លោក ឆាយ រិទ្ធីសែន រដ្ឋមន្ត្រីក្រសួងអភិវឌ្ឍន៍ជនបទ និងលោកស្រី បាន ស្រីមុំ អភិបាលខេត្ដប៉ៃលិន។ រូបថត សហការី
ខេត្ដប៉ៃលិន៖ កាលពីថ្ងៃទី១៨ ខែកុម្ភៈ ប៉ៃលិនត្រូវបានប្រកាសជាផ្លូវការថាជាខេត្តបញ្ចប់ការបន្ទោបង់ពាសវាលពាសកាល (ODF) ដែលជាព្រឹត្តិការណ៍ដ៏សំខាន់មួយក្នុងកិច្ចខិតខំប្រឹងប្រែងផ្នែកអនាម័យ និងសុខភាពសាធារណៈរបស់កម្ពុជា។
លោក ឆាយ រិទ្ធីសែន រដ្ឋមន្ត្រីក្រសួងអភិវឌ្ឍន៍ជនបទ បានថ្លែងថា៖ «សមិទ្ធផលនៃស្ថានភាព ODF នៅប៉ៃលិន គឺជាសក្ខីភាពមួយបង្ហាញពីអំណាចនៃការចូលរួមរបស់សហគមន៍ និងកិច្ចសហប្រតិបត្តិការអន្តរជាតិ។ នេះតំណាងឱ្យជំហានដ៏សំខាន់មួយឆ្ពោះទៅរកការកែលម្អសុខភាពសាធារណៈ កាត់បន្ថយការឆ្លងជំងឺ បរិស្ថានស្អាត និងមានសុខភាពល្អសម្រាប់អ្នករស់នៅទាំងអស់»។
យោងតាមក្រសួងអភិវឌ្ឍន៍ជនបទ ដែលដកស្រង់សម្តីអភិបាលខេត្តប៉ៃលិន លោកស្រី បាន ស្រីមុំ បានឱ្យដឹងថា ខេត្តប៉ៃលិន មានប្រជាពលរដ្ឋសរុបចំនួន ១៨១១៣ គ្រួសារ ដែលបច្ចុប្បន្នមានបង្គន់អនាម័យប្រើប្រាស់ទាំងអស់។
ក្នុងនោះ ១៧១៤៤ គ្រួសារ (៩៥%) មានបង្គន់អនាម័យឯកជន ខណៈ ៩៦៩ គ្រួសារ (៥%) ប្រើប្រាស់ឧបករណ៍ប្រើប្រាស់រួមគ្នា។
លោកស្រីបានឱ្យដឹងថា៖ «ទីក្រុងចំនួនពីររបស់ខេត្ត និងឃុំ និងស្រុកទាំងប្រាំបី ទទួលបាន ODF ពេញលេញ។ ក្នុងចំណោមភូមិចំនួន ៩៣ មាន ៦០ ទទួលបាន ODF (៦១%) ខណៈដែល ៣៨ បានឈានទៅស្ថានភាព ODF Plus (៣៩%)»។
គម្រោងភូមិសន្តិភាព ដែលផ្តល់មូលនិធិដោយសាធារណរដ្ឋកូរ៉េ តាមរយៈ KOICA បានដើរតួនាទីយ៉ាងសំខាន់ក្នុងសមិទ្ធផល ODF របស់ខេត្តប៉ៃលិន។ រូបថត សហការី
លោកស្រី ស្រីមុំ បានលើកឡើងពីសមិទ្ធផលអភិវឌ្ឍន៍ជនបទរបស់ខេត្ត រួមទាំងការកែលម្អការផ្គត់ផ្គង់ទឹកស្អាត ការអប់រំសុខភាព ហេដ្ឋារចនាសម្ព័ន្ធផ្លូវជនបទ និងឱកាសអាជីវកម្ម។
បច្ចុប្បន្ននេះ ៧៩,៥% នៃភូមិក្នុងខេត្តប៉ៃលិន មានទឹកស្អាតប្រើប្រាស់ គាំទ្រដល់កិច្ចខិតខំប្រឹងប្រែងលើកកម្ពស់សុខភាពសាធារណៈ និងអនាម័យ។
កម្មវិធីនេះបានលើកឡើងពីភាពជោគជ័យនៃគម្រោងភូមិសន្តិភាព ជាគំនិតផ្តួចផ្តើមដ៏សំខាន់មួយក្នុងការកែលម្អការអនុវត្តអនាម័យ និងការផ្តល់បង្គន់អនាម័យសម្រាប់គ្រួសារទាំងអស់ក្នុងខេត្ត។
គម្រោងភូមិសន្តិភាព ដែលផ្តល់មូលនិធិដោយសាធារណរដ្ឋកូរ៉េ តាមរយៈ KOICA បានដើរតួនាទីយ៉ាងសំខាន់ក្នុងសមិទ្ធផល ODF របស់ខេត្តប៉ៃលិន។
យោងតាម KOICA បានឱ្យដឹងថា៖ «គម្រោងនេះរួមមានការសាងសង់បង្គន់សាធារណៈនៅក្នុងសាលារៀន និងមណ្ឌលសុខភាព ការគាំទ្រយុទ្ធនាការអប់រំអនាម័យ និងការប្រមូលកិច្ចខិតខំប្រឹងប្រែងសហគមន៍ដើម្បីលើកកម្ពស់ការអនុវត្តអនាម័យកាន់តែប្រសើរឡើង" នេះបើយោងតាម KOICA»។
លោក រិទ្ធី សែន បានបន្ដថា៖ «យើងបាននិងកំពុងអនុវត្តផែនការសកម្មភាពជាតិស្តីពីការផ្គត់ផ្គង់ទឹកស្អាត អនាម័យជនបទ សម្រេចបានអត្រាគ្របដណ្តប់ទឹក និងអនាម័យទូទាំងប្រទេសប្រមាណ ៨៨,៨០% ដែលក្នុងនោះមានអត្រាគ្របដណ្តប់ទឹក ៨៦,០៩% និងអត្រាគ្របដណ្តប់អនាម័យ ៩១,៤៧%»។
នៅឆ្នាំ២០៣០ គេរំពឹងថាប្រជាពលរដ្ឋទាំងអស់នៅទូទាំងប្រទេសនឹងទទួលបានទឹកស្អាតគ្រប់គ្រាន់ សម្រេចបាននូវការគ្របដណ្តប់អនាម័យ១០០% និងរស់នៅក្នុងបរិស្ថានប្រកបដោយនិរន្តរភាព។
ប៉ៃលិន គឺជាខេត្តទី១៦ ក្នុងប្រទេសកម្ពុជា ដែលសម្រេចបាននូវឋានៈ ODF ដោយចូលរួមជាមួយរាជធានីភ្នំពេញ ស្វាយរៀង ព្រៃវែង កណ្តាល កំពង់ស្ពឺ កំពង់ឆ្នាំង កែប ព្រះសីហនុ កំពង់ចាម រតនគិរី សៀមរាប ត្បូងឃ្មុំ តាកែវ ស្ទឹងត្រែង និងកំពង់ធំ ក្នុងសមិទ្ធផលសុខភាពសាធារណៈនេះ៕
