ការហាត់ត្រៀមរបស់កីឡាករដើម្បីចូលរួមក្នុងព្រឹត្តិការណ៍បុណ្យទន្លេលើកទី៩។ សហការី
ព្រឹត្តិការណ៍បុណ្យទន្លេលើកទី៩ ដែលនឹងប្រព្រឹត្តទៅក្នុងខេត្តតាកែវ ក្រោមប្រធានបទ«គុណតម្លៃនៃទន្លេ៖ ផ្សារភ្ជាប់វប្បធម៌ និងទេសចរណ៍ធម្មជាតិ» ត្រូវបានរំពឹងថានឹងអាចទាក់ទាញភ្ញៀវជាតិ និងអន្តរជាតិជាច្រើនឱ្យចូលរួម ខណៈរដ្ឋបាលខេត្តបានរៀបចំឱ្យមានការសម្តែងទស្សនីយភាពសិល្បៈ ការប្រគំតន្ត្រី ការប្រកួតកីឡា និងការកម្សាន្តជាច្រើន។
ព្រឹត្តិការណ៍បុណ្យទន្លេលើកទី៩ ឆ្នាំ ២០២៥ នឹងប្រព្រឹត្តទៅចាប់ពីថ្ងៃទី២១-២៣ ខែមីនា ឆ្នាំ២០២៥ នៅសួនច្បារមាត់បឹងតាកែវ ក្រុងដូនកែវ ខេត្តតាកែវ ដោយមានការរៀបចំកីឡាកម្សាន្ត ១០ប្រភេទ។
ពិធីបើកសម្ពោធជាផ្លូវការនឹងរៀបចំឡើងនៅថ្ងៃទី២២ ខែមីនា ឆ្នាំ ២០២៥ ចាប់ពីម៉ោង ១៦:០០-២២:០០ ដោយមានការចូលរួមពីលោកនាយករដ្ឋមន្ត្រី ហ៊ុន ម៉ាណែត និងភរិយា។
អភិបាលខេត្តតាកែវ លោក វ៉ី សំណាង បាននិយាយថា សម្រាប់ឆ្នាំ ២០២៥ នេះ ខេត្តតាកែវ បានទទួលធ្វើជាម្ចាស់ផ្ទះប្តូរវេនរៀបចំព្រឹត្តិការណ៍បុណ្យទន្លេលើកទី៩ ឆ្នាំ ២០២៥ ក្រោមប្រធានបទ«គុណតម្លៃនៃទន្លេ៖ ផ្សារភ្ជាប់វប្បធម៌ និងទេសចរណ៍ធម្មជាតិ»។
ព្រឹត្តិការណ៍នេះនឹងនាំមកនូវផលវិជ្ជមានច្រើនសម្រាប់សេដ្ឋកិច្ចប្រទេសកម្ពុជាទាំងមូល ជាពិសេសខេត្តតាកែវ ដែលជាទីតាំងរៀបចំ។ ព្រឹត្តិការណ៍នេះនឹងក្លាយជាវេទិកាដើម្បីលើកកម្ពស់ផលិតផលក្នុងស្រុក ជំរុញសេវាកម្មទេសចរណ៍ និងផ្សព្វផ្សាយតំបន់សក្ដានុពលទេសចរណ៍នានារបស់ខេត្តផងដែរ។
លោកថ្លែងថា៖«នេះជាលើកទី១ ហើយដែលខេត្តតាកែវ បានធ្វើជាម្ចាស់ផ្ទះរៀបចំបុណ្យទន្លេ។ នេះមោទនភាពមួយដែលខេត្តមានឱកាសក្នុងការបង្ហាញពីសក្តានុពលរបស់ខ្លួនលើគ្រប់វិស័យទៅដល់បងប្អូនប្រជាពលរដ្ឋខ្មែរ រួមទាំងភ្ញៀវបរទេស»។ លោកបន្តថា៖«យើងពិតជាមានសមត្ថភាពក្នុងការរៀបចំបុណ្យទន្លេនេះឡើង ដោយគិតមកដល់ថ្ងៃទី១៨ ខែមីនា គឺគណៈកម្មការអន្តរក្រសួងរៀបចំបានប្រមាណ ៨៥ ភាគរយហើយ»។
ជាមួយគ្នានេះក្នុងនាមអាជ្ញាធរខេត្ត លោក សំណាង បានអំពាវនាវឱ្យប្រជាពលរដ្ឋទៅលេងកម្សាន្តពិធីបុណ្យទន្លេនៅចុងសប្តាហ៍នេះយកចិត្តទុកដាក់ក្នុងការគ្រប់គ្រងសំរាមឱ្យបានត្រឹមត្រូវ ដើម្បីបង្កើតនូវបរិយាកាសល្អៗសម្រាប់អ្នកមកកម្សាន្ត។
លោកនិយាយថា៖«តាមរយៈនេះសូមអំពាវនាវចំពោះឪពុកម៉ែមាមីងបងប្អូនកូនក្មួយទាំងអស់ដែលអញ្ជើញមកបុណ្យទន្លេសូមជួយទុកដាក់សំរាមឱ្យបានត្រឹមត្រូវ និងសូមអញ្ជើញមកលេងឱ្យបានច្រើនកុះករដើម្បីបង្ហាញការគាំទ្រ ក៏ដូចជាផ្តល់ឱកាសសប្បាយរីករាយសម្រាប់លំហែបន្ទាប់ពីបំពេញការងាររួច»។
សេចក្តីជូនដំណឹងរបស់ក្រសួងទេសចរណ៍ បានលើកឡើងថា ដើម្បីជំរុញឱ្យព្រឹត្តិការណ៍បុណ្យទន្លេលើកទី៩ ប្រព្រឹត្តទៅដោយភាពអធិកអធម គណៈកម្មការអន្តរក្រសួងនឹងរៀបចំកម្មវិធីសំខាន់ៗដូចជា ការសម្តែងផ្ទាល់នូវទស្សនីយភាពសិល្បៈ ការប្រគំតន្ត្រីដោយមានការចូលរួមពីក្រុមសិល្បករ សិល្បការិនី និងតារាចម្រៀងល្បីៗប្រចាំព្រះរាជាណាចក្រកម្ពុជា ព្រមទាំងការអុជកាំជ្រួចអបអរព្រឹត្តិការណ៍បុណ្យទន្លេ លើកទី៩ ឆ្នាំ២០២៥។
ក្រៅពីនោះក៏មានការតាំងពិព័រណ៍សមិទ្ធផលក្នុងវិស័យទេសចរណ៍ មហោស្រពម្ហូបអាហារ និងភេសជ្ជៈ ការតាំងពិព័រណ៍ពាណិជ្ជកម្ម ផលិតផលកសិ-ទេសចរណ៍ និងផលិតផលក្នុងស្រុក ព្រមទាំងការ និងគម្រោងអភិវឌ្ឍន៍នានារបស់ខេត្តតាកែវ។
សម្រាប់កម្មវិធីកីឡាគឺមានចំនួន ១០ប្រភេទ ដូចជា កីឡាជិះកង់ចម្ងាយ ៧៥គីឡូម៉ែត្រ ភ្នំពេញ-តាកែវ, កីឡារត់កម្សាន្តមហាជន ១២០០ នាក់, កីឡា អុកចត្រង្គមហាជន, កីឡា កម្សាន្ត រែកបាយខុម លោតម៉ឹក,កីឡា បាល់ទះ មហាជន, កីឡា ប៉ូល (បេតង់) មហាជន, កីឡា ទូក កានូ កាយ៉ាក មហាជន,ការបង្ហោះគោមរួមគ្នា ៥០០គោម, កីឡាគុនខ្មែរ, និង កីឡាសម្ដែងប៉ារ៉ាប៉ូទ័រ។
ព្រឹត្តិការណ៍បុណ្យទន្លេ បានរៀបចំលើកដំបូងក្នុងឆ្នាំ ២០១៥ នៅខេត្តក្រចេះ, ឆ្នាំ២០១៦ ខេត្តស្ទឹងត្រែង, ឆ្នាំ ២០១៧ នៅខេត្តកំពង់ចាម-ខេត្តត្បូងឃ្មុំ, ឆ្នាំ ២០១៨ ខេត្តកណ្ដាល, ឆ្នាំ ២០១៩ ខេត្តកំពង់ឆ្នាំង, ឆ្នាំ ២០២០ នៅខេត្តបាត់ដំបង មុនពេលត្រូវផ្អាកចំនួន ២ ឆ្នាំដោយសារវិបត្តិនៃការរីករាលដាលជំងឺកូវីដ១៩។ បន្ទាប់ពីស្ថានភាពជំងឺកូវីដ១៩ អាចគ្រប់គ្រងបានឡើងវិញ រដ្ឋាភិបាលបានសម្រេចរៀបចំពិធីបុណ្យទន្លេ លើកទី៧ កាលពីឆ្នាំ ២០២៣ នៅខេត្តកំពង់ធំ និងលើកទី ៨ ក្នុងឆ្នាំ ២០២៤ នៅខេត្តសៀមរាប៕
