ស្នងការដ្ឋាននគរបាលខេត្តបាត់ដំបង នាំមនុស្ស ២២នាក់ រួមទាំងម៉ូតូ១៨គ្រឿងមកសាកសួរពាក់ព័ន្ធការកែច្នៃម៉ូតូប្លែកៗ ជិះថតបង្ហោះលើហ្វេសប៊ុក និង TikTok។ រូបថត សហការី
ភ្នំពេញ៖ លោក ស សុខា រដ្ឋមន្ដ្រីក្រសួងមហាផ្ទៃ បានបញ្ជាឱ្យសមត្ថកិច្ចចាត់ការអ្នកកែច្នៃយានយន្ដបំពាក់ភ្លើង មើលមិនយល់ថា តើជាយានយន្ដ ឬជាសត្វចម្លែកមកផ្លាស់ប្ដូរទម្រង់ដើមវិញ។
លោកបានឱ្យដឹងថា៖ «យើងឃើញថា ១៥ ឬ ១៦ស្នងការបានបង្ក្រាប។ ខ្ញុំសូមអរគុណ និងសូមលើកទឹកចិត្ដ និងផ្សព្វផ្សាយ។ រឿងកែច្នៃមួយចំនួន គឺមិនអនុញ្ញាតទេ ទាក់ទងនឹងភ្លើងស្ដុប ដែលវាអាចប៉ះពាល់សន្ដិសុខ និងចរាចរណ៍តាមដងផ្លូវ»។
លោក សុខា បានបញ្ជាក់ថា អភិបាលរាជធានី-ខេត្ដត្រូវអនុវត្ដដោយមិនចាំបាច់ទទួលការណែនាំពីថ្នាក់លើនោះទេ។
សមត្ថកិច្ចហៅអ្នកបើកបររថយន្ដដែលប្រើប្រាស់ភ្លើងហ្វាបំភ្លឺបង្កការរំខាន និងអាចបង្កគ្រោះថ្នាក់ដល់អ្នកបើកបរដទៃ។ រូបថត សហការី
លោកបានថ្លែងថា៖ «បើសិនជារឿងម៉ូតូមួយ រង់ចាំការណែនាំដែរ ខ្ញុំមិនដឹងធ្វើមេចទេ។ ខុស គឺចាប់ទៅ។ ចាប់ហើយមិនមែនព្រលែងទេ គឺហៅជាង [ម៉ូតូ] មកប្ដូរភ្លើងស្ដុបដើមវិញ ចុះកិច្ចសន្យា ទើបឱ្យគាត់ទៅ ដោយអត់ផាកទេ»។
រដ្ឋមន្ដ្រីមហាផ្ទៃបាននិយាយសំដៅជាចម្បងទៅលើខេត្ដបាត់ដំបង ដែលលោកសង្ខេតឃើញថា មានក្រុមយុវជនជិះម៉ូតូកែច្នៃ បំពាក់ភ្លើងមើលមិនដឹងជាម៉ូតូ ឬឡាន ឬសត្វចម្លែក។
មិនបង្អង់យូរ លោក ដាញ់ អេងប៊ុនចាន់ ស្នងការនៃស្នងការដ្ឋាននគរបាលខេត្តបាត់ដំបង បានធ្វើការប្រមូលនាំយកអ្នកជិះម៉ូតូកែច្នៃខុសលក្ខណៈបច្ចេកទេសក្នុងក្រុងបាត់ដំបងចំនួន០២នៅក្នុងបរិវេណព្រលានយន្តហោះវាលបែកចាន ក្រុងបាត់ដំបងនារាត្រីថ្ងៃទី៩ខែ មីនាឆ្នាំ២០២៥។
រ៉ឺម៉ក ឬតុកតុក តុបតែងលម្អភ្លើងពណ៌ឆើតឆាយ ត្រូវបានសមត្ថកិច្ចឃាត់។ រូបថត សហការី
យោងតាមទំព័រហ្វេសប៊ុក ស្នងការដ្ឋាននគរបាលខេត្តបាត់ដំបង បានបង្ហាញថា ការនាំមកសាកសួរនេះមានចំនួន ២២នាក់ម៉ូតូ១៨គ្រឿងក្នុងនោះគឺ ដោយក្រុមទីមួយ មានរហ្សនាមថា ក្រុមរោករ៉ាក មានចំនួន ១២ នាក់ និងក្រុមទីពីររហ្សនាម ក្រុម pink pink មានចំនួន០៥នាក់ ខណៈ ០៥នាក់ទៀតមិនមានឈ្មោះក្រុម។
ស្នងការដ្ឋាននគរបាលខេត្តបាត់ដំបង បានស្រង់សំដៅពីយុវជនលេងម៉ូតូប្លែកៗទាំងនោះបានប្រាប់សមត្ថកិច្ចថា៖ «ការកែច្នៃបែបនេះគឺជាការរៀបចំប្រមូលគ្នាជាក្រុម ថតរូបភាពជាវីដេអូដាក់សំឡេងភ្លេងកាចៗ បង្ហោះក្នុងហ្វេសប៊ុក ឬ TikTok ដើម្បីទទួលបានការចូលមើលច្រើន និងទាក់ទាញអ្នកផ្សេងទៀតឱ្យធ្វើដូចខ្លួន»។
យោងតាមមាត្រាទី ៣១ នៃច្បាប់ចរាចរណ៍ផ្លូវគោកថ្មី បានចែងថា ការបំពាក់សញ្ញាសូរស័ព្ទ ភ្លើងបំភ្លឺ ឬភ្លើងលម្អផ្សេងៗទៀត ក្រៅពីការកំណត់លក្ខណបច្ចេកទេសរបស់យានជំនះ ត្រូវបានហាមឃាត់៕
