ភ្នំពេញៈ ក្រសួងបរិស្ថាន កំពុងតែរៀបចំផែនការ ជាមួយស្ថាប័នពាក់ព័ន្ធ ដើម្បីធ្វើការអភិរក្ស និងអភិវឌ្ឍន៍ហេដ្ឋារចនាសម្ព័ន្ធ នៅតំបន់ទេសចរណ៍ខ្នងផ្សារ ខ្នងសំពៅ នៃឧទ្យានជាតិភ្នំក្រវាញ ទៅតាមការណែនាំរបស់ប្រ​មុ​ខរដ្ឋាភិបាល ដែលបានចុះទៅពិនិត្យជាក់ស្តែងនៅតំបន់នោះ។

លោកនាយករដ្ឋមន្រ្តីហ៊ុន ម៉ាណែតបានឱ្យដឹងនៅថ្ងៃចន្ទ ទី១០ ខែមីនានេះថា មុននឹងចាកចេញពីតំបន់ទេសចរណ៍ខ្នងផ្សារកាលពីថ្ងៃសៅរ៍ ទី៨ មីនានេះ លោកបានជួបជជែកលេងជាមួយប្អូនប្រុស ដែលជាប្រធានសហគមន៍ទេសចរណ៍ធម្មជាតិតាំងបំពង់ និងអនុប្រធានរបស់គាត់ ដើម្បីស្តាប់ពីស្ថានភាពជីវភាពរបស់ប្រជាជននៅក្នុងសហគមន៍ ក៏ដូចជាសំណូមពរជាក់ស្តែង ដើម្បីជួយដល់ប្រជាពលរដ្ឋនៅក្នុងសហគមន៍។

លោកនាយករដ្ឋមន្រ្តីបានមានប្រសាសន៍ថា៖«ក្រោយពីពិនិត្យនូវទិដ្ឋភាពជាក់ស្តែង និងស្តាប់តំណាងសហគមន៍ ខ្ញុំបានសម្រេច ប្រគល់ភារកិច្ចជូនឯកឧត្តមរដ្ឋមន្ត្រីក្រសួងបរិស្ថាន និងឯកឧត្តមអភិបាលនៃអភិបាលខេត្តកំពង់ស្ពឺ សហការអភិរក្ស និងថែរក្សាតំបន់ទេសចរណ៍ខ្នងផ្សារ ខ្នងសំពៅ នៃឧទ្យានជាតិភ្នំក្រវាញឱ្យបានល្អ សម្រាប់ផលប្រយោជន៍សាធារណៈនិងសហគមន៍នៅតំបន់នេះ»។

បន្ថែមពីនោះ ប្រមុខរដ្ឋាភិបាល ក៏បានណែនាំឱ្យក្រសួង និងខេត្តកំពង់ស្ពឺធ្វើការសិក្សារៀបចំហេដ្ឋារចនាសម្ព័ន្ធគាំទ្រ និងសេវាកម្មគាំទ្រ ដូចជាផ្លូវ បន្ទប់ទឹក កន្លែងលក់អាហារ  កន្លែងសង្គ្រោះបន្ទាន់ ។ល។ ទៅតាមស្តង់ដារ និងទុកជាប្រយោជន៍ជូនសហគមន៍ ដើម្បីធ្វើឱ្យប្រសើរឡើង នូវការផ្តល់សេវាជូនទេសចរណ៍ដែលមកកម្សាន្តនៅទីនោះ។

ក្រៅពីនោះ ស្ថាប័នទាំង២ ក៏ត្រូវសិក្សាធ្វើឱ្យប្រសើរឡើងនូវប្រព័ន្ធផ្គត់ផ្គង់ទឹកនៅលើតំបន់ភ្នំខ្នងផ្សារ ក៏ដូចជាសម្រាប់ប្រជាពលរដ្ឋរស់នៅតំបន់ជើងភ្នំផងដែរ។

អនុរដ្ឋលេខាធិការ និងជាអ្នកនាំពាក្យក្រសួងបរិស្ថាន លោកខ្វៃ អាទិត្យាបានឱ្យដឹងថា រដ្ឋមន្រ្តីក្រសួងបរិស្ថាន លោកអ៊ាង សុផល្លែត កំពុងតែរៀបចំផែនការ ក្រោយពីមានការប្រគល់ភារកិច្ចពីប្រមុខរដ្ឋាភិបាលមកភ្លាម។

លោកមានប្រសាសន៍ថា៖«ថ្ងៃនេះ ឯកឧត្តមរដ្ឋមន្រ្តីក្រសួងបរិស្ថានពិនិត្យទៅលើការងារនេះ។ ឯកឧត្តមរដ្ឋមន្រ្តីបានគិតគូរ ហើយបានរៀបចំភ្លាម ពីសកម្មភាព ផែនការ តាមការណែនាំរបស់ប្រមុខរដ្ឋាភិបាល។ ថ្ងៃនេះឯកឧត្តមរដ្ឋមន្រ្តី មានជំនួបជាមួយនឹងក្រុមកាងាររៀបចំហេដ្ឋារចនាសម្ព័ន្ធ ដូចជាទឹក និងអគ្គិសនី»។

លោកនាយករដ្ឋមន្រ្តីហ៊ុន ម៉ាណែត ក៏បានសម្រេចប្រគល់ភារកិច្ចជូន ក្រសួងទេសចរណ៍ សហការណ៍ ជាមួយនឹងក្រសួងបរិស្ថាន គណៈអភិបាលខេត្ត ប្រតិបត្តិករទេសចរណ៍ និងសហគមន៍ផងដែរ ដើម្បីជំរុញទេសចរណ៍ធម្មជាតិនៅតំបន់នោះ ឱ្យកាន់តែប្រសើរឡើង ក៏ដូចជាការជួយបង្កើនសមត្ថភាពរបស់សហគមន៍ ក្នុងការផ្ដល់សេវាទេសចរណ៍ផងដែរ។ ទាំងនេះនឹងអាចចូលរួមចំណែកក្នុងការលើកកម្ពស់ជីវភាពរស់នៅរបស់ប្រជាពលរដ្ឋនៅក្នុងតំបន់នោះ។

លោកអាទិត្យាក៏បាន្យដឹងផងដែរថា កាងារជាបន្តបន្ទាប់ទៀត រដ្ឋមន្រ្តីក្រសួងបរិស្ថាន ក្រសួងទេសចរណ៍ និងស្ថាប័នពាក់ព័ន្ធនឹងជួបពិភាក្សាគ្នា ថាតើត្រូវរៀបចំកម្មវិធីធ្វើអ្វីខ្លះ និងត្រូវចាប់ផ្តើមធ្វើអ្វីជាអាទិភាពមុនគេ។

ខ្នងផ្សារ ដែលជាទីតាំងប្រសព្វ​ រវាងខេត្តកោះកុង កំពង់ស្ពឺ និង​ខេត្ដ​ពោធិ៍សាត់ ត្រូវបានចាត់ទុកថាជា«ឋានសួគ៌ធម្មជាតិ» ។ តំបន់នេះបានកំពុងតែទាក់ទាញទាំងអ្នកទេសចរជាតិ និងអន្តរជាតិ ទៅកម្សាន្ត ជាលក្ខណៈផ្សងព្រេង ជាមួយនឹងភាពសម្បូរទៅដោយព្រៃឈើក្រាស់ ជ្រលង់ភ្នំខ្ពស់ៗ វាលស្មៅដ៏ស្រស់ស្អាត។ លើសពីនោះ វាសម្បូរទៅដោយសត្វព្រៃកម្រជាច្រើនប្រភេទ៕