ទិដ្ឋភាពវាលស្រែនៅស្រុកបាធាយ ខេត្តកំពង់ចាម កាលពីខែមិថុនា ឆ្នាំ ២០២៣។ រូបថត រដ្ឋបាលខេត្ត
ក្នុងឆ្នាំ២០២៥នេះ សីតុណ្ហភាពមធ្យមអប្បបរមា និងមធ្យមអតិបរមានឹងទាបជាងឆ្នាំ២០២៤ ហើយសីតុណ្ហភាពមធ្យមទូទាំងប្រទេសចន្លោះពីអប្បបរមា ២០°C និងមធ្យមអតិបរមា ៣៧°C ចាប់ពីខែកុម្ភៈដល់ដើមខែមីនា ដែលត្រជាក់ជាងឆ្នាំ២០២៤។
ស្ថានភាពមិនសូវក្ដៅដូចឆ្នាំ២០២៤ នេះក៏ដោយសារតែ ចាប់ពីខែកុម្ភៈ ដល់ខែឧសភា បាតុភូតឡានីញ៉ានឹងថយចុះមកត្រឹម ៣០-៥០ភាគរយ ដោយជំនួសមកវិញនូវបាតុភូតអែនសូ (ENSO-Neutral) ដែលបានកើនឡើង៧០ភាគរយ។ នេះបើតាមសេចក្ដីជូនដំណឹងរបស់ក្រសួងធនធានទឹក និងឧតុនិយម ស្ដីពីការព្យាករអាកាសធាតុលើកទី២ សម្រាប់រដូវប្រាំង ចាប់ពីខែកុម្ភៈ ដល់ដើមរដូវវស្សា ខែឧសភា ដែលផ្សព្វផ្សាយនៅថ្ងៃនេះ។
ដោយសារតែវាជារដូវប្រាំង ក្រសួងបញ្ជាក់ថា នឹងមានភ្លៀងពីតិចទៅមធ្យម ដែលអាចបណ្តាលឱ្យមានការខ្វះខាតទឹកប្រើប្រាស់នៅបណ្តាខេត្តភាគខាងជើង និងជុំវិញបឹងទន្លេសាប ដែលរួមមាន ខេត្តបន្ទាយមានជ័យ ឧត្តរមានជ័យ ព្រះវិហារ សៀមរាប កំពង់ធំ បាត់ដំបង ពោធិ៍សាត់ និងកំពង់ឆ្នាំង។ ប៉ុន្តែ នៅតំបន់មាត់សមុទ្រ បរិមាណទឹកភ្លៀងអាចមានកម្រិតខ្ពស់ជាងមធ្យមភាគច្រើនឆ្នាំ។
ក្រសួងព្យាករថា រដូវវស្សាអាចនឹងចាប់ផ្តើមនៅក្នុងសប្តាហ៍ទី២ នៃខែឧសភា ដែលលឿនជាងឆ្នាំ២០២៤ ហើយកម្ពស់ទឹកភ្លៀងអាចខ្ពស់ជាងមធ្យមភាគច្រើនឆ្នាំ និងមានបាតុភូតផ្គរ រន្ទះ និងខ្យល់កន្ត្រាក់អាចកើតឡើងច្រើន។
សេចក្ដីជូនដំណឹងរបស់ក្រសួងបន្ថែមថា៖ «ក្រសួងធនធានទឹក និងឧតុនិយម លើកទឹកចិត្តឲ្យអាជ្ញាធរដែនដី និងប្រជាពលរដ្ឋ ចូលរួមសហការប្រើប្រាស់ទឹកដោយសន្សំសំចៃកម្រិតខ្ពស់នៅខែកុម្ភៈ និងខែមីនាខាងមុខនេះ ជាពិសេសតំបន់ជនបទដែលស្ថិតនៅឆ្ងាយពីប្រភពទឹក»៕
