ភ្នំពេញៈ គ្រោះអគ្គិភ័យបានកើតឡើងចំនួន ១ ០៣៥លើកកាលពីឆ្នាំ២០២៤កន្លងមក ដែលបានកើនឡើងចំនួន២៦៩លើក ឬ៣៥% បើធៀបនឹងឆ្នាំ២០២៣ ដែលមានចំនួន៧៦៦លើកនៅទូទាំងប្រទេស។

ហេតុការណ៍អកុសលនេះ បានបណ្ដាលឱ្យខូចខាតទ្រព្យសម្បតិ្តជាច្រើន ដូចជា ឆេះផ្ទះចំនួន ៦១៥ខ្នង តូបលក់ដូរ៦៥៨តូប ឃ្លាំង ២៤ខ្នង រោងចក្រ១១ខ្នង រថយន្ត៤៦គ្រឿង ព្រមទាំងសម្ភារប្រើប្រាស់មួយចំនួនទៀត។ នេះបើយោងតាមនាយកដ្ឋាននគរបាលបង្ការ ពន្លត់អគ្គិភ័យ និងសង្គ្រោះ នៃក្រសួងមហាផ្ទៃ នាថ្ងៃសុក្រ ទី១៤ ខែមីនានេះ។

មូលហេតុ ដែលបង្កឱ្យមានគ្រោះអគ្គិភ័យ រួមមាន ឆ្លងចរន្តអគ្គិសនី មានចំនួន ៤៤៥លើក ស្មើនឹង៤៥,៥៩% ប្រើប្រាស់ភ្លើង មាន៣១៧លើក ស្មើ៣២,៤៧% និងផ្ទុះឃ្លាំងគ្រាប់ ១លើក ស្មើនឹង០,១០%។

ប្រធាននាយកដ្ឋាននគរបាលបង្ការ ពន្លត់អគ្គិភ័យ និងសង្គ្រោះ លោកឧត្ដមសេនីយ៍ឯក នេត វន្ថា បាន​​ឱ្យ​ដឹងថា គ្រោះអគ្គិសភ័យទាំងនោះ ក៏បានបណ្ដាលឱ្យ មានមន្ត្រីនគរបាល បង្ការ ពន្លត់អគ្គិភ័យ និងសង្គ្រោះរបួស ចំនួន៨នាក់ផងដែរ ក្នុងពេលចេញប្រតិបត្តិការពន្លត់អគ្គិភ័យ។ ក្នុងនោះរបួសធ្ងន់៣នាក់ និងស្រាល ៥នាក់។

លោកឧត្តមសេនីយ៍ឯកមានប្រសាសន៍ថា៖«ក្នុងពេលកើតមានគ្រោះអគ្គិភ័យម្ដងៗ មន្រ្តីនគរបាលបង្ការ ពន្លត់អគ្គិភ័យ និងសង្គ្រោះ បានចាត់ទុកបេសកកម្មពន្លត់ និងសង្គ្រោះអាយុជីវិតប្រជាជនជាអាទិភាពបំផុត រហូតពេលខ្លះ ពួកគាត់ត្រូវប្រថុយគ្រោះថ្នាក់ ដើម្បីប្ដូរមកវិញនូវសុវត្ថិភាពជនរងគ្រោះដែលកំពុងជាប់ខ្លួនក្រោមអំណាចភ្លើងឆេះសន្ធោសន្ធៅ»។

លោកឧត្តមសេនីយ៍ឯក បានបន្តថា នៅពេលមានកម្លាំងណាម្នាក់រងរបួស ទោះធ្ងន់ ឬស្រាលក៏ដោយ ថ្នាក់ដឹកនាំ និងអង្គភាព បានគិតគូយ៉ាងគ្រប់ជ្រុងជ្រោយ ទាំងការសង្គ្រោះ ការព្យាបាល និងការឧបត្ថម្ភគាំទ្រដល់ក្រុមគ្រួសារ យ៉ាងយកចិត្តទុកដាក់បំផុត ដើម្បីធានាផ្ដល់កក់ក្ដៅ និងការលើកទឹកចិត្ត។

ចំពោះ មន្រ្តីដែលបានលះបង់សុវត្ថិភាពផ្ទាល់ខ្លួន ដើម្បីសេចក្ដីសុខប្រជាជន និងមន្រ្តី ដែលមានស្នាដៃល្អក្នុងការងារបង្ការ ពន្លត់អគ្គិភ័យ និងសង្គ្រោះ ក៏ទទួលបានការលើកទឹកចិត្តជាបន្តបន្ទាប់ដូចគ្នាដែរ។

លោកបានលើកឡើងថា ក្នុងពេលចេញប្រតិបត្តិការម្ដង ក្រុមការងារស្ម័គ្រចិត្ត និងកងកម្លាំងនគរបាល ពន្លត់អគ្គិភ័យនៅទូទាំងប្រទេសតែងតែជួបបញ្ហាប្រឈមមួយចំនួនដូចជា សំណង់មិនរៀបរយ ផ្លូវចង្អៀត អ្នកបើករយានយន្តគ្រប់មធ្យោបាយមិនផ្តល់សិទ្ធិអាទិភាពដល់រថយន្តពន្លត់អគ្គិភ័យ និងបង្កឱ្យមានការស្ទះចរាចរណ៍ ទឹកមិនគ្រប់គ្រាន់ ហើយមានចម្ងាយឆ្ងាយពីកន្លែងអគ្គិភ័យ។ ក្រៅពីនោះការយល់ដឹងរបស់ប្រជាពលរដ្ឋចំពោះវិធានការពន្លត់អគ្គិភ័យបឋមនៅមានកម្រិតនៅឡើយ។

លោកឧត្ដមសេនីយ៍ឯក ក៏បានសំណូមពរដល់ប្រជាពលរដ្ឋទូទៅបង្កើនការប្រុងប្រយ័ត្ន និងត្រូវត្រៀមឧបករណ៍ សម្ភារៈពន្លត់អគ្គិភ័យបឋម មានដូចជា បំពង់ពន្លត់អគ្គិភ័យ ធុងទឹក ដីខ្សាច់ ភួយ បាវ ប៉ែល ត្រសេះ ជាដើម។

មិនត្រឹមតែប៉ុណ្ណោះ ត្រូវទុកដាក់សារធាតុងាយឆេះ ឬងាយផ្ទុះគ្រប់ប្រភេទរួមមាន ប្រេងឥន្ទនៈ ហ្គាស ឬឧស្ម័នឱ្យបានត្រឹមត្រូវ ឬដាក់ឱ្យឆ្ងាយពីប្រភពភ្លើង ឬប្រភពកម្ដៅ ហើយមុនពេលចេញពីផ្ទះត្រូវតែបិទប្រព័ន្ធអគ្គិសនី និងពន្លត់ភ្លើងចង្ក្រាន ចង្ក្រានហ្គាសឬឧស្ម័ន ទៀន ធូប ឱ្យបានត្រឹមត្រូវ៕