ក្មេងប្រុស២នាក់ ជាបងប្អូនបង្កើតនឹងគ្នាត្រូវបានភ្លើងឆេះស្លាប់នៅក្នុងផ្ទះលក់ចាប់ហួយ បន្ទាប់ពីម្តាយបានចាក់សោរទុកនៅក្នុងផ្ទះ។ រូបថត នគរបាលជាតិ
បាត់ដំបងៈ ក្មេងប្រុស២នាក់ ជាបងប្អូនបង្កើតនឹងគ្នាត្រូវបានភ្លើងឆេះស្លាប់នៅក្នុងផ្ទះរបស់ខ្លួន ក្រោយពេល ដែលម្តាយបានចាក់សោរទុកនៅក្នុងផ្ទះលក់ចាប់ហួយ ស្ថិតក្នុង ភូមិអង់ជើង ឃុំតាម៉ឺន ស្រុកថ្មគោល ខេត្តបាត់ដំបង។
ជនរងគ្រោះទាំងនាក់នោះមានឈ្មោះ ស៊ីថា សាវឌី អាយុ១២ឆ្នាំ និងម្នាក់ទៀតឈ្មោះ ស៊ីថា សុវណ្ណដា អាយុ៥ឆ្នាំ។ ចំណែកឯម្តាយរបស់ពួកគេមានឈ្មោះ ហ៊ុន សុគន្ធី អាយុ ៤០ឆ្នាំ រស់នៅភូមិអង់ជើង ឃុំតាម៉ឺន។ នេះបើយោងតាម អគ្គស្នងការដ្ឋាននគរបាលជាតិកាលពីថ្ងៃទី៣១ ខែមករា ឆ្នាំ២០២៥នេះ។
ស្រ្តីជាម្តាយបានបំភ្លឺប្រាប់នគរបាលថា នៅថ្ងៃកើតហេតុនោះ គាត់បានចាក់សោរខាងក្រៅ ហើយបានទៅដកស្មៅបន្លែ នៅខាងក្រោយផ្ទះចំងាយប្រហែល ១៦០ម៉ែត្រ។
ក្រោយមក គាត់ក៏បាន ឮសូរសំលេងផ្ទុះ ហើយ ងាកទៅមើលផ្ទះ ឃើញភ្លើងឆេះផ្ទះអស់បាត់ទៅហើយ ហើយកូនៗរបស់គាត់បានស្លាប់។ នៅក្នុងផ្ទះមានសាំង២ប៊ីដុង ម៉ូតូ២គ្រឿង និងដបហ្គាសជាច្រើនដបទៀត។
នគរបាលបានបញ្ជាក់ថា៖«ករណីអគ្គិភ័យ កើតឡើងនេះ បណ្តាលឱ្យស្លាប់មនុស្ស២នាក់ និងតូបលក់ចាប់ហួយ ១ខ្នង ទំហំ ៥ម៉ែត្រ គុណ ១២ម៉ែត្រ សង់អំពីឈើ ខូចខាតទាំងស្រុង»។
សមត្ថកិច្ចជំនាញកំពុងធ្វើការស្រាវជ្រាវមូលហេតុ ដែលបណ្តាលឱ្យមានអគ្គិភ័យនេះ ។ កម្លាំងនគរបាលស្រុកថ្មគោល មិនបានចេញរថយន្តពន្លត់អគ្គិភ័យទេ ដោយសារតែ ភ្លើងបានឆេះអស់ទៅហើយ។
អធិការនគរបាលស្រុកថ្មគោល លោកសេង លុចជាប់ប្រជុំមិនអាចធ្វើអត្ថាធិប្បាយលើករណីអគ្គិភ័យនេះបានទេ នៅថ្ងៃទី៣ ខែកុម្ភៈនេះ។
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ (គ.ជ.គ.ម) លោកសុទ្ធ គឹមកុលមុន្នីបានឱ្យដឹងថា គ្រោះអគ្គិភ័យកាលពីឆ្នាំ២០២៤កន្លងមក បានកើតមានចំនួន៨២៣លើក នៅក្នុង២៥រាជធានីខេត្ត ដែលបណ្តាលឱ្យមនុស្សយ៉ាងហោចណាស់២០នាក់បានស្លាប់ និងរបួស៥៩នាក់។
រាជធានីភ្នំពេញកើតមានគ្រោះអគ្គិភ័យច្រើនជាងគេ គឺរហូតដល់ទៅ១៥០លើក បន្ទាប់មក មានខេត្តបាត់ដំបងចំនួន៨៧លើក និងសៀមរាប៥៤លើក។ គ្រោះអគ្គិភ័យទាំងនេះ ក៏បានបំផ្លាញផ្ទះ៨៣៧ខ្នង តូបផ្សារ២៧៤ខ្នង និងឃ្លាំងទំនិញ២៤ជាដើម។
ដោយឡែកគ្រោះថ្នាក់រន្ទះបាញ់ក្នុងឆ្នាំ២០២៤ក៏បានកើតឡើងជាង១២០លើក និងបានស្លាប់មនុស្សយ៉ាងហោចណាស់៦៨នាក់ និងរបួស៥៥នាក់ផងដែរ៕
