សំណង់ និងការទន្រ្ទានយកដី ដោយខុសច្បាប់ នៅតាមបណ្តោយផ្លូវអន្ទង់អាំង ស្ថិតក្នុងស្រុកវែលវែង។ រូបថតរដ្ឋបាលខេត្តពោធិ៍សាត់
ពោធិ៍សាត់ៈ ពលរដ្ឋចំនួន២៤គ្រួសារ ក្នុងចំណោមសរុប៩៨គ្រួសារនៅមិនទាន់ចាកចេញពីតំបន់អន្ទង់អាំង (ភ្នំ១៥០០) ក្នុងស្រុកវាលវែង នោះទេ រហូតមកដល់ពេលបច្ចុប្បន្ននេះ ដែលក្នុងនោះក៏មានមេធាវី ប៉ូលិស និងជាគ្រូបង្រៀននៅភ្នំពេញ បានទៅចាប់ដីនៅតំបន់នោះផងដែរ។
អភិបាលខេត្តពោធិ៍សាត់ លោកខូយ រីដាបានឱ្យដឹងថា បើទោះបីជារដ្ឋបាលខេត្តបានចេញលិខិតជូនដំណឹង និងជួបប្រជុំផ្ទាល់ជាច្រើនលើកយ៉ាងណាក៏ដោយ ក៏ពលរដ្ឋចំនួន២៤គ្រួសារនៅតែមិនព្រមធ្វើការរុះរើ និងចាកចេញពីតំបន់អន្ទង់អាំង ទៅកាន់ទីតាំងថ្មី ដែលអាជ្ញាធរបានរៀបចំទុកឱ្យនោះដែរ។ ផ្ទុយទៅវិញ បែរជាមានអ្នកប្រឹងដើរតវ៉ា ស្រែកតាមប្រព័ន្ធផ្សព្វផ្សាយ និងបណ្តាញសង្គមទៅវិញ។
លោកបានប្រាប់ភ្នំពេញប៉ុស្តិ៍នាថ្ងៃទី១៣ ខែមីនានេះថា៖«អស់ពេលវេលា ដែលត្រូវពន្យាពេលហើយ។ ដល់ពេលវេលាហើយ ព្រោះយើងខំប្រឹងប្រែងអស់លទ្ធភាពជាមួយពួកគាត់ហើយ។ យើងពន្យាពេលហ្នឹង គឺដោយសារតែទឹកចិត្តអាណិតស្រលាញ់ពួកគាត់ហ្នឹងហើយ។ ឥលូវគាត់ដល់ដំណាក់កាលមួយ ដែលគាត់បង្ខំចិត្តឱ្យយើងអនុវត្តច្បាប់ហ្នឹង»។
សេចក្តីជូនដំណឹងចុងក្រោយ របស់រដ្ឋបាលខេត្ត ដែលតម្រូវឱ្យពលរដ្ឋនៅសេសសល់ចាកចេញ ដើម្បីរៀបចំតំបន់អន្លង់អាំង ឱ្យទៅជាតំបន់បៃតងនោះ គឺចុះកាលបរិច្ចេទនៅថ្ងៃទី ៣ ខែមីនា ហើយត្រូវបានផ្សព្វផ្សាយជាសាធារណៈនៅថ្ងៃទី១១ ខែមីនា។
រដ្ឋបាលខេត្តបានព្រមានប្រើប្រាស់វិធានការច្បាប់ ចំពោះអ្នកដែលមិនព្រមចាកចេញ ក្នុងរយៈពេល១៥ថ្ងៃ។ ក្នុងនោះក៏មាន ការប្រឈមនឹងការជាប់ពន្ធនាគារ រហូតដល់៥ឆ្នាំ និង ពិន័យជាប្រាក់ចំនួន៥០០លានរៀលផងដែរ។
លោកអភិបាលក៏បានឱ្យដឹងផងដែរថា អ្នកដែលកំពុងតែដើរតវ៉ាខ្លះ ក៏មិនមែនជាអ្នកក្រខ្សត់ អត់ដីនៅនោះដែរ ប៉ុន្តែខ្លះមានដីជាច្រើនកន្លែងឯនោះ។
ប៉ុន្តែអាជ្ញាធរ នៅតែដោះស្រាយជូនពួកគាត់ ដោយបានរៀបចំផ្តល់ទីតាំងថ្មីល្អ ហើយស្របច្បាប់ និងមានហេដ្ឋារចនាសម្ព័ន្ធត្រឹមត្រូវ។ ក្នុងនោះមានដូចជា កសាងផ្លូវចាក់កៅស៊ូ ទំនប់ទឹកដើម្បីប្រើប្រាស់ទាំងធ្វើកសិកម្ម។
លោកមានប្រសាសន៍ថា៖«តែពួកគាត់ អត់មានគំនិតចូលរួមសហការណ៍ជាមួយនឹងអាជ្ញាធរយើងទេ។ គាត់ធ្វើតាមជ្រុងមួយ នៃគំនិតរបស់ពួកគាត់ហ្នឹងឯង។ យើងមានទាំងអស់ ផ្លូវ ភ្លើង ទឹក។ ទឹកស្អាត តិចទៀតរុញដល់ហ្នុងហើយ។ គ្មានអីអត់ទេ។ តែតាមពួកគាត់ស្រែក ហាក់បីដូចជាគ្មានអីសោះនៅទីនោះ។ គាត់មិនព្រម អញ្ជឹងនិយាយធ្វើម៉េចឱ្យតែអវិជ្ជមានទេ»។
ទីតាំងថ្មីសម្រាប់ពលរដ្ឋ ដែលស្ម័គ្រចិត្តចាកចេញពីតំបន់អន្ទង់អាំងនោះ គឺមានទំហំជាង១៥០ហិកតា។ ទីតាំងនោះ គឺស្ថិតនៅជិតទីប្រជុំជន ដែលមានចម្ងាយប្រមាណជា ៦គីឡូម៉ែត្រពីរង្វង់មូលដំរី ទីរួមស្រុកវាលវែង។
ប្រជាពលរដ្ឋខ្លះដែលមិនព្រមចាកចេញនោះ គឺក៏មានអ្នកខ្លះជា មេធាវី មន្រ្តីនគរបាល គ្រូបង្រៀន និងអាជីវករដែលមានទីលំនៅក្នុងរាជធានីភ្នំពេញ និងបណ្តាខេត្តផ្សេងៗផងដែរ ហើយពួកគាត់បានទៅចាប់យកដីនៅតំបន់អន្ទង់អាំងនោះ។
នេះជាការលើកឡើងរបស់ រដ្ឋមន្រ្តីក្រសួងរ៉ែ និងថាមល និងជាប្រធានក្រុមការងារថ្នាក់ជាតិរដ្ឋាភិបាលចុះជួយខេត្តពោធិ៍សាត់ លោកកែវ រតនៈ នៅក្នុងកិច្ចសម្ភាសជាមួយនឹងវិទ្យុបារាំងកាលពីថ្ងៃទី១២ ខែមីនានេះ។
កិច្ចសម្ភាសស្តីពីបញ្ហាទាក់ទងនឹងតំបន់អន្ទង់អាំងនេះ ក៏ត្រូវបានចែករំលែកនៅលើបណ្តាញសង្គមរបស់លោកនាយករដ្ឋមន្រ្តីហ៊ុន ម៉ាណែតផងដែរ។
លោករដ្ឋមន្រ្តីបានលើកឡើងថា អាជ្ញាធរមានការអត់ធ្មត់ខ្លាំងណាស់ចំពោះបញ្ហាអ្នកដែលមិនព្រមចាកចេញនោះ ដោយមិនបង្ហាញអត្តសញាណពួកគេជាសាធាណៈនោះទេ។
លោករដ្ឋមន្រ្តីមានប្រសាសន៍ថា៖«បើសិនជាអាជ្ញាធរបញ្ចេញរូបថតដាក់តាមបណ្តាញសង្គមកន្លងមក ក៏ជាជំរើសដែរ។ តែសម្តេចបវរធិបតី លោកមិនចង់ធ្វើអញ្ចឹងទេ។ លោកចង់ថា ដោះស្រាយទៅ ការពារកិត្តិយស ទាំងអស់គ្នា ហើយរស់នៅបន្តទៀត ដោយសេចក្តីថ្លៃថ្នូរ ស្របច្បាប់»៕
