ពលរដ្ឋក្នុងតំបន់ការពារធម្មជាតិនៅខេត្តព្រះវិហារ អាស្រ័យផលអនុផលព្រៃឈើ។ យូសុះ អាប់ឌុលរ៉ាស់ហ៊ីម
ការគ្រប់គ្រងធនធានធម្មជាតិ និងអភិរក្សជីវៈចម្រុះសម្រេចបានលទ្ធផលកាន់តែប្រសើរតាមរយៈការចូលរួមរបស់សហគមន៍តំបន់ការពារធម្មជាតិ ដែលជាយន្តការមួយប្រកបដោយប្រសិទ្ធភាព។ នេះ ជាការលើកឡើងរបស់លោក លោក ខ្វៃ អាទិត្យា អនុរដ្ឋលេខាធិការ និងជាអ្នកនាំពាក្យក្រសួងបរិស្ថាន។
លោកបន្តថា សហគមន៍បែបនេះចូលរួមចំណែកយ៉ាងសំខាន់ ដោយបានជួយទប់ស្កាត់ការបាត់បង់ព្រៃឈើ ការរិចរិលនៃព្រៃឈើ រួមនិងការអភិរក្សធនធានធម្មជាតិ ទាំងការស្តារព្រៃឈើ ដើម្បីបង្កើនគម្របបៃតង ជួយដល់ការអភិវឌ្ឍដោយចីរភាពនៅកម្ពុជា។
លោកថ្លែងប្រាប់ ភ្នំពេញប៉ុស្តិ៍ក្នុងពេលដឹកនាំក្រុមអ្នកសារព័ត៌មានទៅទស្សនាសហគមន៍ទាំងនេះនៅខេត្តភាគខាងជើង កាលពីសប្ដាហ៍មុនថា៖ «ក្រសួងបរិស្ថាន បានជួយសហគមន៍តំបន់ការពារធម្មជាតិ ឱ្យមានឱកាសចូលរួមចំណែកលើកកម្ពស់សិទ្ធិ ក្នុងការគ្រប់គ្រងព្រៃឈើ ផ្តល់អភិបាលកិច្ចនិងក្របខណ្ឌច្បាប់ពេញលេញ ដល់ប្រជាជនមូលដ្ឋាន ក្នុងការទាញយកប្រយោជន៍ផ្នែកសេដ្ឋកិច្ច ប្រកបដោយសមធម៌ ព្រមទាំងការចិញ្ចឹមជីវិត ធានាសន្តិសុខស្បៀង និងបង្កើនចំណូលផ្សេងក្រៅពីការដាក់សម្ពាធលើព្រៃឈើ»។
រហូតមកទល់ពេលនេះ ក្រសួងបរិស្ថានបានសម្របសម្រួលបង្កើតនិងកំពុងធ្វើការជំរុញយុទ្ធនាការ «ពន្លកបៃតង» ជាមួយសហគមន៍ការពារធម្មជាតិ សរុបចំនួន ១៩៣ សហគមន៍។
ក្រសួងបរិស្ថានក៏កំពុងអភិវឌ្ឍន៍ «របៀងគោលដៅលំហែបៃតង» ដោយធ្វើការតភ្ជាប់គោលដៅកម្សាន្តរបស់អ្នកទេសចរ នៅតាមសហគមន៍តំបន់ការពារធម្មជាតិចំនួន៥ នៅលើខ្នងភ្នំគូលែន។
លោកពន្យល់ថា របៀងគោលដៅលំហែបៃតង ផ្តោតលើមានការរៀបចំសម្បទាទេសចរណ៍ ដូចជាការសាងសង់ កន្លែងបោះតង់ស្នាក់នៅ តាមរចនាបថខ្មែរ ការរៀបចំផ្លូវ គោលដៅដើរកម្សាន្ត ភ្ជាប់ពីសហគមន៍មួយទៅសហគមន៍មួយទៀត ដោយថ្មើរជើង ឬអាចជិះម៉ូតូ កង់កម្សាន្ត ហើយសហគមន៍នីមួយៗ អាចផ្តល់សេវាកម្មទេសចរណ៍ ដូចជា ការដឹកជញ្ជូន ម្ហូបអាហារ មគ្គុទេសក៏សហគមន៍ ជាដើម។
លោក អ៊ាង សុផល្លែត រដ្ឋមន្រ្តីក្រសួងបរិស្ថាន កាលពីពេលថ្មីៗកន្លងទៅ បានសាសង់កន្លែងសម្រាកលំហែបៃតងចំនួន ១០កន្លែង និងជួយសាងសង់នៅកន្លែងផ្សេងទៀតជាបន្តបន្ទាប់ ជូនសហគមន៍តំបន់ការពារធម្មជាតិព្រៃធំអន្លង់ធំ ដែលជាសហគមន៍មួយស្ថិតក្នុងរបៀងលំហែបៃតង នៅក្នុងឧទ្យានជាតិព្រះជ័យវរ្ម័ន-នរោត្តម«ភ្នំគូលែន»។
លោកថា ការរៀបចំនេះគឺដើម្បីលើកកម្ពស់ជីវភាពសហគមន៍មូលដ្ឋាន ការអភិរក្សប្រព័ន្ធជីវៈចម្រុះ និងវប្បធម៌ ប្រពៃណី ដែលជាឧត្តមប្រយោជន៍ដល់ប្រជាជនកម្ពុជា៕
