រដ្ឋមន្ត្រីទេសចរណ៍ លោក ហួត ហាក់ ក្នុងជំនួបជាមួយឧត្តមក្រុមប្រឹក្សាពិគ្រោះនិងផ្ដល់យោបល់ កាលពីថ្ងៃទី៥ ខែកុម្ភៈ។ ក្រសួងទេសចរណ៍
រដ្ឋមន្ត្រីក្រសួងទេសចរណ៍ លោក ហួត ហាក់ បង្ហាញពីទិសដៅអភិវឌ្ឍវិស័យទេសចរណ៍ និងការងារអាទិភាពរបស់កម្ពុជាក៏ដូចជាក្រសួងទេសចរណ៍ទៅដល់ឧត្តមក្រុមប្រឹក្សាពិគ្រោះនិងផ្តល់យោបល់ ដឹកនាំដោយ លោក អ៊ុន វិសិទ្ធគុន ប្រធានប្តូរវេននៃឧត្តមក្រុមប្រឹក្សា។
ក្នុងជំនួបកាលពីថ្ងៃទី៥ ខែកុម្ភៈកន្លងទៅ លោករដ្ឋមន្ត្រីទេសចរណ៍បានបង្ហាញអំពីទិសដៅការងារអាទិភាពមួយចំនួនដូចជា ការអនុវត្តគោលការណ៍គ្រឹះ «ទេសចរណ៍ផ្សារភ្ជាប់នឹងទឹកដី» ការរក្សាឧត្តមភាពប្រកួតប្រជែងខ្ពស់ជាងមុនរបស់វិស័យទេសចរណ៍កម្ពុជា និងរក្សាកេរ្តិ៍ឈ្មោះកម្ពុជា ជាគោលដៅទេសចរណ៍សុវត្ថិភាព ផ្តល់ភាពកក់ក្តៅ ស្អាត និងបៃតង ដោយរក្សាភាពជាខ្មែរ។ នេះបើតាមក្រសួងទេសចរណ៍។
លោកបានលើកឡើងពី ការងារអាទិភាពចំនួន ៥ ដែលក្រសួងនិងស្ថាប័នពាក់ព័ន្ធត្រូវយកចិត្តទុកដាក់នាពេលខាងមុខ រួមមានការទាញប្រយោជន៍ឱ្យអស់សក្ដានុពលពីគោលដៅទេសចរណ៍ដែលមានស្រាប់ដោយឈរលើគោលការណ៍អភិរក្ស, អភិវឌ្ឍ និងរក្សាចីរភាព ការធ្វើពិពិធកម្មផលិតផលទេសចរណ៍ប្រកបដោយគុណភាព និងការបើកចំហទីផ្សារទេសចរណ៍កម្ពុជា ទៅកាន់ពិភពលោក និងការនាំពិភពលោកមកកម្ពុជា នៅគ្រប់រដូវកាល ដែលរួមមាន high season, green season។
លោកក៏បានអំពីសសរស្ដម្ភនៃកិច្ចសហប្រតិបត្តិការវិស័យទេសចរណ៍ ដែលជាវិស័យមានភាពប្រទាក់ក្រឡាគ្នាទាមទារឱ្យមានការចូលរួមពីគ្រប់ភាគីពាក់ព័ន្ធទាំងរដ្ឋនិងឯកជន ទាំងថ្នាក់ជាតិ និងក្រោមជាតិ និងកិច្ចប្រតិបត្តិការអន្តរជាតិ ដោយឈរលើអភិក្រម «ជវភាពនៃប្រព័ន្ធតួអង្គតែមួយ»។
ក្នុងជំនួបដែលមានតំណាងគណបក្សនយោបាយទាំងអស់ និងក្រសួងស្ថាប័នពាក់ព័ន្ធសរុប២៥០នាក់ លោក ហួត ហាក់ លើកទឹកចិត្តឲ្យមនុស្សគ្រប់គ្នាជួយផ្សព្វផ្សាយទិសដៅទេសចរណ៍កម្ពុជា ដែលជាប្រទេសតែមួយគត់ក្នុងតំបន់អាស៊ី ដែលមានប្រាង្គប្រាសាទជាង ១០០០កន្លែង មានសម្បត្តិបេតិកភណ្ឌវប្បធម៌ជាច្រើនដែលទទួលស្គាល់ដោយអង្គការ UNESCO និងជាគោលដៅទេសចរណ៍ដ៏ទាក់ទាញ។
ពាក់ព័ន្ធនឹងវិស័យទេសចរណ៍ដែរ រដ្ឋមន្ត្រីទេសចរណ៍ក៏បានជួបពិភាក្សាការងារជាមួយលោក Sardar Umar Alam តំណាងអង្គការយូណេស្កូប្រចាំកម្ពុជា ដោយការពិភាក្សាផ្ដោតទៅលើកិច្ចសហការក្នុងវិស័យទេសចរណ៍ ដោយផ្សារភ្ជាប់ជាមួយប្រាង្គប្រាសាទ, ការអភិវឌ្ឍដោយផ្សារភ្ជាប់គ្នារវាងធម្មជាតិ បេតិកភណ្ឌ តំបន់ធម្មជាតិ និងទីក្រុងច្នៃប្រឌិតផ្សេងៗទៀត។
លោកក៏បានជួបជាមួយភារធារីស្ថានទូតអាមេរិកលោកស្រី Bridgette Walker ដែលជំនួបនៅថ្ងៃទី៤ ខែកុម្ភៈនេះផ្ដោតទៅលើកិច្ចការសម្របសម្រួលការធ្វើដំណើររបស់ប្រជាជន និងភ្ញៀវទេសចរអាមេរិកមកកម្ពុជា។
រដ្ឋមន្ត្រីទេសចរណ៍ជួបជាមួយភារធារីស្ថានទូតអាមេរិកលោកស្រី Bridgette Walker កាលពីថ្ងៃទី៤ ខែកុម្ភៈ។ ក្រសួងទេសចរណ៍
ស្ថានទូតសហរដ្ឋអាមេរិកនៅថ្ងៃទី៦ ខែកុម្ភៈនេះក៏បានបង្ហោះសារនៅលើហ្វេសប៊ុក ដោយបញ្ជាក់ថា កិច្ចពិភាក្សាបានផ្ដោតទៅលើការខិតខំជំរុញវិស័យទេសចរណ៍នៅកម្ពុជា ការពង្រីកវត្តមាននៃក្រុមហ៊ុនផ្នែកបដិសណ្ឋារកិច្ចរបស់អាមេរិកនៅកម្ពុជា និងការបន្តកិច្ចសហប្រតិបត្តិការក្នុងការអភិរក្សវប្បធម៌ ដើម្បីទាក់ទាញអ្នកធ្វើដំណើរសហរដ្ឋអាមេរិកច្រើនបន្ថែមទៀត។
ស្ថានទូតបញ្ជាក់ថា៖ «យើងមានមោទនភាពដែលជនជាតិអាមេរិកបានឈរលេងរៀងទី១ ក្នុងចំណោមជនបរទេសដែលមកទស្សនាប្រាសាទអង្គរវត្ត»៕
