ប្លង់ខាងក្នុងនៃអាកាសយានដ្ឋានអន្តរជាតិតេជោ ដែលគ្រោងបើកដំណើរការនៅខែកក្កដាខាងមុខនេះ។ OCIC
កម្ពុជាដាក់ទិសដៅជំរុញការដឹកជញ្ជូនអ្នកដំណើរតាមផ្លូវអាកាសឲ្យបានចំនួន ៧,៥លាននាក់ គឺកើនលើសឆ្នាំ២០២៤ជាង១លាននាក់ និងទំនិញចំនួន ៨០ពាន់តោន កើនឡើងជាង ២ពាន់តោននៅក្នុងឆ្នាំ២០២៥ នេះ។
ផែនការនេះត្រូវបានបង្ហាញដោយលោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល នៅក្នុងសន្និបាតប្រចាំឆ្នាំរបស់អាកាសចរណ៍ស៊ីវិលនៅថ្ងៃនេះថា ដោយដាក់ទិសដៅបង្កើនការធ្វើដំណើរ និងការដឹកជញ្ជូនទំនិញតាមផ្លូវអាកាស។
សេចក្ដីប្រកាសព័ត៌មានរបស់អាកាសចរណ៍ស៊ីវិលបានថ្លែងថា អាកាសចរណ៍ស៊ីវិលនឹងជំរុញ និងសម្រួលនីតិវិធីដើម្បីគាំទ្រដល់ការរៀបចំជើងហោះហើរថ្មី របស់ក្រុមហ៊ុនអាកាសចរណ៍ Turkish Airlines ពីទីក្រុងអ៊ីស្តង់ប៊ុល មកកាន់រាជធានីភ្នំពេញ ក្រុមហ៊ុនអាកាសចរណ៍ Etihad Airways ពីទីក្រុងអាប៊ូដាប៊ី មកកាន់រាជធានីភ្នំពេញ និងក្រុមហ៊ុនអាកាសចរណ៍ Emirates Airlines ពីទីក្រុងឌូបៃ មកកាន់ខេត្តសៀមរាប។
ស្របពេលជាមួយគ្នានេះដែរ អាកាសចរណ៍ស៊ីវិលបន្តថា ខ្លួនក៏កំពុង«សម្របសម្រួលនិងខិតខំផ្តល់វិញ្ញាបនបត្រអាកាសយានដ្ឋានឲ្យទាន់ពេលវេលា និងរៀបចំផ្ទេរជើងហោះហើរទាំងអស់ ពីអាកាសយានដ្ឋានអន្តរជាតិភ្នំពេញ ទៅអាកាសយានដ្ឋានអន្តរជាតិតេជោ ដែលគ្រោងនឹងបើកដំណើរការ នៅខែកក្កដា ឆ្នាំ២០២៥ខាងមុខ»។
បន្ថែមពីលើនេះ អាកាសចរណ៍ស៊ីវិលក៏នឹង«បន្តជួយគាំទ្រដល់ក្រុមហ៊ុនអាកាសចរណ៍របស់កម្ពុជាអាចមានលទ្ធភាពកាន់តែទូលំទូលាយថែមទៀត ដើម្បីបើកដំណើរការជើងហោះហើរអន្តរជាតិ»។
នៅក្នុងឆ្នាំនេះដែរ អាកាសចរណ៍ស៊ីវិលនឹងបន្តការចរចា កែសម្រួល និងចុះហត្ថលេខាកិច្ចព្រមព្រៀងស្តីពីសេវាកម្មដឹកជញ្ជូនតាមផ្លូវអាកាសជាទ្វេភាគី ជាមួយប្រទេសហ្វ៊ីលីពីន ជប៉ុន ឥណ្ឌូណេស៊ី ចក្រភពអង់គ្លេស និងប៉ាគីស្ថាន ព្រមទាំងពហុភាគីអាស៊ានរវាងអាស៊ាន និងនូវែលសេឡង់។
កាលពីឆ្នាំ២០២៤ កម្ពុជាទទួលបានអ្នកដំណើរតាមផ្លូវអាកាសចំនួន ៦,២៤លាននាក់ កើនឡើង ២២ភាគរយធៀបនឹងឆ្នាំ២០២៣។
ចំណែកការដឹកជញ្ជូនទំនិញសម្រេចបាន៧៧ ៧៥២តោន កើនឡើង ៤០ភាគរយ។ ក្នុងរយៈពេលនេះមានជើងហោះហើរចំនួន ៥៨ ៣៥៤លើក។ នេះបើតាមអាកាសចរណ៍ស៊ីវិល៕
