ព្រះករុណា ព្រះបាទសម្តេចព្រះបរមនាថ នរោត្តម សីហមុនី ទ្រង់សម្ពោធមហាកុដិ សម្តេចព្រះសង្ឃរាជ ជួន ណាត និងវិទ្យាស្ថានស្រាវជ្រាវ និងអភិរក្សសាស្រ្តាស្លឹករឹតខ្មែរ នៅវត្តឧណ្ណាលោម នៅថ្ងៃទី១៧ ខែកុម្ភៈ។ FN
ព្រះមហាក្សត្រទ្រង់គូសបញ្ជាក់ទីតួនាទីដ៏សំខាន់របស់វត្តអារាមនៅក្នុងសង្គមខ្មែរ ដែលមិនអាចកាត់ផ្ដាច់ពីគ្នាបានរវាងជីវភាពប្រចាំថ្ងៃរបស់ប្រជាពលរដ្ឋ និង ការអភិវឌ្ឍសង្គមជាតិ។
ព្រះករុណា ព្រះបាទសម្តេចព្រះបរមនាថ នរោត្តម សីហមុនី មានព្រះរាជឱង្ការដូច្នេះនៅក្នុងព្រះរាជពិធីសម្ពោធមហាកុដិសម្តេចព្រះសង្ឃរាជ ជួន ណាត និងវិទ្យាស្ថានស្រាវជ្រាវ និងអភិរក្សសាស្រ្តាស្លឹករឹតខ្មែរ ព្រមទាំងសមិទ្ធផលនានា ស្ថិតក្នុងវត្តឧណ្ណាលោម នៅព្រឹកថ្ងៃទី១៧ ខែកុម្ភៈនេះ។
ព្រះអង្គបានមានព្រះរាជឱង្ការថា វត្តអារាមគឺជាទីបណ្ដុះនូវព្រះធម៌របស់ព្រះសម្មាសម្ពុទ្ធ ហើយក៏ជាកន្លែងដែលបានផ្តល់កំណើតដល់វចនានុក្រមខ្មែរ តាមរយៈការលះបង់ដ៏ធំធេងរបស់សម្តេចព្រះសង្ឃរាជ ជួន ណាត ពេញមួយជីវិតរបស់ព្រះអង្គ។
ព្រះអង្គមានព្រះរាជឱង្ការបន្តថា វត្តអារាមបានក្លាយទៅជាចលករមួយដែលមិនអាចកាត់ផ្តាច់ចេញពីគ្នារវាងដំណើរជីវិតប្រជាពលរដ្ឋខ្មែរប្រចាំថ្ងៃ និងការអភិវឌ្ឍសង្គមជាតិ ដែលធ្វើឲ្យវត្តអារាម និងសង្គមគឺតែមួយ។
តាំងពីសម័យបុរាណរហូតដល់បច្ចុប្បន្ន វត្តអារាមរបស់ព្រះពុទ្ធសាសនាខ្មែរបានរួមវិភាគទានដ៏ សំខាន់ដល់សង្គម ដូចជាការជំរុញ បណ្ដុះសីលធម៌ គុណធម៌ ដែលជាផ្នែកមួយនៃពុទ្ធចរិយាសាស្ត្រ ធ្វើឱ្យសង្គមខ្មែរមានសុខដុមនីយកម្មទាំងសាសនា និងសង្គម។
វត្តអារាមខ្មែរ បានក្លាយទៅជាទីកន្លែងអប់រំទាំងផ្លូវកាយ ផ្លូវចិត្ត កសាងធនធានមនុស្សឱ្យមានចំណេះដឹងគ្រប់បែបយ៉ាង។
ព្រះអង្គមានព្រះរាជឱង្ការដូច្នេះថា៖ «វត្តអារាមខ្មែរ គឺជាឃ្លាំងសម្រាប់រក្សាទុកនូវមត៌កវប្បធម៌ ប្រពៃណី ចំណេះដឹងដ៏សំបូរបែប ដែលផ្តល់គុណតម្លៃសម្រាប់ការសិក្សាស្រាវជ្រាវមិនចេះរីងស្ងួតឡើយ។ វត្តអារាមខ្មែរ គឺជាទីកន្លែងដ៏ទូលាយក្នុងការបញ្ជ្រាបនិងថែរក្សាអត្តសញ្ញាណ ព្រលឹងជាតិ ដ៏សំខាន់តាំងតែពីបរមបុរាណដរាបរៀងមក»។
វត្តអារាមជួយផ្តល់កន្លែងស្នាក់នៅ បួសរៀនសូត្រចំណេះដឹងទូទៅដល់អ្នកដែលមានការខ្វះខាត ដែលក្នុងចំណោមនោះមានមួយចំនួនបានក្លាយទៅជាថ្នាក់ដឹកនាំគ្រប់ជាន់ថ្នាក់ក្នុងការបម្រើរដ្ឋ។ នេះជាព្រះអង្គមានព្រះរាជឱង្ការរបស់ព្រះអង្គ។
ព្រះករុណាទ្រង់ក៏បានកោតសរសើរដល់ថ្នាក់ដឹកនាំកម្ពុជា រួមមានលោក ហ៊ុន សែន ប្រធានព្រឹទ្ធសភា ដែលបានធ្វើឲ្យព្រះពុទ្ធសាសនា និងវត្តអារាមខ្មែរមានព្រលឹងរស់ឡើងវិញ។
ព្រះអង្គក៏បានលើកឡើងពីគោលនយោបាយសមស្របរបស់រដ្ឋាភិបាលដឹកនាំដោយលោកនាយករដ្ឋមន្ត្រី ហ៊ុន ម៉ាណែត ដែលធ្វើឲ្យសង្គមរីកចម្រើន និងមានស្ថិរភាព ជាពិសេសនោះគឺនិងមិនអាចមានបុគ្គលណាប្រមាថ ឬ ប្រទូសរ៉ាយចំពោះព្រះពុទ្ធសាសនាឡើយ៕
