មន្ត្រីដោះមីនម្នាក់កំពុងបំពេញបេសកកម្មនៅចម្ការមីន កាលពីកន្លងទៅ។ CMAC
រាជរដ្ឋាភិបាលតាមរយៈអាជ្ញាធរមីន បានបញ្ជាក់ថា កម្ពុជាមិនបានទទួលជំនួយពីទីភ្នាក់ងារ USAID ទេ ប៉ុន្តែទទួលបានពីការិយាល័យកាត់បន្ថយ និងលុបបំបាត់អាវុធនិងកិច្ចការនយោបាយយោធា របស់ក្រសួងការបរទេសសហរដ្ឋអាមេរិក ដែលផ្ដល់ឲ្យអង្គការដោះមីននានានៅកម្ពុជា។
សេចក្ដីប្រកាសព័ត៌មានរបស់អាជ្ញាធរមីនដែលចេញផ្សាយនៅល្ងាចថ្ងៃទី៧ ខែកុម្ភៈនេះបញ្ជាក់ថា៖ «ថវិកាទាំងនេះមិនបានផ្ដល់តាមរយៈ USAID ហើយក៏មិនបានផ្ដល់ផ្ទាល់មករាជរដ្ឋាភិបាលកម្ពុជាទេ»។
អាជ្ញាធរមីនបានឲ្យដឹងថា បច្ចុប្បន្ននេះ អង្គការដោះមីននានាដែលទទួលជំនួយពីការិយាល័យនេះ កំពុងចរចាលើបញ្ហានេះ ដោយមានការគាំទ្រពីអាជ្ញាធរមីន។
ជាមធ្យម ថវិកាពីសហរដ្ឋអាមេរិកសម្រាប់សកម្មភាពមីននៅកម្ពុជា មានប្រមាណ ៣០ភាគរយក្នុងចំណោមថវិកាសរុបក្នុងមួយឆ្នាំ សម្រាប់ការបោសសម្អាតមីន គ្រាប់បែកចង្កោម និងសកម្មភាពពាក់ព័ន្ធ។
អាជ្ញាធរមីនបានបញ្ជាក់ថា៖ «ក្នុងន័យនេះ ការបោសសម្អាតមីន គ្រាប់បែកចង្កោម និងសំណល់ជាតិផ្ទុះពីសង្គ្រាមផ្សេងទៀត នៅតែបន្តដំណើរការជាមួយនឹងការគាំទ្រថវិកាពីរាជរដ្ឋាភិបាលកម្ពុជា និងប្រទេសផ្តល់ជំនួយផ្សេងទៀតក្រៅពីសហរដ្ឋអាមេរិក»។
កាលពីកន្លងទៅថ្មីៗនេះ លោក លី ធុជ អនុប្រធានទី១ នៃអាជ្ញាធរមីនបានឲ្យដឹងថា ការកាត់ជំនួយរបស់សហរដ្ឋអាមេរិកធ្វើឲ្យប៉ះពាល់ដល់បុគ្គលិកដោះមីនជាង ១០០០នាក់៕
