ភ្នំពេញ៖ លោកនាយករដ្ឋមន្ដ្រី ហ៊ុន ម៉ាណែត បានបង្កើតគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (Online Scams) ហៅកាត់ថា (គ.ប.ឆ.ប.) ដោយផ្ដល់អំណាចដល់អាជ្ញាធរបង្ក្រាប និងអនុវត្ដច្បាប់ប្រឆាំងអំពើឆបោកតាមអនឡាញគ្រប់ទម្រង់។
វិធានការនេះត្រូវបានធ្វើឡើងក្រោយកម្ពុជាត្រូវបានចាត់ទុកជាទីតាំងឆបោកមួយដោយអន្ដរជាតិមួយចំនួន ដែលផ្ដោតលើការបង្ក្រាបឧក្រិដ្ឋកម្មបច្ចេកវិទ្យា។
យោងតាមសេចក្ដីសម្រេចរបស់លោកនាយករដ្ឋមន្ដ្រី ចុះហត្ថលេខាកាលពីថ្ងៃទី ២០ ខែកុម្ភៈ ឆ្នាំ២០២៥ បានឱ្យដឹងថា គណកម្មការចំពោះកិច្ចនឹងទទួលខុសត្រូវចំពោះអនុវត្ដ សម្របសម្រួល និងប្រតិបត្ដិការប្រយុទ្ធប្រឆាំងអំពើឆបោកតាមអនឡាញ (online scams)។
គណកម្មការចំពោះកិច្ចមានសមាសភាពអន្ដរក្រសួង អង្គភាព និងរដ្ឋបាលថ្នាក់ក្រោមជាតិ ដែលមានសិទ្ធិអំណាចធ្វើកិច្ចអន្ដរាគមន៍ បើចាំបាច់។
យោងតាមសេចក្ដីសម្រេច បានឱ្យដឹងថា៖ ««គ.ប.ឆ.ប. តាមដាន ត្រួតពិនិត្យ និងវាយតម្លៃការអនុវត្តរបស់ក្រសួង ស្ថាប័ន អង្គភាព រដ្ឋបាលថ្នាក់ក្រោមជាតិ និង សមត្ថកិច្ចដែលពាក់ព័ន្ធក្នុងការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា ធ្វើសហប្រតិបត្តិការជាមួយបណ្តាប្រទេសពាក់ព័ន្ធ ដើម្បីប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា ក៏ដូចជា អនុវត្តភារកិច្ចផ្សេងៗទៀតតាមការចាំបាច់ ដើម្បីធានាប្រសិទ្ធភាពនៃការប្រយុទ្ធប្រឆាំងការឆបោកតាម ប្រព័ន្ធបច្ចេកវិទ្យា»។
គណកម្មការដឹកនាំដោយនាយករដ្ឋមន្ដ្រី ជាប្រធាន អនុប្រធាន ៨រូប ជាឧបនាយករដ្ឋមន្ដ្រីទទួលបន្ទុកកិច្ចការបរទេស សេដ្ឋកិច្ច ការពារជាតិ មហាផ្ទៃ យុត្ដិធម៌ ប្រធានគណកម្មការប្រឆាំងអំពើពុករលួយ (ACU) អនុប្រធានប្រចាំការមួយរូប។
ចំពោះសមាជិក មានរដ្ឋមន្ដ្រីមួយចំនួន អគ្គមេបញ្ជាការកងយោធពលខេមរភូមិន្ទ អគ្គស្នងការនគរបាលជាតិ អគ្គនាយក អគ្គនាយកដ្ឋានអន្តោប្រវេសន៍ អគ្គនាយក អគ្គនាយកដ្ឋានអត្តសញ្ញាណកម្ម អគ្គស្នងការរងនគរបាលជាតិ អគ្គលេខាធិការគណៈកម្មការគ្រប់គ្រង ល្បែងពាណិជ្ជកម្មកម្ពុជា មេបញ្ជាការកងពលតូចលេខ៧០ កងទ័ពជើងគោក និងអភិបាលខេត្ដទាំងអស់។
យោងតាមសេចក្ដីសម្រេច បានបង្ហាញថា៖ «គ.ប.ឆ.ប. មានភារកិច្ចដាក់ចេញវិធានការក្នុងការបង្ក្រាបការឆបោកតាមប្រព័ន្ធបច្ចេកវិទ្យា (ONLINE SCAMS) ដាក់ចេញវិធានការក្នុងការបង្ការនិងទប់ស្កាត់ការឆបោកតាមប្រព័ន្ធបច្ចេកវិទ្យា ផ្តល់ការណែនាំ សម្របសម្រួល គាំទ្រ និងអន្តរាគមន៍ចាំបាច់នានា ដើម្បីជំរុញការអនុវត្តរបស់ក្រសួង ស្ថាប័ន អង្គភាព រដ្ឋបាលថ្នាក់ក្រោមជាតិ និងសមត្ថកិច្ចដែលពាក់ព័ន្ធក្នុងការប្រយុទ្ធប្រឆាំងការឆបោក តាមប្រព័ន្ធបច្ចេកវិទ្យាឱ្យមានប្រសិទ្ធភាពខ្ពស់»។
លោក យង់ ពៅ អ្នកជំនាញភូមិសាស្រ្តនយោបាយ បានឱ្យដឹងថា ការបង្កើតគណកម្មការចំពោះកិច្ចនេះ បង្ហាញពីទស្សនៈនយោបាយ ដែលរាជរដ្ឋាភិបាលកម្ពុជាយល់ឃើញថា Scam Online នេះគឺជារឿងមួយត្រូវតែដោះស្រាយ។
លោកបន្ដថា ចំពោះទស្សនៈបច្ចេកទេស និងច្បាប់ គណកម្មការនេះត្រូវធ្វើការឱ្យជាក់ស្ដែង ដោយមានការចូលរួមពីថ្នាក់ដឹកនាំធំៗ។ បើការអនុវត្ដជាក់ស្ដែងមិនបានផលច្រើន ច្បាស់ណាស់ វានឹងប្រឈមការវាយតម្លៃ។
លោក យង់ ពៅ បានបន្ដថា៖ «បើគណកម្មាការនេះធ្វើការងារបានផលល្អ អ្នកបច្ចេកទេសខិតខំធ្វើការ ថ្នាក់ខាងក្រោមខិតខំបំពេញការងារបានល្អ វាជាការបង្ហាញពិភពលោក ក៏ដូចជាមហាជនអំពីចំណាត់ការរបស់រដ្ឋាភិបាលកម្ពុជា»។
ប្រការ ៤ បានចែងថា គ.ប.អ.ប. មានសិទ្ធិប្រើប្រាស់កងកម្លាំងប្រដាប់អាវុធគ្រប់ប្រភេទ និងមន្ត្រីអនុវត្តច្បាប់ពីបណ្តាក្រសួង ស្ថាប័ន អង្គភាព រដ្ឋបាលថ្នាក់ក្រោមជាតិ និងសមត្ថកិច្ចដែលពាក់ព័ន្ធក្នុងការបំពេញប្រតិបត្តិការបង្ក្រាបនិងការ ប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា។
សេចក្ដីសម្រេចបានបន្ដថា៖ «ក្នុងករណីចាំបាច់ តាមរយៈការប្រគល់សិទ្ធិរបស់ប្រធាន គ.ប.ឆ.ប. ប្រធានលេខាធិការដ្ឋាន គ.ប.ប.ប. សហការ និងសម្របសម្រួលជាមួយនឹងកងកម្លាំងប្រដាប់អាវុធគ្រប់ប្រភេទ និងមន្ត្រីអនុវត្តច្បាប់ពីបណ្តាក្រសួង ស្ថាប័ន អង្គភាព រដ្ឋបាលថ្នាក់ក្រោមជាតិ និងសមត្ថកិច្ចដែលពាក់ព័ន្ធក្នុងការបំពេញប្រតិបត្តិការបង្ក្រាបនិងការ ប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា»។
លោក មាស នី អ្នកស្រាវជ្រាវសង្គមឯករាជ្យ បានគាំទ្រការបង្កើតគណកម្មការចំពោះកិច្ចនេះ ដែលដោះស្រាយបញ្ហាអំពើឆបោក បានធ្វើឱ្យប៉ះពាល់ដល់កេត្យានុភាពរបស់កម្ពុជាកាន់តែធ្ងន់ រួមទាំងការវិនិយោគជាដើម។
លោកបានថ្លែងថា វាជាវិធានការត្រឹមត្រូវ និងចំពេលវេលា។ ប៉ុន្ដែលោកក៏បានបង្ហាញក្ដីបារម្ភចំពោះនិរន្ដរភាពវិធានការរយៈពេលយូរអង្វែង។
លោក មាស នី បានប្រាប់ភ្នំពេញប៉ុស្ដិ៍ថា៖ «នៅស្រុកយើងនេះ មានការបង្កើតអនុគណកម្មការសម្រាប់ការឆ្លើយតបរឿងក្ដៅៗពីមុនមក វាជាញឹកញាប់ ដោយមិនដឹងថាមកពីហេតុអ្វី តែវាផ្ទុះតែមួយប្រ៉ាវរួចហើយក៏ស្ងាត់ទៅវិញ រួមទាំងរឿងព្រៃឈើ និងដីធ្លី»។
លោក យង់ ពៅ យល់ថា កម្ពុជានឹងចាកចេញផុតពីប្រទេស Scam ដែលមិនអាចទុកឱ្យបរទេសមួយចំនួនចោទកម្ពុជានោះទេ។ បើសិនជាកម្ពុជាមិនមានឆន្ទះនយោបាយដោះស្រាយកិច្ចការនេះទេ កម្ពុជាត្រូវបានចាត់ទុកជាប្រទេសម៉ាហ្វីយ៉ា ដែលអាចរងនូវទ័ណ្ឌកម្មសព្វបែបយ៉ាង។
លោក យង់ ពៅ បានប្រាប់ភ្នំពេញប៉ុស្ដិ៍ថា៖ «គណកម្មការត្រូវប្រតិបត្ដិការបង្ក្រាប scam online ឱ្យឆាប់បំផុត ពីព្រោះវាពាក់ព័ន្ធបញ្ហាជាច្រើន ដែលគេមើលឃើញថា យើងជាប្រទេស scam គេពិបាកធ្វើកិច្ចសហការប្រតិបត្ដិការផ្សេងៗ រួមទាំង ការវិនិយោគផង។ ដូច្នេះ គណកម្មការនេះត្រូវតែដុតដៃដុតជើង ធ្វើកិច្ចការឱ្យបានលឿនបំផុត និងប្រសិទ្ធភាព»។
លោកយល់ថា ការបង្កើតគណកម្មការនេះមានគុណសម្បត្ដិនៅពេលនាយករដ្ឋមន្ដ្រីដាក់ចិត្ដដាក់កាយ ដាក់នយោបាយ ធ្វើកិច្ចការនេះដោយផ្ទាល់ ដែលបង្ហាញពីការយកចិត្ដទុកដាក់កម្រិតកំពូល។
យ៉ាងណាមិញ លោកមើលឃើញថា៖ «អង្គភាពខ្លះអាចជាន់សមត្ថកិច្ចគ្នា ដែលអ្នកខ្លះកាន់គណកម្មការដដែលច្រើនជាដើម ឬហៅថា គ្នាច្រើន អន្សមខ្លោច»។
លោក មាស នី បន្ដថា នាយករដ្ឋមន្ដ្រីមិនអាចធ្វើកិច្ចការពីថ្នាក់លើដល់ថ្នាក់ក្រោមតែម្នាក់ឯងបាននោះទេ។ ប្រទេសមួយត្រូវការពឹងផ្អែកលើប្រព័ន្ធគ្រប់គ្រងរដ្ឋដែលធ្វើការដោយខ្លួនឯង។
លោកបានបញ្ជាក់ថា មន្ដ្រីថ្នាក់ក្រោម ដែលទទួលផល ឬអ្នកមានអំណាចនៅពីក្រោយបញ្ហាឆបោកនេះ គណកម្មការចំពោះកិច្ចក៏ពិបាកធ្វើការដែរ។ វាមិនខុសពីការរត់ដេញចាប់រវាងឆ្មា និងកណ្ដុរ។
លោក មាស នី បានលើកឡើងថា៖ «គណកម្មការត្រូវធ្វើឱ្យក្ដៅ និងមានការវាយតម្លៃឱ្យបានជាក់លាក់ ហើយបង្ហាញពីការដាក់ទោសទ័ណ្ឌទៅលើជនបង្ក និងនៅពីក្រោយអំពើ scam នេះ»។
លេខាធិការដ្ឋាន គ.ប.ច.ប. ដែលដឹកនាំដោយអនុប្រធានប្រចាំការ លោក ឆៃ ស៊ីណារិទ្ធ មានក្រុមការងារចំណុះ ចំនួន ៦ និងអង្គភាពអន្តរាគមន៍ពិសេស ចំនួន ១ រួមមាន ក្រុមការងារស្រាវជ្រាវនិងស៊ើបអង្កេត ក្រុមការងារបច្ចេកវិទ្យាព័ត៌មាន ក្រុមការងារប្រតិបត្តិការនិងនីតិវិធី ក្រុមការងារទំនាក់ទំនងកិច្ចសហប្រតិបត្តិការអន្តរជាតិ ក្រុមការងារផ្សព្វផ្សាយនិងសាធារណមតិ និងក្រុមការងារកិច្ចការទូទៅ ជាមួយអង្គភាពអន្តរាគមន៍ពិសេស។
លេខាធិការដ្ឋាន គ.ប.ឆ.ប. មានតួនាទីជាសេនាធិការឱ្យ គ.ប.ឆ.ប. និងមានភារកិច្ចកសាងផែនការស្រាវជ្រាវ ប្រមូលព័ត៌មាន ផែនការសកម្មភាពសម្រាប់បម្រើឱ្យវិធានការបង្ការ ទប់ស្កាត់ និងបង្ក្រាបការឆបោកតាមប្រព័ន្ធបច្ចេកវិទ្យា ដើម្បីស្នើសុំការសម្រេចពី គ.ប.ឆ.ប.។
លេខាធិការដ្ឋាន ប្រមូលភស្តុតាងនិងកំណត់មុខសញ្ញាសង្ស័យ ដោយអនុវត្តតាមនីតិវិធីច្បាប់ តាមដាន ត្រួតពិនិត្យ និងវាយតម្លៃការអនុវត្តវិធានការដែលបានដាក់ចេញដោយ គ.ប.ឆ.ប. អន្តរាគមន៍ចាំបាច់នានា ដើម្បីជំរុញការអនុវត្តវិធានការដែលបានដាក់ចេញដោយ គ.ប.ឆ.ប. និងធ្វើសហប្រតិបត្តិការជាមួយបណ្តាប្រទេសពាក់ព័ន្ធ។
សេចក្ដីសម្រេចបានឱ្យដឹងទៀតថា៖ «លេខាធិការដ្ឋានសហការ សម្របសម្រួល និងជំរុញក្រសួង ស្ថាប័ន អង្គភាព រដ្ឋបាលថ្នាក់ក្រោមជាតិ និងសមត្ថកិច្ច ដែលពាក់ព័ន្ធក្នុងការបំពេញប្រតិបត្តិការបង្ក្រាបនិងការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា ក៏ដូចជាដឹកនាំបញ្ជាអង្គភាពអន្តរាគមន៍ពិសេសក្នុងការបំពេញប្រតិបត្តិការនានា បន្ទាប់ពីទទួលបានគោលការណ៍ ឯកភាពពីប្រធាន គ.ប.អ.ប.»៕
