លោក ហ៊ុន សែន បំពាក់ឋានន្តរសក្តិផ្កាយមាស ៥ ផុតលេខ ដល់លោក ទៀ បាញ់ និងលោកស្រី ម៉ែន សំអន នៅថ្ងៃទី២១ ខែមីនា។ AKP
លោក ស ខេង មិនអាចទទួលបានឋានន្តរសក្តិជានាយឧត្តមសេនីយ៍ផុតលេខ ផ្កាយមាស ៥ ទេ ដោយសារលោកជាស៊ីវិល មិនមែនកងទ័ពដូចលោក ទៀ បាញ់ និងលោកស្រី ម៉ែន សំអន។ នេះជាការពន្យល់របស់លោក ហ៊ុន សែន ប្រមុខរដ្ឋស្តីទី។
ការលើកឡើងនេះឆ្លើយតបទៅនឹងមតិមួយដែលលើកឡើងចោទជាសំណួរថា ហេតុអ្វី លោក ស ខេង ដែលជាអនុប្រធានគណបក្សប្រជាជនកម្ពុជា មិនទទួលបានឋានន្តរសក្ដិនេះ។
លោក ហ៊ុន សែន ពន្យល់ថា៖ «មាន comment មួយថា បាត់សម្ដេច ស ខេង។ ខ្ញុំក៏បានចូលទៅឆ្លើយតបថា សម្ដេច សខេង ជាស៊ីវិល គាត់មិនពាក់សក្តិដូចជាទាហាននោះទេ។ តាមពិត សម្ដេចក្រឡាហោម ស ខេង នៅឆ្នាំ១៩៩៧ ឬ ១៩៩៨ ពេលនោះគាត់និយាយថា បើសិនជាខ្ញុំពាក់សក្តិ ខ្ញុំពាក់តែសក្តិ ៥ ទេ អត់ពាក់សក្តិធំជាងនេះទេ ហើយពេលនោះកំពុងមានអតិផរណាសក្តិ។ សូមកុំព្យាយាមមកបំបែកផ្ទៃក្នុងគណបក្សប្រជាជន»។
ប្រធានព្រឹទ្ធសភា និង ជាប្រមុខរដ្ឋស្ដីទី នៅព្រឹកថ្ងៃទី២១ខែមីនានេះ បានបំពាក់ឋានន្តរសក្តិនាយឧត្តមសេនីយ៍ផ្កាយមាស ៥ ផុតលេខ សម្រាប់លោក ទៀ បាញ់ និង លោកស្រី ម៉ែន សំអន ដែលបានចូលរួមក្នុងការការពារជាតិ និងទឹកដី។
បច្ចុប្បន្ននេះ មន្ត្រីជាន់ខ្ពស់ដែលមានឋានន្តរសក្តិនាយឧត្តមសេនីយ៍ផ្កាយមាស ៥ ផុតលេខមានចំនួន ៤រូប រួមមានលោក ហេង សំរិន, លោក ហ៊ុន សែន និងលោក ទៀ បាញ់ និងលោកស្រី ម៉ែន សំអន ដែលត្រូវបានបំពាក់ឋានន្តរសក្តិនៅថ្ងៃនេះ។ នេះបើតាមការបញ្ជាក់របស់លោក ហ៊ុន សែន។
លោក ហ៊ុន សែន ថ្លែងថា លោក ទៀ បាញ់ និងលោកស្រី ម៉ែន សំអន មានគុណបំណាច់ក្នុងកិច្ចការបម្រើជាតិ និងចូលរួមក្នុងការបង្កើតរាជនិយម ដែលសមនឹងទទួលបានឋានន្តរសក្តិនេះ។
នៅក្នុងពិធីបំពាក់សក្តិនេះ លោក ទៀ បាញ់ បានប្រកាសប្ដេជ្ញាការពារសមិទ្ធផលរបស់រាជរដ្ឋាភិបាល និងកម្មវិធីនយោបាយ ការពារព្រះមហាក្សត្រ ការពាររដ្ឋធម្មនុញ្ញ ការពាររាជរដ្ឋាភិបាលស្របច្បាប់ និងការពារសន្តិភាព ឯករាជ្យ និងបូរណភាពទឹកដីឲ្យបានគងវង់ស្ថិតស្ថេរគ្រប់កាលៈទេសៈដែលធ្វើឲ្យប្រជាជនមានឱកាសពេញលេញសម្រាប់អភិវឌ្ឍសង្គមនិងសេដ្ឋកិច្ច។
លោកក៏បានថ្លែងដែរថា៖ «ប្ដេជ្ញាវាយកម្ទេចរាល់ការឃុបឃិតប៉ុនប៉ងបំផ្លាញសន្តិភាព ឧបាយកលបង្កើតឲ្យមានបដិវត្តន៍ពណ៌ នៅលើទឹកដីកម្ពុជា និងប្រឆាំងដាច់ខាតចំពោះការជ្រៀតជ្រែកកិច្ចការផ្ទៃក្នុងកម្ពុជា ពីមជ្ឈដ្ឋានខាងក្រៅ»។
លោក យង់ ពៅ អគ្គលេខាធិការរាជបណ្ឌិត្យសភាកម្ពុជា យល់ឃើញថា លោក ទៀ បាញ់ និង លោកស្រី ម៉ែន សំអន សក្ដិសមនឹងទទួលបានឋានន្តរសក្តិនេះ ដោយសារលោកទាំងពីរបានមានគុណបំណាច់ក្នុងការស្រោចស្រង់កម្ពុជាពីផេះផង់នៃសង្គ្រាម រហូតដល់មានការអភិវឌ្ឍដូចសព្វថ្ងៃ។
លោកថា៖ «ដូច្នេះ ឥស្សរជនទាំងពីររូបដែលដំឡើងឋានន្តរសក្តិជាឧត្តមសេនីយ៍ផុតលេខនេះ គឺជាសក្ដិសមនឹងអ្វីដែលលោកគួរតែទទួលបាន ព្រោះលោកបានចូលរួមក្នុងដំណើរសន្តិភាព និងអភិវឌ្ឍកម្ពុជា»៕
