ពិធីបិទ «ឆ្នាំនៃការផ្លាស់ប្តូរប្រជាជននិងប្រជាជន កម្ពុជា-ចិន ២០២៤» នៅទីក្រុងចឹងចូវ ខេត្តហឺណាន សាធារណរដ្ឋប្រជាមានិតចិន នៅថ្ងៃទី២៤ កុម្ភៈ។ ក្រសួងទេសចរណ៍
កម្ពុជានិងចិន តាមរយៈក្រសួងទេសចរណ៍កម្ពុជា និងអាជ្ញាធរចិនក្នុងខេត្តហឺណាន រៀបចំព្រឹត្តិការណ៍បិទ «ឆ្នាំនៃការផ្លាស់ប្តូរប្រជាជននិងប្រជាជន កម្ពុជា-ចិន ២០២៤» ដែល ប្រព្រឹត្តទៅនៅថ្ងៃទី២៤ និងទី២៥ ខែកុម្ភៈនេះ នៅទីក្រុងចឹងចូវ ខេត្តហឺណាន ប្រទេសចិន។
បើតាមក្រសួងទេសចរណ៍ ព្រឹត្តិការណ៍មានការសម្តែងទស្សនីយភាពសិល្បៈថ្នាក់ជាតិរួមគ្នាកម្ពុជា-ចិន ការសម្តែងក្បាច់គុនល្បុក្កតោកម្ពុជា និងក្បាច់គុនកុងហ្វូសៅលីញ ព្រមទាំងការបង្ហាញម៉ូត សម្លៀកបំពាក់បុរាណ និងប្រពៃណីកម្ពុជា-ចិន រួមជាមួយកម្មវិធីសំខាន់ៗមួយចំនួនទៀត។
ក្រសួងទេសចរណ៍ លើកឡើងថា៖ «ព្រឹត្តិការណ៍នេះ ដើរតួនាទីយ៉ាងសំខាន់ក្នុងការលើកកម្ពស់វិស័យទេសចរណ៍កម្ពុជា-ចិន ក៏ដូចជារួមចំណែកជំរុញការផ្សព្វផ្សាយកិត្យានុភាពកម្ពុជា សិល្បៈវប្បធម៌ដ៏ល្អផូរផង់ សក្តានុពលទេសចរណ៍ដ៏សម្បូរបែប របស់កម្ពុជាឱ្យកាន់តែទូលំទូលាយទៅកាន់ទីផ្សារអន្តរជាតិ ជាពិសេសទីផ្សារចិន»។
ក្រសួងបន្តថា កម្មវិធីនេះក៏ជាឱកាសក្នុងការផ្សារភ្ជាប់ និងពង្រីកទំនាក់ទំនងរវាងប្រជាជននិងប្រជាជន ទំនាក់ទំនងពាណិជ្ជកម្ម ពង្រឹងភាពជាដៃគូ និងកិច្ចសហប្រតិបត្តិការល្អរួមចំណែកដល់ការកសាង «សហគមន៍ជោគវាសនារួមកម្ពុជា-ចិន» និងដើម្បីជាការបន្តគាំទ្រ ដល់កិច្ចសហប្រតិបត្តិការត្បូងពេជ្រកម្ពុជា-ចិន។
រដ្ឋមន្ត្រីក្រសួងទេសចរណ៍ លោក ហួត ហាក់ ទស្សនាការតាំងបង្ហាញឧបករណ៍ខ្មែរ នៅឯព្រឹត្តិការណ៍បិទ «ឆ្នាំនៃការផ្លាស់ប្តូរប្រជាជននិងប្រជាជន កម្ពុជា-ចិន ២០២៤» នៅខេត្តហឺណាន ប្រទេសចិន នៅថ្ងៃទី២៤ កុម្ភៈ។ ក្រសួងទេសចរណ៍
នៅព្រឹកថ្ងៃទី២៤ ខែកុម្ភៈ ការបិទឆ្នាំនៃការផ្លាស់ប្តូរប្រជាជននិងប្រជាជន កម្ពុជា-ចិន ២០២៤ ធ្វើឡើងក្រោមការចូលរួមរបស់លោក ហួត ហាក់ រដ្ឋមន្ត្រីក្រសួងទេសចរណ៍ និងលោកស្រី Zhang Min អភិបាលរងខេត្តហឺណាន។
ក្នុងព្រឹត្តិការណ៍នេះ ភាគីទាំងពីរបានលើកឡើងពីសក្តានុពលទេសចរណ៍ កម្ពុជា-ចិន ការភ្ជាប់បណ្តាញធុរកិច្ចទេសចរណ៍រវាងវិនិយោគិន និងប្រតិបត្តិករទេសចរណ៍នៃប្រទេសទាំងពីរ និងពង្រឹង និងពង្រីកទំនាក់ទំនង និងកិច្ចសហប្រតិបត្តិការល្អ ក្នុងវិស័យទេសចរណ៍រវាងផ្នែករដ្ឋ-ឯកជន។
កាលពីឆ្នាំ២០២៤ កន្លងទៅ ព្រឹត្តិការណ៍វប្បធម៌កម្ពុជា និង ចិនមួយចំនួនត្រូវបានរៀបចំឡើងនៅខេត្តសៀមរាប ដែលរួមមានដូចជាព្រឹត្តិការណ៍ «ពេលក្បាច់គុនសាវលីញ ជួបក្បាច់គុនល្បុក្កតោ» នៅប្រាសាទបាយ័ន និងព្រឹត្តិការណ៍ម្ហូបអាហារចិន និងខ្មែរជាច្រើនលើកនៅខេត្តសៀមរាប។
លោក ឈត ប៊ុនថង អ្នកសិក្សាស្រាវជ្រាវផ្នែកទំនាក់ទំនង វប្បធម៌ អប់រំ និងទេសចរណ៍ នៃរាជបណ្ឌិតសភា បានប្រាប់ភ្នំពេញប៉ុស្តិ៍នៅថ្ងៃទី២៤ ខែកុម្ភៈនេះថា តិចឬច្រើន ការរៀបចំព្រឹត្តិការណ៍ឆ្នាំនៃការផ្លាស់ប្ដូរប្រជាជននិងប្រជាជនចិន ពិតជាបានរួមចំណែកដល់ការលើកកម្ពស់វិស័យទេសចរណ៍សម្រាប់ទីផ្សារគោលដៅចិន និងកម្ពុជា។
រូបពិព័រណ៍នៃសិល្បៈវប្បធម៌ខ្មែរ នៅក្នុងព្រឹត្តិការណ៍បិទ «ឆ្នាំនៃការផ្លាស់ប្តូរប្រជាជននិងប្រជាជន កម្ពុជា-ចិន ២០២៤»។ ក្រសួងទេសចរណ៍
លោកលើកទឹកចិត្តឲ្យមានការរៀបចំព្រឹត្តិការណ៍បែបនេះទៀត នៅឆ្នាំ ២០២៥នេះ។ យ៉ាងណាក៏ដោយ លោកថា បើចង់ដឹងថា ព្រឹត្តិការណ៍នេះជោគជ័យប៉ុណ្ណានោះ អាចធ្វើការស្ទាប់ស្ទង់មតិថាតើទេសចរណ៍ចិនមកកម្ពុជា ទទួលបានការជំរុញទឹកចិត្តពីព្រឹត្តិការណ៍នេះដែរឬយ៉ាងណា។
លោកថ្លែងដូច្នេះថា៖ «បើតាមការប៉ាន់ស្មាន ខ្ញុំគិតថា តិចឬច្រើនវាមានឥទ្ធិពលតាមរយៈការពញាក់អារម្មណ៍តាមរយៈការរៀបចំព្រឹត្តិការណ៍វប្បធម៌ និងព្រឹត្តិការណ៍ផ្សេងៗដែលទាក់ទាញ។ ខ្ញុំគិតថា យើងគួរបន្តធ្វើតទៅទៀត។ បើវគ្គមុនចប់ហើយ វគ្គថ្មី ឆ្នាំ២០២៥នេះ គួរធ្វើបន្តទៀត ព្រោះបើយើងធ្វើ តិចឬច្រើនវាបានផល»។
ចំនួនទេសចរចិនមកកម្ពុជាបានបង្ហាញសញ្ញាកើនឡើងរហូតដល់ទៅ ៥៤ភាគរយនៅឆ្នាំ២០២៤ ដែលមានចំនួនសរុប ៨៤៨ ៩២៥នាក់ ឈរនៅលំដាប់ទី៣ បន្ទាប់ពីថៃ និងវៀតណាម។
កាលពីមុនកូវីដ១៩ ទេសចរណ៍ចិនឈរលំដាប់ថ្នាក់លេខមួយនៅកម្ពុជា ដែលមានចំនួន ២,២៦លាននាក់៕
