អ្នកស្រី ពេជ ម៉ារ៉ែន (ស្ដាំ) និងឈ្មោះ ពេជ ចន្ទលីដា ដែលត្រូវបានដោះលែង។ ហ្វេសប៊ុក
ឧត្តមក្រុមប្រឹក្សានៃអង្គចៅក្រមទម្លាយករណីល្មើសច្បាប់របស់ប្រធានតុលាការខេត្តតាកែវ អ្នកស្រី ពេជ ម៉ារ៉ែន ដែលបានដោះលែងមុនពេលកំណត់សម្រាប់ទណ្ឌិតជាប់ទោស ១១ឆ្នាំ ករណីច្របាច់កសម្លាប់គូស្នេហ៍នៅក្នុងបន្ទប់ជួល។
ឧត្តមក្រុមប្រឹក្សានៃអង្គចៅក្រមទម្លាយករណីនេះក្រោយពេលអ្នកស្រី ពេជ ម៉ារ៉ែន បានបង្ហាញការមិនពេញចិត្តចំពោះសេចក្ដីសម្រេចរបស់ក្រុមប្រឹក្សាវិន័យនៃឧត្តមក្រុមប្រឹក្សានៃអង្គចៅក្រម ដែលបានសម្រេចផ្ទេរអ្នកស្រីចេញពីប្រធានតុលាការខេត្តតាកែវ ទៅធ្វើជាអនុប្រធាននៃតុលាការខេត្តផ្សេង កាលពីថ្ងៃទី១៩ ខែកុម្ភៈ។
បើតាមសេចក្ដីប្រកាសព័ត៌មានរបស់ឧត្តមក្រុមប្រឹក្សានៃអង្គចៅក្រម ដែលផ្សព្វផ្សាយនៅថ្ងៃទី២០ ខែកុម្ភៈ លោកស្រី ពេជ ម៉ារ៉ែន បានត្អូញត្អែរនៅលើហ្វេសប៊ុកនៅថ្ងៃទី១៩ កុម្ភៈ ដោយសរសេរថា «ខ្លួនមានកំហុសបន្តិចបន្តួច បែរជាត្រូវជាប់ទោសអូសដំណើរដោយគ្មានការលើកលែង ដោយគ្មានការសន្ដោស និងគ្មានការទុកឱកាសឲ្យខ្លួនជាដើម ទោះបីខ្លួនខិតខំកែលម្អហើយក៏ដោយ» ដែលការត្អូញត្អែរនេះទំនងជាសំដៅទៅលើការសម្រេចរបស់ក្រុមប្រឹក្សាវិន័យ។
ឧត្តមក្រុមប្រឹក្សានៃអង្គចៅក្រមពន្យល់ថា លោកស្រី ពេជ ម៉ារ៉ែន បានដោះលែងទណ្ឌិតដែលបានប្រព្រឹត្តបទឧក្រិដ្ឋ «ឃាតកម្ម» ដែលត្រូវបានកាត់ទោសដាក់ពន្ធនាគារកំណត់ ១១ឆ្នាំ។
ការដោះលែងនេះធ្វើឡើងនៅពេលទណ្ឌិតរូបនេះអនុវត្តទោសបានតែជាង ៥ ឆ្នាំប៉ុណ្ណោះ ហើយនៅសល់ ៧ឆ្នាំ ៤ ខែទៀត ពោលគឺមិនទាន់គ្រប់លក្ខខណ្ឌ ២ភាគ៣ សម្រាប់ការដោះលែងមុនកាលកំណត់ ដែលអាចស្នើទៅគណៈកម្មការជាតិ។
ការដោះលែងមុនកាលកំណត់សម្រាប់ជនល្មើសប្រព្រឹត្តបទឧក្រិដ្ឋធ្ងន់ធ្ងរបែបនេះ គឺផ្ទុយពីមាត្រា ៥១៣ នៃក្រមនីតិវិធីព្រហ្មទណ្ឌ និងគោលការណ៍នៃការដោះលែងដោយមានលក្ខខណ្ឌដែលគណៈកម្មការជាតិដោះលែងដោយមានលក្ខខណ្ឌរបស់ក្រសួងយុត្តិធម៌បានកំណត់។ នេះជាកំហុសធ្ងន់ធ្ងរក្នុងការអនុវត្តវិជ្ជាជីវៈជាចៅក្រម។ នេះបើតាមឧត្តមក្រុមប្រឹក្សានៃអង្គចៅក្រមដដែល។
ឧត្តមក្រុមប្រឹក្សានៃអង្គចៅក្រមក៏បានបញ្ជាក់ផងដែរថា ការដោះលែងដោយចៅក្រមអាចធ្វើឡើងបានសម្រាប់តែជនជាប់ឃុំបណ្ដោះអាសន្នប៉ុណ្ណោះ ខណៈដែលការដោះលែងទណ្ឌិតដែលកំពុងអនុវត្តទោសណាម្នាក់ អាចធ្វើបានដោយរាជរដ្ឋាភិបាល តាមរយៈសំណើសុំលើកលែងទោសថ្វាយទៅព្រះមហាក្សត្រ។
សេចក្ដីប្រកាសព័ត៌មានបញ្ជាក់ថា៖ «ក្រុមប្រឹក្សាវិន័យបន្តប្រកាន់ខ្ជាប់នូវ គោលជំហរម៉ឺងម៉ាត់ក្នុងការរឹតបន្តឹងវិន័យចំពោះចៅក្រម និងព្រះរាជអាជ្ញាដែលប្រព្រឹត្តខុសច្បាប់ និងខុសក្រមសីលធម៌វិជ្ជាជីវៈ ដើម្បីធានាលើកកម្ពស់ទំនុកចិត្តក្នុងការអនុវត្តច្បាប់របស់តុលាការ ដែលជាការរួមចំណែក យ៉ាងសំខាន់ក្នុងការធានាដល់សន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ដែលជាបំណងប្រាថ្នារបស់ប្រជាពលរដ្ឋ និងសង្គមជាតិ»។
យោងតាមការចុះផ្សាយរបស់សារព័ត៌មាននានា ជនល្មើសដែលត្រូវបានអ្នកស្រី ពេជ ម៉ារ៉ែន ដោះលែង មានឈ្មោះ សុខ ចន្ទលីដា។
ជនល្មើសរូបនេះត្រូវបានកាត់ទោសដាក់ពន្ធនាគារ ១១ ឆ្នាំពាក់ព័ន្ធការនឹងអំពើឃាតកម្ម សម្លាប់គូស្នេហ៍ដែលជានារីបម្រើសេវាស្រាបៀរនៅផ្ទះសំណាក់មួយកន្លែងនៅក្រុងដូនកែវ ខេត្តតាកែវ កាលពីខែមីនា ឆ្នាំ២០១៩។
ទណ្ឌិតរូបនេះត្រូវបានដោះលែងតាមរយៈការសម្រេចរបស់អ្នកស្រី ពេជ ម៉ារ៉ែន កាលពីថ្ងៃទី៩ ខែមេសា ឆ្នាំ២០២៤។
អ្នកជំនាញផ្នែកច្បាប់មួយរូប បានថ្លែងប្រាប់ភ្នំពេញប៉ុស្តិ៍ថា មិនមាននីតិវិធីណាមួយចែងអំពីការចាប់ជនល្មើសមកអនុវត្តទោសបន្តទៀតទេ នៅពេលដែលការសម្រេចរបស់តុលាការបានចូលជាធរមានរួចហើយ ដូចករណីជនល្មើស សុខ ចន្ទលីដា ជាដើម។ ផ្ទុយទៅវិញ អ្នកដែលត្រូវទទួលខុសត្រូវ គឺអ្នកដែលសម្រេចដោះលែង ដូចក្នុងករណីអ្នកស្រី ពេជ ម៉ារ៉ែន នេះ។
កាលពីពេលថ្មីៗនេះ អ្នកស្រី ពេជ ម៉ារ៉ែន ទទួលបានការកោតសរសើរពីសំណាក់លោកឧបនាយករដ្ឋមន្ត្រី កើត រិទ្ធ រដ្ឋមន្ត្រីក្រសួងយុត្តិធម៌ សម្រាប់ការពន្លឿនការដោះស្រាយរឿងក្ដីនៅតាមតុលាការ ដើម្បីកាត់បន្ថយការកកស្ទះសំណុំរឿង និងកាត់បន្ថយការចង្អៀតណែននៅពន្ធនាគារ៕
