មន្ត្រីស៊ីម៉ាក់កំពុងពិនិត្យមើលគ្រាប់បែកចង្កោមបន្ទាប់ពីដោះបាន កាលពីឆ្នាំកន្លងទៅ។ CMAc
ខណៈដែលជំនួយសម្រាប់ការបោសសម្អាតមីនដែលបានពីសហរដ្ឋអាមេរិកតាមរយៈ USAID ត្រូវបានផ្អាក រដ្ឋាភិបាលចិនបានបន្តផ្ដល់ជំនួយសម្រាប់ការបោសសម្អាតមីនក្នុងទឹកប្រាក់ ៤,៤លានដុល្លារ នៅក្នុងគម្រោងជំនួយចិនលុបបំបាត់គ្រាប់មីននៅកម្ពុជា។
លោក ហេង រតនា អគ្គនាយកមជ្ឈមណ្ឌលកម្ចាត់មីនកម្ពុជា ឬ ស៊ីម៉ាក់ បានឲ្យដឹងនៅថ្ងៃទី៥ ខែមករានេះថា ជំនួយឥតសំណងនេះគឺសម្រាប់រយៈពេល ១ ឆ្នាំ ដែលចាប់អនុវត្តចាប់ពីខែមីនាខាងមុខនេះ រហូតដល់ខែកុម្ភៈឆ្នាំ២០២៦។
ជំនួយនេះគាំទ្រដល់ប្រតិបត្តិការសម្អាតមីននៅក្នុងខេត្តចំនួន ៧ រួមមាន ខេត្តកំពង់ធំ សៀមរាប ឧត្តរមានជ័យ ព្រះវិហារ ស្ទឹងត្រែង និងខេត្តក្រចេះ និងនៅមណ្ឌលសុនខស្ថិតនៅខេត្តកំពង់ឆ្នាំង។
តាមរយៈជំនួយនេះ អ្នកជំនាញបច្ចេកទេសជាង ៤០០នាក់របស់ស៊ីម៉ាក់នឹងបោសសម្អាតផ្ទៃដីដែលមានបញ្ហាគ្រាប់មីន និងសំណល់យុទ្ធភណ្ឌមិនទាន់ផ្ទុះសង្គ្រាម ចំនួនជាង ៣.៤០០ ហិកតា ការស្រាវជ្រាវព័ត៌មានសំណល់យុទ្ធភណ្ឌមិនទាន់ផ្ទុះសង្ក្រាមនិងគ្រាប់បែកចង្កោម តាមខេត្តគោលដៅ ពង្រឹងសមត្ថភាពវិទ្យាស្ថានបច្ចេកទេសសុនខ ក៏ដូចជា ការសង្គ្រោះជនពិការដោយសារមីន។
បើតាមលោក ហេង រតនា ជំនួយរបស់ចិនខាងលើនេះជាការផ្ដល់នៅក្នុងឆ្នាំទី៣ ដំណាក់កាលទី៣ នៃគម្រោងជំនួយចិនលុបបំបាត់គ្រាប់មីននៅកម្ពុជា ដែលបានចាប់ផ្ដើមកាលពីឆ្នាំ២០២៣ និងបញ្ចប់នៅឆ្នាំ២០២៦ ក្នុងថវិកាសរុប ១៣,២លានដុល្លារ។
កាលពីខែតុលាឆ្នាំមុន សហរដ្ឋអាមេរិកបានប្រកាសផ្ដល់ជំនួយជាង ១០លានដុល្លារ សម្រាប់ការបោសសម្អាតមីន ប៉ុន្តែជំនួយទាំងនេះត្រូវបានផ្អាកកាលពីពេលថ្មីៗនេះ ដែលធ្វើឲ្យប៉ះពាល់ដល់បុគ្គលិកដោះមីនជាង ១០០០នាក់។
ជំនួយនេះទំនងជាមិនអាចបន្តឡើងវិញទេ ដោយសារថា ប្រធានាធិបតីសហរដ្ឋអាមេរិក ដូណាល់ ត្រាំ កាលពីថ្ងៃទី៤ ខែកុម្ភៈនេះ បានបន្តដាក់សម្ពាធ USAID ដោយតម្រូវឲ្យដកបុគ្គលិករបស់ទីភ្នាក់ងារនេះពីស្ទើរតែទាំងអស់ ខណៈដែលទីភ្នាក់ងារនេះប្រឈមនឹងការបិទ ឬ ត្រូវកែសម្រួលរចនាសម្ព័ន្ធឡើងវិញ៕
