សិក្ខាសាលា ក្រោមប្រធានបទ «មាគ៌ាឆ្ពោះទៅការបង្កើនពិពិធកម្មសេដ្ឋកិច្ចកម្ពុជា៖ បទពិសោធន៍អន្តរជាតិ» រៀបចំនៅថ្ងៃទី២០ ខែកុម្ភៈ។ ស្ថានទូតអូស្ត្រាលី
រដ្ឋាភិបាលអូស្ត្រាលីបញ្ជាក់ពីការប្តេជ្ញាដើម្បីបង្កើនកិច្ចសន្ទនាជាយុទ្ធសាស្ត្រនិងគាំទ្រកម្ពុជាឲ្យសម្រេចបាននូវកំណើននិងការអភិវឌ្ឍសេដ្ឋកិច្ចប្រកបដោយនិរន្តរភាព បរិយាបន្ន និងភាពធន់។ ការគាំទ្រនេះរួមមានទាំងការរៀបចំសិក្ខាសាលាស្ដីពីជំនាញពិពិធកម្មសេដ្ឋកិច្ចផងដែរ។
នៅក្នុងសេចក្ដីប្រកាសព័ត៌មានរួបនៅថ្ងៃទី២០ ខែកុម្ភៈនេះ កម្ពុជានិងអូស្រ្តាលីរៀបចំសិក្ខាសាលា ក្រោមប្រធានបទ «មាគ៌ាឆ្ពោះទៅការបង្កើនពិពិធកម្មសេដ្ឋកិច្ចកម្ពុជា៖ បទពិសោធន៍អន្តរជាតិ» ចូលរួមដោយ លោកសាស្រ្តាចារ្យ Ricardo Hausmann នាយកស្ថាប័នស្រាវជ្រាវ Growth Lab នៃសាកលវិទ្យាល័យដ៏ល្បីរបស់សហរដ្ឋអាមេរិកគឺសាកលវិទ្យាល័យ Harvard។
យោងតាមទស្សនទានរបស់លោកសាស្រ្តាចារ្យ Hausmann អំពីការវិភាគលើកំណើន (Growth Diagnostics)សេដ្ឋកិច្ចដែលមានពិពិធភាព(Economic Complexity ) និងលំហផលិតផល (Product Space) ការសម្រេចបានកំណើនសេដ្ឋកិច្ចអាស្រ័យលើផលិតផលចម្រុះទំនើបដែលប្រទេសមួយអាចផលិត និងនាំចេញបាន។
សិក្ខាសាលានេះប្រព្រឹត្តទៅដោយតមានវត្តមានរបស់លោក ស៊ុន ចាន់ថុល ឧបនាយករដ្ឋមន្រ្តី និងអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា លោក វង្សី វិស្សុត ឧបនាយករដ្ឋមន្រ្តីប្រចាំការ ទទួលបន្ទុកទីស្តីការគណៈរដ្ឋមន្រ្តី និងលោក ដេរីក យីប ឯកអគ្គរដ្ឋទូតអូស្ត្រាលីប្រចាំកម្ពុជា។
លោក ស៊ុន ចាន់ថុល បានថ្លែងនៅក្នុងសិក្ខាសាលានេះថា៖ «រាជរដ្ឋាភិបាលកម្ពុជាបាននិងកំពុងអនុវត្តវិធានការគោលដៅដើម្បីទាក់ទាញការវិនិយោគផ្ទាល់ពីបរទេសដែលមានគុណភាពខ្ពស់ ក៏ដូចជាពង្រីកសមត្ថភាពឧស្សាហកម្មក្នុងប្រទេស និងបង្កើនប្រសិទ្ធភាពនៃសមាហរណកម្មខ្សែច្រវាក់តម្លៃសកល (Global Value Chain)។ រាជរដ្ឋាភិបាលមានការសម្រេចចិត្តខ្ពស់ក្នុងការបង្កើតបរិការណ៍សេដ្ឋកិច្ចមួយ ដែលជំរុញភាពច្នៃប្រឌិត គាំទ្រផ្នែកសហគ្រិនភាព និងជំរុញភាពធន់នៃសេដ្ឋកិច្ចរយៈពេលវែង»។
លោក ដេរីក យីប លើកឡើងថា៖ «អូស្រ្តាលីមានសេចក្តីរីករាយដែលបានសហការជាមួយកម្ពុជា ក្នុងការរៀបចំយុទ្ធសាស្រ្តកំណើនថ្មីមួយ សម្រាប់កម្ពុជាក្រោយពេលចាកចេញពីប្រទេសដែលមានការអភិវឌ្ឍតិចតួច។ សិក្ខាសាលានេះគឺជាផ្នែកមួយដ៏សំខាន់នៃកិច្ចសហការរបស់យើងជាមួយក្រសួងពាក់ព័ន្ធរបស់កម្ពុជាដើម្បីសម្រេចបានគោលដៅអភិវឌ្ឍអនាគតជាចម្បងរបស់កម្ពុជា»។
លោកបន្តថា៖ «អូស្ត្រាលីប្តេជ្ញាគាំទ្រកម្ពុជា ក្នុងការសម្រេចបាននូវកំណើនប្រកបដោយភាពធន់ បរិយាបន្ន និងនិរន្តរភាព»។
សិក្ខាសាលាជាន់ខ្ពស់នេះរៀបចំឡើងដោយកម្មវិធីភាពជាដៃគូកម្ពុជាអូស្ត្រាលីសម្រាប់ការអភិវឌ្ឍសេដ្ឋកិច្ចប្រកបដោយភាពធន់ (CAPRED)។
លោកសាស្រ្តាចារ្យ Ricardo Hausmann គឺជាស្ថាបនិក និងជានាយកស្ថាប័នស្រាវជ្រាវGrowth Labនៃសាកលវិទ្យាល័យHarvard និងជាសាស្រ្តាចារ្យRafik Haririបង្រៀនលើការអនុវត្តសេដ្ឋកិច្ចនយោបាយអន្តរជាតិនៅសាកលវិទ្យាល័យHarvard Kennedy ។ លោកជាអ្នកផ្ដួចផ្ដើមបង្កើតវិធីសាស្រ្តដើម្បីធ្វើការវិនិច្ឆ័យលើកំណើនសេដ្ឋ-កិច្ច (Growth Diagnostic) និងសេដ្ឋកិច្ចដែលមានពិពិធភាព(Economic Complexity ) រួមទាំងយុទ្វសាស្រ្តសេដ្ឋកិច្ចដទៃទៀត ដូចជាDark Matter, Original Sin, និង Self-discovery៕
