អាជ្ញាធរជាតិអប្សរាបារម្ភពីចំនួនសត្វស្វានៅបរិវេណអង្គរកាន់តែកើនឡើង ជាពិសេសចំពោះចរឹតកាចសាហាវ។ រូបថត សហការី
ភ្នំពេញ៖ ប្រាសាទអង្គរវត្តដ៏ល្បីល្បាញលើពិភពលោក ជាសម្បត្តិបេតិកភណ្ឌពិភពលោករបស់អង្គការយូណេស្កូ កំពុងប្រឈមមុខនឹងភាពតានតឹងរវាងស្វា និងមនុស្ស។
របាយការណ៍ថ្មីៗបង្ហាញថា ការកើនឡើងនៃហ្វូងស្វាដ៏គឃ្លើនបានបង្កឱ្យមានក្ដីកង្វល់ក្នុងចំណោមភ្ញៀវទេសចរ ក្រុមអភិរក្ស និងអាជ្ញាធរមូលដ្ឋាន។
ដើមចមនៃភាពចម្រូងចម្រាសគឺការផ្តល់ចំណីបែបលលេងជាមួយសត្វស្វាព្រៃពីសំណាក់ភ្ញៀវទេសចរ និងការបៀតបៀនដោយចេតនាលើសត្វទាំងនេះរបស់ក្រុមអ្នកបង្កើតមាតិកាវីដេអូផ្សព្វផ្សាយលើបណ្ដាញសង្គម។
យោងតាមអង្គការ Action for Primates ជាក្រុមតស៊ូមតិដែលមានមូលដ្ឋាននៅចក្រភពអង់គ្លេសសម្រាប់សត្វស្វា បានឱ្យដឹងថា អាកប្បកិរិយាទាំងនេះបានផ្លាស់ប្តូរយ៉ាងខ្លាំងនូវសភាវគតិធម្មជាតិរបស់សត្វស្វា ដោយធ្វើឱ្យពួកវាកាន់តែកម្រោល និងពឹងផ្អែកលើអន្តរកម្មរបស់មនុស្ស។
អ្នកនាំពាក្យរបស់ Action for Primates បាននិយាយថា៖ «ការផ្តល់ចំណីបែបលលេងជាមួយសត្វស្វា រួមទាំងការរំខានដោយចេតនា និងការយាយីពីសំណាក់ក្រុមអ្នកបង្កើតមាតិកាស្វែងរកចំណូលពីបណ្ដាញសង្គមត្រូវតែបញ្ឈប់»។
ក្រុមអង្គការការពារសត្វមួយចំនួន រួមមាន Action for Primates, Lady Freethinker, និង Stop Monkey Abuse Asia បានជំរុញអាជ្ញាធរកម្ពុជាម្តងហើយម្តងទៀតឱ្យចាត់វិធានការបន្ទាន់។
អ្នកតំណាងក្រុមអង្គការសិទ្ធិសត្វ បានប្រាប់ភ្នំពេញប៉ុស្ដិ៍តាមអ៊ីមែលថា៖ «យើងបានបង្ហាញភ័ស្តុតាងសត្វស្វាដែលត្រូវបានបង្ឃាំងជា សត្វចិញ្ចឹម នៅក្នុងគ្រួសារហើយបន្ទាប់មកត្រូវបានគេបោះបង់ចោលដើម្បីបង្កើតជាសាច់រឿងសម្រាប់មាតិកាអនឡាញ»។
អាជ្ញាធរបានទទួលស្គាល់បញ្ហានេះ ដោយអាជ្ញាធរជាតិអប្សរា (ANA) បានចេញសេចក្តីជូនដំណឹងជាសាធារណៈអំពីការកើនឡើងនៃចំនួនសត្វស្វាដែលឈ្លានពាននៅក្នុងឧទ្យានបុរាណវិទ្យាអង្គរ។
អាជ្ញាធរជាតិអប្សរា បានទទូចដល់សាធារណជន ភ្ញៀវទេសចរជាតិ-អន្តរជាតិ មគ្គុទ្ទេសក៍ទេសចរណ៍ និងប្រតិបត្តិករវិស័យទេសចរណ៍ក្នុងខេត្តសៀមរាបទាំងអស់ ផ្សព្វផ្សាយនូវខ្លឹមសារនេះ ក៏ដូចជាណែនាំ និងបញ្ឈប់នូវសកម្មភាពណាមួយដែលអាចនាំមកនូវបញ្ហាបង្កឡើងដោយសត្វស្វាជាយថាហេតុ។
លោក ឡុង កុសល អ្នកនាំពាក្យអាជ្ញាធរជាតិអប្សរា បានថ្លែងថា មហាជនរួមទាំងភ្ញៀវទេសចររមែងរងនូវការវាយប្រហារពីសំណាក់ពពួកសត្វស្វា។
លោកបានប្រាប់ភ្នំពេញប៉ុស្ដិ៍ថា៖ «វាមិនមានតួលេខជាក់លាក់នោះទេ ដោយអ្នកខ្លះត្រូវស្វាធ្វើឱ្យរបួសរលាត់ស្បែក និងដណ្ដើមចំណីជាដើម»។
លោកបានបន្ថែមថា អ្នកជំនាញកំពុងតែរិះរកវិធីល្អក្នុងការដោះស្រាយបញ្ហានេះ ដើម្បីបញ្ចៀសពីផលប៉ះពាល់ដល់ភ្ញៀវផង និងមិនរងការរិះគន់ចំពោះការជញ្ជូនសត្វទៅកន្លែងផ្សេងផង៕
