បង្គោលចែកចាយអគ្គិសនីជាច្រើនអំឡុងពេលព្រះអាទិត្យរៀបអស្តង្គត។ ភ្នំពេញប៉ុស្តិ៍
វិសាលភាពនៃការផ្គត់ផ្គង់ថាមពលអគ្គិសនីនៅទូទាំងប្រទេសកម្ពុជាត្រូវបានពង្រីកជាបន្តបន្ទាប់ ជាពិសេសក្នុងរយៈពេល ១៥ ឆ្នាំចុងក្រោយនេះ ដោយនៅត្រឹមដំណាច់ឆ្នាំ ២០២៤ មានភូមិជាង ១៤ ពាន់ដែលមានបណ្តាញអគ្គិសនីប្រើប្រាស់ ចំណែក ១០៥ ភូមិស្ថិតក្នុងដំណាក់កាលអភិវឌ្ឍបណ្តាញ។
របាយការណ៍វឌ្ឍនភាពវិស័យអគ្គិសនីកម្ពុជា ឱ្យដឹងថា គិតត្រឹមតែធ្នូ ឆ្នាំ ២០២៤ មានភូមិចំនួន ១៤ ០៤៨ ដែលបានអភិវឌ្ឍបណ្តាញរួចរាល់ ឬស្មើនឹង ៩៩,១៥ ភាគរយនៃចំនួនភូមិសរុបនៅទូទាំងប្រទេស ចំណែកភូមិចំនួន ១០៥ (ស្មើ ០,៧៤ភាគរយ) កំពុងស្ថិតក្នុងគម្រោងអភិវឌ្ឍបណ្តាញ និងភូមិចំនួន ១៥ (០,១១ភាគរយ)នៅពុំទាន់មានការវិនិយោគនៅឡើយ។
បើគិតជាចំនួន គឺលំនៅឋានដែលបានភ្ជាប់ចរន្តអគ្គិសនីប្រើប្រាស់មានសរុបជាង ៣,៧៨ លានខ្នងផ្ទះ ស្មើនឹងជាង ៩៥ ភាគរយនៃលំនៅឋានសរុបទូទាំងប្រទេស។
ប្រធានអាជ្ញាធរអគ្គិសនីកម្ពុជា(AEC) លោក យឹម វិសិដ្ឋ បានថ្លែងក្នុងសន្និបាតបូកសរុបការងារឆ្នាំ ២០២៤ របស់ក្រសួងរ៉ែ និងថាមពល កាលពីដើមខែកុម្ភៈ ថា គិតត្រឹមចុងឆ្នាំ ២០២៤ ការផ្គត់ផ្គង់ថាមពលអគ្គិសនីនៅកម្ពុជាបានពង្រីកវិសាលភាពរបស់ខ្លួនដោយបានគ្របដណ្ដប់ការផ្គត់ផ្គង់ថាមពលអគ្គិសនី ទៅភូមិចំនួន ៩៩,១៥ ភាគរយនៃភូមិទូទាំងប្រទេសចំនួន ១៤ ១៥៣ ភូមិ។
ចំណែកភូមិចំនួន ១០៥ ដែលស្មើនឹង ០,៧៤ ភាគរយស្ថិតក្នុងគម្រោងអភិវឌ្ឍបណ្តាញបន្ត និង ១៥ ភូមិផ្សេងទៀត ស្មើ ០,១១ ភាគរយនៅមិនទាន់មានការវិនិយោគបណ្តាញអគ្គិសនីនោះទេ ដែលភាគច្រើននៃភូមិទាំងនោះ ជាតំបន់កោះ តំបន់លិចទឹកនៅរដូវវស្សា តំបន់គ្មានផ្លូវធ្វើដំណើរ តំបន់បណ្តែតទឹក និងតំបន់ដាច់ស្រយាល ដែលមានប្រជាជនរស់នៅរាយប៉ាយ។
លោកបានបន្ថែមថា បើតាមផែនការគ្រោងទុក គឺក្នុងរយៈពេល ២-៣ឆ្នាំខាងមុខ ទាំងអគ្គិសនីកម្ពុជា ក៏ដូចជាសេវាកម្មឯកជន អាចមានលទ្ធភាពពង្រីកការផ្គត់ផ្គង់អគ្គិសនីពីបណ្ដាញជាតិបាន ៥១ភូមិទៀត ដែលនឹងធ្វើឱ្យភូមិមិនមានថាមពលអគ្គិសនីប្រើប្រាស់ថយចុះមកនៅត្រឹម ៦៩ ភូមិ ឬស្មើនឹង ០,៤៩ភាគរយ នៃភូមិសរុបទូទាំងប្រទេស។
រដ្ឋមន្ត្រីក្រសួងរ៉ែ និងថាមពល លោក កែវ រតនៈ បានឱ្យដឹងថា ក្នុងនីតិកាលទី ៧ នៃរដ្ឋសភា រាជរដ្ឋាភិបាលកម្ពុជា បានបន្តសម្រួចគោលនយោបាយអន្តរកាលថាមពលរបស់ខ្លួន ដើម្បីធ្វើឱ្យកម្ពុជាឆ្ពោះទៅអព្យាក្រឹតកាបូននៅត្រឹមឆ្នាំ ២០៥០ តាមរយៈអភិក្រមចំនួន ៤ គឺ ១. ការបង្កើនថាមពលស្អាត ប្រសិទ្ធភាពថាមពល និងភាពគ្រប់គ្រាន់, ២. រក្សាថ្លៃសមរម្យស្របតាមថ្លៃនៃធាតុចូលក្នុងការផលិត បញ្ជូន និងចែកចាយថាមពល, ៣. បង្កើនស្ថិរភាព និងគុណភាពនៃការផ្គត់ផ្គង់ និង ៤. បង្កើនការផ្តល់សេវាឱ្យបានកាន់តែប្រសើរ និងប្រកបដោយសមធម៌រវាងតំបន់ទីក្រុង និងជនបទ។
យោងតាមក្រសួងរ៉ែ និងថាមពល គិតត្រឹមឆ្នាំ ២០២៤ ប្រទេសកម្ពុជាមានសមត្ថភាពផ្គត់ផ្គង់ថាមពលអគ្គិសនីសរុប ៥ ០៤៤ មេហ្កាវ៉ាត់(WW) កើនពី ៤ ៦៤៩មេហ្កាវ៉ាត់ក្នុងឆ្នាំ២០២៣។
ក្នុងចំណោមអានុភាពថាមពលសរុបទាំង ៥ ០៤៤មេហ្កាវ៉ាត់គឺប្រភពក្នុងប្រទេសមានចំនួន ៤ ៣៧២ មេហ្គាវ៉ាត់(ថាមពលកកើតឡើងវិញ ២ ៦៧២ មេហ្កាវ៉ាត់និងប្រភពដុតធ្យូងថ្ម+ប្រេង ១ ៧០០ មេហ្គាវ៉ាត់) និងប្រភពនាំចូលពីប្រទេសជិតខាង(ថៃ វៀតណាម និងឡាវ) មានសរុប ៦៧២ មេហ្គាវ៉ាត់។
ប្រធានក្រុមប្រឹក្សាភិបាលនៃសម្ព័ន្ធក្រុមហ៊ុន SAM SN GROUP លោក សំ សុខនឿន ដែលកំពុងសិក្សាលទ្ធភាពបង្កើតតំបន់សេដ្ឋកិច្ចពិសេសនៅកម្ពុជា បានប្រាប់ភ្នំពេញប៉ុស្តិ៍ក្នុងថ្ងៃទី៧ ខែកុម្ភៈថា ថាមពល គឺជាចំណុចសំខាន់ដែលគ្រប់សកម្មភាពអាជីវកម្មត្រូវការ ដោយមុននឹងទៅបើកអាជីវកម្ម ឬរោងចក្រនៅទីតាំងណា អ្នកវិនិយោគតែងពិនិត្យទៅលើប្រភពថាមពល។
នៅពេលបណ្តាញអគ្គិសនីជាតិ ត្រូវបានដាក់ពង្រាយនៅគ្រប់ទីកន្លែងទូទាំងប្រទេស វាជាថាមពលទាក់ទាញមួយសម្រាប់ជំរុញចិត្តអ្នកវិនិយោគឱ្យចូលមកវិនិយោគនៅកម្ពុជាកាន់តែច្រើន។
លោកលើកឡើងទៀតថា នៅពេលបណ្តាញអគ្គិសនីត្រូវបានចែកចាយកាន់តែទូលំទូលាយ វាក៏អាចធ្វើឱ្យតម្លៃកាន់តែទាបជាងមុន។
លោកបានថ្លែងថា៖«ទិន្នន័យបណ្តាញចែកចាយអគ្គិសនីដែលគ្របដណ្តប់ស្ទើពាស់ពេញផ្ទៃប្រទេស គឺជាព័ត៌មានល្អមួយសម្រាប់កម្ពុជាក្នុងការផ្សព្វផ្សាយ ដើម្បីទាក់ទាញអ្នកវិនិយោគឱ្យចូលមកបណ្តាក់ទុនផ្ទាល់នៅកម្ពុជាកាន់តែច្រើន ដើម្បីផលិត ឬកែច្នៃទំនិញសម្រាប់នាំចេញទៅទីផ្សារអន្តរជាតិ»។ លោកបន្ថែមថា៖«តម្លៃអគ្គិសនីទាបនឹងជួយធ្វើឱ្យថ្លៃដើមផលិតទំនិញកាន់តែទាប។ ទំនិញមានតម្លៃទាប នឹងជួយឱ្យសមត្ថភាពប្រកួតប្រជែងកាន់តែខ្ពស់»។
ទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា ឱ្យដឹងថា ក្នុងឆ្នាំ ២០២៤ ការនាំចេញ-នាំចូលទំនិញរបស់កម្ពុជាជាមួយប្រទេសដៃគូទាំងអស់មានទឹកប្រាក់ ៥៤,៧៤ ពាន់លានដុល្លារ កើនឡើង ១៦,៩ ភាគរយបើធៀបនឹងឆ្នាំ២០២៣ ដែលមានចំនួន ៤៦,៨៣ ពាន់លានដុល្លារ ដោយក្នុងនោះទំនិញដែលកម្ពុជានាំចេញទៅក្រៅប្រទេសមានទឹកប្រាក់ ២៦,២ ពាន់លានដុល្លារ កើនឡើង ១៥,៧ ភាគរយ និងការនាំចូលមានទឹកប្រាក់ ២៨,៥៤ ពាន់លានដុល្លារ កើនឡើង ១៨ ភាគរយ។ប្រទេសដែលជាដៃគូពាណិជ្ជកម្មសំខាន់ជាងគេទាំង ៥ របស់កម្ពុជា រួមមាន ចិន អាមេរិក វៀតណាម ថៃ និងជប៉ុន។
ទំនិញសំខាន់ៗដែលកម្ពុជានាំចេញមានភាគច្រើន ជាផលិតផលសម្លៀកបំពាក់ និងគ្រឿងបន្ទាប់បន្សំដែលធ្វើឡើងពីក្រណាត់, ផ្លែឈើ និងគ្រាប់ផ្លែឈើ, ម៉ាស៊ីន, ឧបករណ៍អគ្គិសនី, ស្បែកជើង, កៅស៊ូ និងផលិតផលធ្វើអំពីកៅស៊ូ រួមនិងទំនិញសំខាន់ៗមួយចំនួន ទៀត ចំណែកទំនិញនាំចូលមានដូចជា គ្រឿងម៉ាស៊ីន យានយន្ត វត្ថុធ្វើពីដែក វត្ថុធ្វើពីប្លាស្ទីក និងផលិតផលគីមី ជាដើម៕
