានអះអាងថា ការចុះរឹបអូសនេះគឺដោយសារតែមានការ«សង្ស័យធ្វើការនាំចូល ស្តុកទុកទឹកឃ្មុំក្លែងបន្លំប្រភពដើមទំនិញ»។
នាយកដ្ឋានដដែលបន្តថា៖ «ដោយមានភាពសង្ស័យចំពោះទឹកឃ្មុំទាំងអស់អាចជាផលិតផលក្លែងបន្លំប្រភព លោកព្រះរាជអាជ្ញារងបានសម្រេចឲ្យសមត្ថកិច្ចធ្វើការដកហូតជាបណ្តោះអាសន្ន ដោយរក្សាទុកនៅក្នុងទីតាំងក្រុមហ៊ុនរួចធ្វើការបិទផ្លុំបេរ ដើម្បីធ្វើការត្រួតពិនិត្យបន្ត និងបាននាំខ្លួនម្ចាស់ទីតាំងជនជាតិវៀតណាម រួមនឹងបុគ្គលពាក់ព័ន្ធទៅសាកសួរបំភ្លឺ នៅនាយកដ្ឋាននគរបាលប្រឆាំងបទល្មើសសេដ្ឋកិច្ច ដើម្បីបន្តនីតិវិធី។
ទោះបីមិនទាន់មានការបញ្ជាក់ផ្លូវការថា ក្រុមហ៊ុននេះពិតជាបានរំលោភទៅលើកម្មសិទ្ធិបញ្ញាឬយ៉ាងណាក៏ដោយ សមត្ថកិច្ចស្នើដល់ប្រជាពលរដ្ឋឲ្យគោរពច្បាប់ទាំងដើម្បីលើកកម្ពស់កិតិ្តយស កេរ្តិ៍ឈ្មោះរបស់កម្ពុជា ក៏ដូចជាទំនុកចិត្តពីអ្នកវិនិយោគទុន។ នាយកដ្ឋានដដែលក៏បានស្នើឲ្យសាធារណជនរាយការណ៍ទៅសមត្ថកិច្ចករណីឃើញ ឬ សង្ស័យពីការស្តុកទុកទំនិញក្លែងបន្លំប្រភព។
យោងតាមគេហទំព័រចុះបញ្ជីពាណិជ្ជកម្មរបស់ក្រសួងពាណិជ្ជកម្ម ក្រុមហ៊ុន Chan Honey Import Export បានចុះបញ្ជីនៅក្រសួងនៅចុងឆ្នាំ២០២១ ដើម្បីផលិតផលិតផលសត្វ ការចិញ្ចឹមនិងផលិតកម្មឃ្មុំ។ ប៉ុន្តែ គោលបំណងរបស់ក្រុមហ៊ុននេះត្រូវបានកែប្រែទៅលើសេវាផ្សេងៗជាបន្តបន្ទាប់៕
