ការអនុវត្តកម្មវិធី PISA មានគោលបំណងវាស់ស្ទង់សមត្ថភាពរបស់សិស្សកម្ពុជាអាយុ ១៥ឆ្នាំនៅកម្រិតមធ្យមសិក្សាទាំងចំណេះដឹង និងបំណិនលើផ្នែកអំណាន គណិតវិទ្យា និងវិទ្យាសាស្ត្រ ស្របតាមកម្រិតសមត្ថភាពសកល និងអាចប្រៀបធៀបបានជាមួយនឹងប្រទេសទូទាំងពិភពលោក។ រូបថត សហការី
ភ្នំពេញ៖ កម្មវិធីអន្តរជាតិស្តីពី រង្វាយតម្លៃការសិក្សារបស់សិស្សឆ្នាំ២០២៥ (PISA-2025) គ្រោងនឹងដាក់អនុវត្ដនាពេលខាងមុខដោយក្រសួងអប់រំ យុវជន និងកីឡា ដើម្បីពង្រឹងសមត្ថកិច្ចសិស្សអាយុ ១៥ឆ្នាំ បំណងឆ្លើយតបទៅនឹងស្ដង់ដាអន្ដរជាតិ។
លោករដ្ឋមន្ដ្រីក្រសួងអប់រំ យុវជន និងកីឡា ហង់ជួន ណារ៉ុន បានធ្វើជាអធិបតីភាពក្នុងពិធីបើកសិក្ខាសាលាណែនាំបច្ចេកទេសការត្រៀមអនុវត្តកម្មវិធីអន្តរជាតិស្តីពី រង្វាយតម្លៃការសិក្សារបស់សិស្សឆ្នាំ២០២៥ (PISA-2025) ថ្ងៃទី១៩ ខែមីនា នៅវិទ្យាស្ថានជាតិអប់រំ។
លោកបានថ្លែងថា៖ «បន្ទាប់ពីស្តាប់របាយការណ៍សង្ខេបនៃដំណើរការតេស្តអន្តរជាតិ PISA ២០២៥ រួចមក ខ្ញុំសូមបញ្ជាក់ពីសារៈសំខាន់ នៃតេស្តអន្តរជាតិ PISA ក្នុងការវាយតម្លៃប្រព័ន្ធអប់រំកម្ពុជា និងប្រសិទ្ធភាពការងាររបស់ក្រសួងអប់រំ យុវជន និងកីឡា ក្នុងកិច្ចខិតខំប្រឹងប្រែងអនុវត្តកំណែទម្រង់វិស័យអប់រំកម្ពុជា ឆ្លើយតបនឹងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលអាណត្តិទី៧»។
ការអនុវត្តកម្មវិធី PISA មានគោលបំណងវាស់ស្ទង់សមត្ថភាពរបស់សិស្សកម្ពុជាអាយុ ១៥ឆ្នាំនៅកម្រិតមធ្យមសិក្សាទាំងចំណេះដឹង និងបំណិនលើផ្នែកអំណាន គណិតវិទ្យា និងវិទ្យាសាស្ត្រ ស្របតាមកម្រិតសមត្ថភាពសកល និងអាចប្រៀបធៀបបានជាមួយនឹងប្រទេសទូទាំងពិភពលោក ក៏ដូចជាយល់ដឹងអំពីស្ថានភាពសិស្សអាយុ១៥ឆ្នាំ ក្រុមគ្រួសារ គ្រូបង្រៀនសាលារៀន និងសហគមន៍ក្នុងបរិបទកម្ពុជា។
លើសពីនេះ ការអនុវត្តកម្មវិធី PISA កំណត់បាននូវកិច្ចអន្តរាគមន៍គោលនយោបាយ និងវិធានការពាក់ព័ន្ធ ដើម្បីលើកកម្ពស់គុណភាពប្រព័ន្ធអប់រំកម្ពុជាកម្រិតមធ្យមសិក្សាឆ្លើយតបនឹងស្តង់ដាអប់រំកម្រិតអន្តរជាតិ និងផ្តល់ជាភ័ស្តុតាងទិន្នន័យពីកម្រិតសមត្ថភាពសិស្សអាយុ ១៥ឆ្នាំ ដែលកំពុងសិក្សានៅកម្រិតមធ្យមសិក្សា ឆ្លើយតបនឹងសូចនាករគុណភាពអប់រំ នៃគោលដៅអភិវឌ្ឍន៍ប្រកបដោយចីរភាព។
លោក ណារ៉ុន បានឱ្យដឹងលើបណ្ដាញសង្គមរបស់លោកថា៖ «ក្រសួងអប់រំ យុវជន និងកីឡា បានចូលរួមអនុវត្តកម្មវិធី PISA ចំនួន ៣ លើករួចមកហើយ លើកទី១ គឺកម្រិតសាកល្បងសម្រាប់ប្រទេសកំពុងអភិវឌ្ឍន៍ នៅឆ្នាំ២០១៧ (PISA-D) ក្នុងនោះមានប្រទេសចំនួន៩ បានចូលរួម»។
លោកបានបន្ដថា៖ «លើកទី២ PISA ២០២២ គឺជាកម្មវិធីពេញលេញ មានប្រទេសចំនួន ៨១ ចូលរួម, និងលើកទី៣ PISA ២០២៥ ដែលភាគច្រើនសុទ្ធតែជាប្រទេសអភិវឌ្ឍន៍ និងជាសមាជិកអង្គការ OECD សរុប ៩១ប្រទេស។ ក្រសួងអប់រំ យុវជន និងកីឡា គ្រោងនឹងចុះប្រមូលទិន្នន័យផ្លូវការសម្រាប់កម្មវិធី PISA ២០២៥ នៅសប្តាហ៍ទី៤ ខែមិថុនា ឆ្នាំ២០២៥ នេះ»។
លទ្ធផលនៃកម្មវិធី PISA បានក្លាយជារង្វាស់មួយដ៏សំខាន់ សម្រាប់វាស់វែងវឌ្ឍនភាពនៃប្រព័ន្ធអប់រំទាំងមូល ធៀបនឹងស្តង់ដាអន្តរជាតិ ជាពិសេសឆ្លើយតបនឹងបរិវត្តកម្មសេដ្ឋកិច្ចក្នុងយុគសម័យឌីជីថល ដែលទាមទារការផ្តោតលើការកសាងមូលធនមនុស្សដែលមានសមត្ថភាពសកល។
លោករដ្ឋមន្ដ្រីបានលើកឡើងថា ក្រសួងបានជ្រើសរើសយកសូចនាករ លទ្ធផលនៃកម្មវិធីអន្តរជាតិស្តីពី រង្វាយតម្លៃលទ្ធផលសិក្សារបស់សិស្ស (PISA) ផ្តោតលើពិន្ទុជាមធ្យម នៃមុខវិជ្ជាអំណាន គណិតវិទ្យា និងវិទ្យាសាស្ត្រ។
វារួមជាមួយនឹងសូចនាករសមិទ្ធកម្មគន្លឹះចំនួនពីរទៀត រួមមានអត្រារួមនៃការសិក្សានៅមធ្យមសិក្សាបឋមភូមិ និងមធ្យមសិក្សាទុតិយភូមិ និងអត្រាបោះបង់ការសិក្សានៅមធ្យមសិក្សាបឋមភូមិ និងមធ្យមសិក្សាទុតិយភូមិ ដើម្បីវាស់វែងសមិទ្ធកម្មអប់រំនៅក្នុងការអនុវត្តយុទ្ធសាស្ត្របញ្ចកោណ ដំណាក់កាលទី១។
លោកបានអរគុណដល់កិច្ចខិតខំប្រឹងប្រែងរបស់អ្នកពាក់ព័ន្ធក្នុងការគាំទ្រការហ្វឹកហាត់តេស្តរង្វាយតម្លៃថ្នាក់ជាតិ តេស្តថ្នាក់តំបន់ (SEA-PLM) និងតេស្តអន្តរជាតិ (PISA) នៅតាមសាលារៀន សំដៅគាំទ្រសាលារៀន គ្រូបង្រៀន និងសិស្សឱ្យបានជ្រាប និងត្រៀមខ្លួនសម្រាប់ការធ្វើតេស្តកម្រិតអន្តរជាតិ PISA នៅក្នុងខែមិថុនា ឆ្នាំ២០២៥ ខាងមុខនេះ។
លោកបានបន្ដថា ការប្រឡងប្រណាំងនឹងត្រូវបានធ្វើឡើងដើម្បីលើកកម្ពស់លទ្ធផលតេស្តអន្តរជាតិ PISA នៅតាមសាលាគោលដៅគ្រប់ខេត្ត ដោយមន្ទីរអប់រំត្រូវចូលរួមគាំទ្រនៅតាមខេត្តរៀងៗខ្លួន ហើយចំពោះសាលាដែលមានលទ្ធផលតេស្ត PISA ខ្ពស់ នឹងក្លាយជាសាលារៀនគំរូ ដោយជាគន្លឹះ គឺត្រូវបំប៉នសិស្សឱ្យយល់ច្បាស់ពីតេស្ត PISA ពង្រឹងសមត្ថភាពសិស្សបន្ថែម និងថែមម៉ោងរៀន និងបង្រៀន៕
.jpg)
