រូបភាពពីវីដេអូផ្សព្វផ្សាយក្នុងការអបអរដែលអាកាសយានដ្ឋានអន្ដរជាតិក្រុងព្រះសីហនុទទួលភ្ញៀវមួយលាននាក់។ រូបភាព អាកាសចរណ៍កម្ពុជា
ភ្នំពេញ៖ អាកាសយានដ្ឋានអន្តរជាតិព្រះសីហនុ (KOS) កត់ត្រាពីចំនួនភ្ញៀវកើនជាង ៨០ភាគរយនៅខែមករា ដើមឆ្នាំនេះ ជាមួយវត្ដមានអ្នកដំណើរជាង ៤០០០នាក់។
យោងតាមរបាយការណ៍ពីក្រសួងទេសចរណ៍ បានបង្ហាញថា៖ «ភ្ញៀវទេសចរអន្ដរជាតិបានកើនដល់ ៤២៩៤នាក់នៅក្នុងខែមករា កើនឡើងពី ១១៧០នាក់ រយៈពេលដូចគ្នានៃឆ្នាំ២០២៤ ជាមួយកំណើន ៨៤,៤ភាគរយ»។
វិស័យទេសចរណ៍កម្ពុជាកំពុងតែបង្ហាញនិន្នាការវិជ្ជមានជារួម ជាមួយនឹងភ្ញៀវអន្តរជាតិកើនឡើង ១៣,៣ភាគរយ ឈានដល់ ៦១១៨៩៤ ក្នុងខែមករា ឆ្នាំ២០២៥។
គួរបញ្ជាក់ថា Cambodia Airports បានប្រកាសថា អាកាសយានដ្ឋានអន្តរជាតិព្រះសីហនុ ទទួលបានអ្នកដំណើរ ១លាននាក់ ជាលើកដំបូងក្នុងខែសីហា ឆ្នាំ ២០១៩។
វត្ដមានភ្ញៀវអន្តរជាតិនៅអាកាសយានដ្ឋានអន្តរជាតិព្រះសីហនុមានចំនួន ២៧៤៤១នាក់ក្នុងខែមករា ឆ្នាំ២០១៩ ខណៈខែដូចគ្នាក្នុងឆ្នាំ ២០២៥ មានការថយចុះចំនួន ៨៤,៣៥ភាគរយ។
ទោះជាយ៉ាងណាក៏ដោយ ភាពទាក់ទាញរបស់ក្រុងព្រះសីហនុគឺគួរឱ្យកត់សម្គាល់ជាពិសេសដោយសារឆ្នេរសមុទ្រដ៏ស្រស់ស្អាត។
យោងតាមរបាយការណ៍បានឱ្យដឹងថា៖ «ការធ្វើដំណើរទៅកាន់ខេត្តព្រះសីហនុបានបន្តបង្ហាញពីកំណើនវិជ្ជមាន ជាមួយអត្រា ១០,៥ភាគរយ ឬ ជាង ៣៥ម៉ឺននាក់ក្នុងខែមករា ឆ្នាំ២០២៥»។
នេះបង្ហាញពីប្រជាប្រិយភាពជាបន្តបន្ទាប់នៃការធ្វើដំណើរតាមផ្លូវគោកទៅកាន់តំបន់ ដោយមានភ្ញៀវជាតិ និងអន្តរជាតិបានសម្រុកមកកម្សាន្តនៅឆ្នេរសមុទ្រខេត្តព្រះសីហនុ។
របាយការណ៍នេះបានបន្ដថា៖ «ម្យ៉ាងវិញទៀត ការមកដល់តាមផ្លូវទឹកបានធ្លាក់ចុះ ១០,៤ភាគរយ ដោយមានភ្ញៀវទេសចរ ៨៨៩២ នាក់បានមកដល់តាមទូក ជាសញ្ញាបង្ហាញថា ការធ្វើដំណើរតាមសមុទ្រអាចប្រឈមនឹងបញ្ហាមួយចំនួន»។
ការថយចុះតម្រូវការសម្រាប់ការធ្វើដំណើរតាមផ្លូវទឹកអាចបណ្តាលមកពីកត្តាផ្សេងៗ ដូចជា ការប្រកួតប្រជែងពីទម្រង់ដឹកជញ្ជូនផ្សេងទៀត ឬការផ្លាស់ប្តូរលំនាំទេសចរណ៍។
សរុបមក ខណៈពេលដែលចរាចរណ៍ផ្លូវអាកាសរបស់ខេត្តព្រះសីហនុបង្ហាញពីការងើបឡើងវិញ និងកំណើនគួរឱ្យកត់សម្គាល់ វិស័យទេសចរណ៍ដែលធ្វើដំណើរតាមផ្លូវគោកនៅតែបន្តរីកចម្រើន ហើយការធ្វើដំណើរតាមផ្លូវទឹកបានប្រឈមមុខនឹងបញ្ហាមួយចំនួន។
ជាមួយគ្នានេះ អាកាសយានដ្ឋានអន្តរជាតិភ្នំពេញ (PNH) និងអាកាសយានដ្ឋានអន្តរជាតិសៀមរាបអង្គរ (SAI) ក៏ឃើញមានការកើនឡើងនៃការមកដល់របស់អន្តរជាតិក្នុងខែមករា ឆ្នាំ២០២៥។
អាកាសយានដ្ឋានអន្តរជាតិភ្នំពេញ បានកត់ត្រាការមកដល់អន្តរជាតិចំនួនជាង ១៥ម៉ឺននាក់ ដែលកើនឡើងជាង ១៨ភាគរយ បើប្រៀបធៀបទៅនឹងរយៈពេលដូចគ្នាក្នុងឆ្នាំ ២០២៤ ខណៈដែល អាកាសយានដ្ឋានអន្តរជាតិសៀមរាបអង្គរ ទទួលភ្ញៀវអន្តរជាតិចំនួនជាង ៨ម៉ឺននាក់ កើនឡើង ១៦,១ភាគរយ៕
