លោក ហ៊ុន ម៉ាណែត ថ្លែងក្នុងពិធីចែកសញ្ញាបត្រដល់និស្សិតនៃសាកលវិទ្យាល័យអាស៊ី អឺរ៉ុប នៅព្រឹកថ្ងៃទី១៩ ខែកុម្ភៈ។ STPM
លោកនាយករដ្ឋមន្ត្រី ហ៊ុន ម៉ាណែត ថ្លែងថា ការដាក់រូបវិមានឈ្នះ ឈ្នះ នៅក្របសៀវភៅជំនួយប្រវត្តិសាស្ត្រថ្នាក់ទី៦ មិនមែនមានន័យថាឲ្យកម្ពុជាដឹងគុណប្រទេសជិតខាងនោះទេ ហើយក៏មិនមានការកែប្រែប្រវត្តិសាស្ត្រនោះដែរ។
ថ្លែងក្នុងពិធីចែកសញ្ញាបត្រដល់និស្សិតនៃសាកលវិទ្យាល័យអាស៊ី អឺរ៉ុប នៅព្រឹកថ្ងៃទី១៩ ខែកុម្ភៈនេះ លោកបញ្ជាក់ថា ខ្លឹមសារនៅក្នុងសៀវភៅនេះមិនមានការកែប្រែប្រវត្តិសាស្ត្រ ហើយរូបវិមានឈ្នះ ឈ្នះ ដែលមានទ្រង់ទ្រាយប្រហាក់ប្រហែលនឹងវិមាននៅប្រទេសផ្សេងៗរួមទាំងនៅវៀតណាម ក៏មិនមែនដើម្បីបង្ហាញពីការដឹងគុណវៀតណាមនោះទេ។
កាលពីពេលថ្មីៗនេះ សាធារណជនជាច្រើនបានបញ្ចេញមតិយោបល់មិនយល់ស្របទៅនឹងការដាក់រូបវិមានឈ្នះ ឈ្នះ ជំនួសឲ្យសម្បត្តិវប្បធម៌ខ្មែរផ្សេងៗ នៅលើក្របមុខសៀវភៅប្រវត្តិសាស្ត្រថ្នាក់ទី៦ ដែលមានចំណងជើងថា «ខ្មែរ និង ដំណើរឆ្ពោះទៅកាន់វិបុលភាព»។
លោកថា អ្នកដែលបញ្ចេញមតិយោបល់នៅលើបណ្ដាញសង្គម ភាគច្រើនមិនបានកាន់ អានសៀវភៅនេះទេ ហើយបញ្ហាពីរដែលត្រូវបានចោទឡើងនៅក្នុងគឺការសង្ស័យទៅលើខ្លឹមសារ និងរូបវិមានឈ្នះ ឈ្នះនៅលើក្របនេះ។
លោកថ្លែងដូច្នេះថា៖ «ឲ្យតែមានរូបវិមានឈ្នះ ឈ្នះ នាំគ្នាគិតថា អាហ្នឹងជាស្តូបវៀតណាម។ ហេតុនេះហើយបានជាគេគិតថា ឃើញទេយកសៀវភៅនេះទៅដឹងគុណវៀតណាម ព្រោះសូម្បីតែគម្របសៀវភៅក៏ដាក់ស្តូបវៀតណាមផងដែរ»។
លោកថា ការយល់ច្រឡំលើរឿងនេះ អាចធ្វើឲ្យខ្មែរឈ្លោះគ្នារឿងប្រវត្តិសាស្ត្រ ខណៈដែលប្រទេសជិតខាងគេមិនបានដឹងអ្វីផង។ លោកស្នើឲ្យក្រសួងអប់រំបង្ហោះសៀវភៅនេះតាមឌីជីថល។
លោកថា៖ «បើមានជាឌីជីថល បង្ហោះជាឌីជីថលទៅ ឲ្យគាត់មើលតែម្ដង ថាតើដូចគេនិយាយអត់ ដើម្បីឲ្យគាត់មើលខ្លឹមសារ តើខ្លឹមសារមានជំពាក់ជំពិនអីជាមួយនឹងការតម្រូវឲ្យកម្ពុជាដឹងគុណអ្នកណា»។
លោករៀបរាប់ថា សៀវភៅនេះនិយាយអំពីការរំដោះប្រទេសពីអាណានិគមនិយមបារាំង របបប្រល័យពូជសាសន៍ និងការកសាងប្រទេសក្រោយសង្គ្រាម។
លោកថ្លែងថា៖ «អ្នកដែលចោទថាយើងសរសេរសៀវភៅនេះដើម្បីដឹងគុណវៀតណាម គឺអត់មានទេ។ ក្នុងសៀវភៅនេះមិនមាននិយាយច្រើនពីវៀតណាម ក្រៅពីទំព័រ ៤១ មួយបន្ទាត់ ទំព័រ ៤២។ តែមួយបន្ទាត់ទេ ដែលនិយាយអំពីរណសិរ្សសាមគ្គីសង្គ្រោះជាតិកម្ពុជា សហការជាមួយកងទ័ពស្ម័គ្រចិត្តវៀតណាម ដើម្បីវាយរំលំរបបប្រល័យពូជសាសន៍ ប៉ុល ពត ជាមួយនឹងការស្ដារឡើងវិញក្រោយពីពេលនោះ ដែលជាតថភាពជាក់ស្ដែង ហើយក្រៅពីនោះនិយាយពីខ្មែរទាំងអស់ រួមមានស្នាដៃរបស់បុព្វបុរសខ្មែរជំនាន់សម្ដេចតា ក្រោយមកខ្មែររួមគ្នារកសន្តិភាព បូកជាមួយទិដ្ឋភាពឈឺចាប់មួយចំនួនដែលយើងឆ្លងកាត់ដើម្បីកុំឲ្យឈឺចាប់ឡើងវិញ។ ដូច្នេះ និយាយពីខ្មែរទាំងអស់»។
លោក ហ៊ុន ម៉ាណែត ប្រាប់ឲ្យក្រសួងអប់រំបង្ហោះសៀវភៅនេះនៅលើអនឡាញ ឲ្យបានឆាប់ដើម្បីឲ្យសាធារណជនបានអាននិងដឹងពីខ្លឹមសារនៅខាងក្នុង៕
