លិខិតជូនដំណឹងរបស់ក្រសួងប្រៃយសនីយ៍ និងទូរគមនាគមន៍ អំពីសិក្ខាសាលាគោលការណ៍រកប្រាក់ចំណូលពី TikTok។ MPTC
វាជាព័ត៌មានគួរឲ្យរំភើបសម្រាប់អ្នកប្រើប្រាស់បណ្ដាញសង្គម TikTok នៅពេលដែលមាតិកាល្អៗ មានភាពទាក់ទាញ និងគោរពគោលការណ៍បណ្ដាញសង្គមនេះត្រូវបានបើកឲ្យរកលុយបាននៅកម្ពុជា។ នេះបើតាមលោក ជា វ៉ាន់ដេត រដ្ឋមន្ត្រីក្រសួងប្រៃសនីយ៍និងទូរគមនាគមន៍។
លោក ជា វ៉ាន់ដេត បានបញ្ជាក់ពីគោលការណ៍អនុញ្ញាតឲ្យរកចំណូលពីបណ្ដាញសង្គមចិននេះ នៅក្នុងសិក្ខាសាលាផ្សព្វផ្សាយស្តីពីសុវត្ថិភាពលើប្រព័ន្ធអនឡាញ និងគោលការណ៍ណែនាំរបស់ក្រុមហ៊ុន TikTok នាថ្ងៃទី១៩ ខែមីនានេះ។
សិក្ខាសាលាស្ដីអំពីសុវត្ថិភាពលើប្រព័ន្ធអនឡាញ និង គោលការណ៍ណែនាំរបស់ក្រុមហ៊ុន TikTok ត្រូវបានរៀបចំដោយក្រសួង ដោយសហការជាមួយក្រុមហ៊ុន TikTok ក្នុង គោលបំណងចែករំលែកព័ត៌មាន ឱកាសរកប្រាក់ចំណូលសម្រាប់អ្នកផលិតមាតិកា ឧត្តមានុវត្តន៍នៃការការពារសុវត្ថិភាពលើប្រព័ន្ធអនឡាញ គោលការណ៍ណែនាំសហគមន៍ និងការប្រើប្រាស់បណ្តាញសង្គម Tik Tok ប្រកបដោយប្រសិទ្ធភាព ដែលមានការចូលរួមពី ក្រសួង ស្ថាប័ន អ្នកសារព័ត៌មាន និងអ្នកផលិតមាតិកា។
កាលពីកន្លងទៅ អ្នកផលិតមាតិកានៅកម្ពុជាមិនអាចរកប្រាក់ពីកម្មវិធី TikTok បានទេ ដោយសារតែក្រុមហ៊ុននេះអនុញ្ញាតការរកលុយនៅតែប្រទេសធំៗមួយចំនួន។
ប៉ុន្តែ នៅឆ្នាំ២០២៥នេះ ក្រុមហ៊ុន TikTok ពង្រីកកម្មវិធីរកប្រាក់សម្រាប់អ្នកប្រើប្រាស់ដែលមានឈ្មោះថា Subscription ទៅតំបន់អាស៊ីអាគ្នេយ៍ ដែលក្នុងនោះមានទាំងកម្ពុជាផងដែរ ដោយយោងទៅលើការកើនឡើងនៃអ្នកប្រើប្រាស់ និងលទ្ធភាពដែលក្រុមហ៊ុនទទួលបានសក្ដានុពលផ្នែកពាណិជ្ជកម្មលើអនឡាញ។
យោងតាមក្រុមហ៊ុន TikTok គោលការណ៍មួយចំនួនសម្រាប់គ្រប់លក្ខខណ្ឌរកប្រាក់មានដូចជា អ្នកប្រើប្រាស់ចុះឈ្មោះនៅកម្ពុជា, ជាគណនីផ្ទាល់ខ្លួននិងមិនមែនជាគណនីក្រសួង ឬក្រុមហ៊ុន, មានអាយុចាប់ពី១៨ឆ្នាំឡើងទៅ មាន Follower ១ម៉ឺននាក់ និងមានអ្នកមើល ១០ម៉ឺន View ក្នុងរយៈពេល ៣០ថ្ងៃចុងក្រោយ។ ក្រៅពីនេះនៅមានលក្ខខណ្ឌមួយចំនួនទៀត ដែលហៅថា គោលការណ៍ណែនាំសហគមន៍។
នៅកម្ពុជា មានអ្នកប្រើប្រាស់បណ្ដាញសង្គមសកម្មជាង ១២លាននាក់ ដែលស្មើនឹងប្រមាណ ៦៨ភាគរយនៃប្រជាជនសរុបជាង ១៧លាននាក់ គិតត្រឹមឆ្នាំ២០២៤។
បណ្ដាញសង្គមដែលពេញនិយមជាងគេគឺហ្វេសប៊ុក ដែលមានគណនីជាង១៣លាន ស្មើនឹង៧៧ភាគរយនៃពលរដ្ឋសរុប។
ចំណែកអ្នកប្រើប្រាស់ Messenger មានជាង១២លាននាក់។
ចំណែកការប្រើប្រាស់ តេឡេក្រាមមានប្រមាណ ១០លាននាក់។
ដោយឡែកសម្រាប់បណ្ដាញសង្គម TikTok វិញ ក៏មានភាពពេញនិយមដែរក្នុងចំណោមពលរដ្ឋកម្ពុជា ដែលមានមានអ្នកប្រើប្រាស់ប្រមាណ ១០លាននាក់។ នេះបើតាមលោក ទេព អស្នារិទ្ធ អ្នកនាំពាក្យក្រសួងព័ត៌មាន។
យ៉ាងណាក៏ដោយ លោក អស្នារិទ្ធ បានក្រើនរំឭកដល់អ្នកប្រើប្រាស់បណ្ដាញសង្គម ជាពិសេសអ្នកផលិតមាតិកា និងអ្នកមានប្រជាប្រិយភាពឲ្យផលិតមាតិកាប្រកបដោយការទទួលខុសត្រូវ ផ្អែកលើការពិត មានប្រភពត្រឹមត្រូវ អាចទុកចិត្តបាន និងចូលរួមក្នុងការធានា ថែរក្សានូវសណ្តាប់ធ្នាប់ និងស្ថិរភាពនៅក្នុងសង្គម ក៏ដូចជាការពារសុវត្ថិភាព និងភាពសុខសាន្តសម្រាប់ការរស់នៅរបស់ប្រជាពលរដ្ឋ។
លោកថ្លែងថា៖ « អ្នកផលិតមាតិកាត្រូវអនុវត្តសកម្មភាពរបស់ខ្លួនប្រកបដោយការទទួលខុសត្រូវ ដោយត្រូវប្រកាន់ខ្ជាប់នូវការគោរព និងប្រតិបត្តិនូវក្រមសីលធម៌ពាក់ព័ន្ធនឹងការផ្សព្វផ្សាយ ការប្រើប្រាស់បណ្តាញសង្គម និងការការពារសិទ្ធិអ្នកប្រើប្រាស់ដើម្បីធានាថា ការផ្សព្វផ្សាយមានតម្លាភាព តុល្យភាព អាចទុកចិត្តបានផ្តល់សារៈប្រយោជន៍ និងការពារស្ថិរភាពសម្រាប់រស់នៅប្រចាំថ្ងៃ»៕
