អភិបាលខេត្ដឧត្ដរមានជ័យ លោក មាន ចាន់យ៉ាដា ថតរូបជាមួយក្រុមការងាររដ្ឋបាលខេត្ដ និងនាយទាហានកម្ពុជាឈរជើងនៅប្រាសាទតាមាន់។ រូបថត សហការី
ឧត្ដរមានជ័យ៖ អភិបាលខេត្ដឧត្ដរមានជ័យ លោក មាន ចាន់យ៉ាដា បានឱ្យដឹងនៅថ្ងៃទី១៨ ខែកុម្ភៈថា ស្ថានភាពនៅប្រាសាទតាមាន់មានសភាពធម្មតា និងបានលើកទឹកចិត្ដឱ្យប្រជាពលរដ្ឋបន្ដទៅទស្សនាប្រាសាទដូនតាខ្មែរ។
បានឱ្យដឹងថា៖ «នៅតំបន់ប្រាសាទតាមាន់មានសភាពការណ៍ប្រក្រតីជាធម្មតា។ សូមអញ្ជើញបងប្អូនមកទស្សនាជាក់ស្តែងប្រាសាទបុរាណកេរ្តិ៍តំណែលដូនតាយើង»។
លោក ចាន់យ៉ាដា បាននិយាយនៅក្នុងវីដេអូឃ្លីបជាងមួយនាទីថា លោកបានដឹកនាំប្រតិភូក្រុមការងាររដ្ឋបាលខេត្ដឡើងមកលើតួប្រាសាទតាមាន់របស់កម្ពុជា និងបានបញ្ជាក់ថា នៅវេលាម៉ោង ៣:១០រសៀល ស្ថានភាពនៅលើប្រសាទតាមាន់មានភាពប្រក្រតី។
ប្រាសាទតាមាន់ធំ មានទីតាំងស្ដិតនៅលើភ្នំដងរែក ភូមិតាមាន់ឃុំគោកមន ស្រុកបន្ទាយអំពិល ខេត្តឧត្តរមានជ័យ ដែលមានចង្ងាយ៤៨គីឡូម៉ែត្រពីទីរួមក្រុងសំរោង។
លោកអភិបាលខេត្ដបានថ្លែងទៅកាន់នាយទាហានថៃថា៖ «យើងមានអី យើងជជែកគ្នាដើម្បីសេចក្ដីសុខប្រទេសយើងទាំងពីរ។ គ្មាននរណាមករំលោភបំពានលើទឹកដីនៃប្រទេសអ្នកណាទេ។ អ្វីៗទុកឱ្យគណកម្មការព្រំដែននៃប្រទេសទាំងពីរធ្វើការ»។
ហេតុការណ៍ក្ដៅស្លឹកត្រចៀកដាក់គ្នានេះ គឺភាគីទាហានថៃធ្វើការហាមការច្រៀងចម្រៀងគោរពទង់ជាតិរបស់ប្រជាពលរដ្ឋខ្មែឬកាលពីថ្ងៃទី១៣ ខែកុម្ភៈ នៅលើប្រាង្គប្រាសាទតាមាន់។
យោងតាម The Nation របស់ថៃ បានផ្សាយថា កងយោធពលខេមរភូមិន្ទទី២ របស់ថៃ នៅថ្ងៃអង្គារបានផ្ញើលិខិតតវ៉ាមួយច្បាប់មកកាន់យោធភូមិភាគទី៤របស់កម្ពុជា ចំពោះអត្ដចរឹតមិនសមរម្យរបស់នាយទាហាន និងប្រជាជនកម្ពុជា នៅប្រាសាទតាមាន់ធំ ដោយបានអះអាងថា វាជាប្រាសាទបុរាណខ្មែរស្ថិតក្នុងទឹកដីនៃខេត្ដសុរិនរបស់ថៃ។
លោកអភិបាលខេត្ដជជែកជាមួយទាហានថៃនៅប្រាសាទតាមាន់ថ្ងៃទី១៨ ខែកុម្ភៈ។ រូបថត សហការី
សារព័ត៌មានថៃដដែលបានបន្ដថា កងយោធពលខេមរភូមិន្ទទី២ បានទទូចឱ្យអាជ្ញាធរកម្ពុជា ណែនាំភ្ញៀវទេសចរដែលមកប្រាសាទតាមាន់ធំ គោរពច្បាប់ និងជៀសវាងនូវទង្វើមិនសមរម្យណាមួយ ក្នុងគោលបំណងរក្សាទំនាក់ទំនងជាវិជ្ជមានរវាងប្រទេសថៃ និងកម្ពុជា។
យោងតាមស្នងការដ្ឋាននគរបាលខេត្តឧត្តរមានជ័យ បានឱ្យដឹងថា ថ្ងៃទី១៨ ខែ កុម្ភៈ ឆ្នាំ២០២៥ កម្លាំងវរសេនាតូចនគរបាលការពារព្រំដែនគោក៧០២-៩០៥ សហការជាមួយកម្លាំងយោធាល្បាតត្រួតពិនិត្យបង្គោលសីមា តាមបណ្តោយព្រំដែន កម្ពុជា-ថៃ ដើម្បីទប់ស្កាត់ការលួចឆ្លងដែនខុសច្បាប់ឬបទល្មើសផ្សេងៗ ជាពិសេស តាមដានក្ដាប់ការប្រែប្រួលសភាពការណ៍តាមព្រំដែន៕
