អគារទីស្នាក់ការក្រសួងពាណិជ្ជកម្ម។ ភ្នំពេញប៉ុស្តិ៍
អ្នកជំនាញបានអះអាង សេចក្តីប្រកាសបដិសេធរបស់ក្រសួងពាណិជ្ជកម្មទៅនឹងការផ្សព្វផ្សាយរបស់បណ្តាញសារព័ត៌មាននៅក្នុងប្រទេសកូរ៉េខាងត្បូង NK News ពីករណីសង្ស័យថាមានក្រុមហ៊ុនរបស់សាធារណរដ្ឋប្រជាមានិតប្រជាធិបតេយ្យកូរ៉េ(កូរ៉េខាងជើង)មួយកំពុងផ្សាយពាណិជ្ជកម្ម ដោយបើកចំហអំពីការគ្រប់គ្រងរបស់ខ្លួនលើភោជនីយដ្ឋានបណ្តាក់ទុនរួមគ្នានៅក្នុងប្រទេសចិន និងកម្ពុជា គឺជាការបញ្ជាក់ពីភាពស្អាតស្អំ និងការគោរពដោយខ្ជាប់ខ្ជួននៅនឹងសេចក្តីសម្រេចនានារបស់អង្គការសហប្រជាជាតិ។
ក្រសួងពាណិជ្ជកម្មកម្ពុជា កាលពីថ្ងៃទី២៧ ខែកុម្ភៈ ឆ្នាំ២០២៥ បានចេញសេចក្តីបដិសេធមួយទៅនឹងការដាក់សេចក្តីសង្ស័យលើអាជ្ញាធរកម្ពុជាដែលថាបានអនុញ្ញាតឱ្យក្រុមហ៊ុនមានមូលដ្ឋាននៅប្រទេសកូរ៉េខាងជើងចូលមកបើកអាជីវកម្ម។
សេចក្តីប្រកាសបដិសេធ របស់ក្រសួងពាណិជ្ជកម្ម សរសេរថា កាលពីថ្ងៃទី២៦ ខែកុម្ភៈ ឆ្នាំ២០២៥ បណ្តាញសារព័ត៌មាន NK News បានចុះផ្សាយអំពីករណីសង្ស័យថា មានក្រុមហ៊ុនរបស់កូរ៉េ(កូរ៉េខាងជើង) មួយកំពុងផ្សាយពាណិជ្ជកម្មដោយបើកចំហអំពីការគ្រប់គ្រងរបស់ខ្លួនលើភោជនីយដ្ឋានបណ្តាក់ទុនរួមគ្នានៅក្រៅប្រទេស ដោយមានទីតាំងនៅក្នុងសាធារណរដ្ឋប្រជាមានិតចិន និងព្រះរាជាណាចក្រកម្ពុជា។
ក្រសួងបានបញ្ជាក់ថា៖«ករណីនេះក្រសួងពាណិជ្ជកម្មសូមប្រកាសបដិសេធចោលទាំងស្រុងចំពោះព័ត៌មានដែលបានចុះផ្សាយដោយ NK News និងសូមបញ្ជាក់ថា ពុំមានការចុះបញ្ជីពាណិជ្ជកម្មឱ្យក្រុមហ៊ុនដែលមានឈ្មោះ Tongnam Trading Company ឬក្រុមហ៊ុន Tongnam Transport JV Co., Ltd. នោះទេ។ បន្ថែមលើនេះ ក្រុមការងារក្រសួងពាណិជ្ជកម្មក៏បានចុះធ្វើការស្រាវជ្រាវនៅតាមផ្សារលក់ផលិតផលកូរ៉េក្នុងរាជធានីភ្នំពេញ ឃើញថាពុំមានការធ្វើធុរកិច្ចពាក់ព័ន្ធជាមួយធុរជនកូរ៉េខាងជើងឡើយ»។
លិខិតបានឱ្យដឹងទៀតថា ក្រសួងពាណិជ្ជកម្ម តែងតែអនុវត្តយ៉ាងម៉ត់ចត់តាមសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ (UNSC) និងលិខិតបទដ្ឋានគតិយុត្តជាធរមានរបស់កម្ពុជា ដោយបានលុបចេញពីបញ្ជីពាណិជ្ជកម្ម និងបិទគ្រប់អាជីវកម្មដែលពាក់ព័ន្ធធុរជនកូរ៉េខាងជើងចំនួន ១៦ ក្រុមហ៊ុន/សហគ្រាស នៅក្នុងឆ្នាំ២០១៩ និង ឆ្នាំ២០២២ ហើយបានបន្តសហការយ៉ាងជិតស្និទ្ធជាមួយក្រសួងការបរទេស និងសហប្រតិបត្តិការអន្តរជាតិ និងក្រសួង-ស្ថាប័នពាក់ព័ន្ធ អនុវត្តនូវប្រភេទទណ្ឌកម្មផ្សេងៗដូចដែលមានចែងក្នុងសេចក្តីសម្រេចរបស់ UNSC។
លោក ឡោ វិចិត្រ អនុប្រធានសមាគមពាណិជ្ជកម្មកម្ពុជា-ចិន បានប្រាប់ភ្នំពេញប៉ុស្តិ៍នៅថ្ងៃទី២៨ ខែកុម្ភៈ ថា ការមិនអនុញ្ញាតឱ្យមានធុរជនកូរ៉េខាងជើងធ្វើប្រតិបត្តិការអាជីវកម្ម ព្រមទាំងនាំចេញ នាំចូលទំនិញនានា គឺដោយសារតែប្រទេសមួយនេះត្រូវបានអង្គការសហប្រជាជាតិដាក់បម្រាម។
ការណ៍នេះគឺមិនមែនតែជាមួយប្រទេសកម្ពុជាប៉ុណ្ណោះទេ គឺជាមួយប្រទេសដែលជាសមាជិកទាំងជិត ២០០ ប្រទេសលើពិភពលោក។
លោកបន្តថា ក្រៅពីសកម្មភាពពាណិជ្ជកម្ម ប្រទេសកូរ៉េខាងជើង ក៏ជាប់បម្រាមទាក់ទងនឹងការផ្ទេរប្រាក់ ព្រមទាំងប្រតិបត្តិការផ្សេងៗទៀតជាច្រើន។
លោកបានថ្លែងថា៖«ក្រសួងចេញលិខិតបញ្ជាក់ទាន់សភាពការណ៍បែបនេះ គឺជាការល្អណាស់ ព្រមទាំងបង្ហាញទៅសហគមន៍អន្តរជាតិថាកម្ពុជាជាប្រទេសនីតិរដ្ឋ និងគោរព ព្រមទាំងសេចក្តីសម្រេចនានារបស់អង្គការសហប្រជាជាតិដែលជាអង្គការមួយតំណាងឱ្យសមាជិកជិត ២០០ នៅលើពិភពលោក៕
