លោក ហេ គៀន ប្រធានការិយាល័យសេដ្ឋកិច្ច និងអភិវឌ្ឍន៍សហគមន៍ក្រុងស្ទឹងសែន។ ហ្វេសប៊ុក
តុលាការខេត្តកំពង់ធំ បានសម្រេចផ្ដន្ទាទោស លោក ហេ គឿន ប្រធានការិយាល័យសេដ្ឋកិច្ច និងអភិវឌ្ឍន៍សហគមន៍ក្រុងស្ទឹងសែន ឲ្យជាប់ពន្ធនាគារ ៧ ឆ្នាំ និងកសិករឈ្មោះ សែ សុងហេង ត្រូវពន្ធនាគារ ៦ឆ្នាំ ករណីបំផ្លាញព្រៃលិចទឹកបឹងទន្លេសាប។ នេះបើតាមអង្គភាពប្រឆាំងអំពើពុករលួយ (ACU)។
នៅក្នុងរបាយការណ៍របស់អង្គភាពប្រឆាំងអំពើពុករលួយ ចុះថ្ងៃទី២៤ ខែមីនា បានឲ្យដឹងថា អង្គភាពនេះមិនទាន់សម្រេចថាតើត្រូវបន្តនីតិវិធីលើការលើកឡើងរបស់ភរិយាលោក ហេ គឿន ឈ្មោះ ប៉ិច ឆេងអ៊ីម និង កូនស្ត្រីឈ្មោះ សុខ គន្ធា និងអ្នកសារព័ត៌មានបីរូប គឺលោក គង់ កាន, លោក ហ៊ុយ ឧត្តម និងលោក កែវ សាវី ពាក់ព័ន្ធនឹងការអត្ថាធិប្បាយលើករណីនេះ ដែល ACU ចោទថាជាករណីញុះញង់ប្រឆាំងនឹងអំពើពុករលួយ។
កាលពីខែកក្កដា ឆ្នាំ២០២៤ លោក ហេ គឿន ត្រូវបានបញ្ជូនពីអង្គភាពប្រឆាំងអំពើពុករលួយទៅតុលាការខេត្តកំពង់ធំ ពាក់ព័ន្ធនឹងអំពើបំផ្លាញដោយចេតនា និងការគៃបំបាត់ដោយទុច្ចរិត ក្នុងការបំបាត់ដីព្រៃលិចទឹកក្នុងខេត្តកំពង់ធំ។ សំណុំរឿងនេះ ក៏មានជាប់ពាក់ព័ន្ធនឹងកសិករម្នាក់ ឈ្មោះ សែ សុងហេង ដែលត្រូវបានចោទប្រកាន់ពីបទសំគំនិតនៃបទល្មើសទាំងពីរ។
កាលពីកន្លងទៅ អ្នកស្រី ប៉ិច ឆេងអ៊ីម បានលើកឡើងថា ករណីឈូសឆាយព្រៃលិចទឹកនៅតំបន់៣ ដែលជាតំបន់អភិរក្សក្នុងបឹងទន្លេសាប មានជាប់ពាក់ព័ន្ធនឹងអ្នកមានអំណាចដែលមានអំណាចលើលោក ហេ គឿន នៅខេត្តកំពង់ធំ។
លោក ហ៊ុយ ឧត្តម មកពីសារព័ត៌មាន Oudom TV និងគ្រួសារលោក ហេ គឿន។ ហ្វេសប៊ុក
អ្នកស្រីក៏ធ្លាប់លើកឡើងដែរថា សំណុំរឿងនេះមានឧកញ៉ាពីររូបជាប់ពាក់ព័ន្ធ ប៉ុន្តែ អ្នកស្រីមិនអាចបញ្ចេញឈ្មោះបាន។ អ្នកស្រីថា ថៅកែដីធំៗទាំងពីរនេះធ្លាប់មានជម្លោះ ហើយឲ្យប្ដីអ្នកស្រីទៅសម្របសម្រួល។ បន្ទាប់មកភាគីម្ខាងនៃគូជម្លោះនេះបានជោគជ័យ ចំណែកប្ដីអ្នកស្រីត្រូវគេ«គេគុំធ្វើស៊ី»។
លោក សយ ច័ន្ទវិចិត្រ អ្នកនាំពាក្យអង្គភាពប្រឆាំងអំពើពុករលួយបានប្រាប់ភ្នំពេញប៉ុស្តិ៍ថា ករណី«ញុះញង់» ដោយប្រពន្ធ, កូនស្រី ហេ គឿន និង អ្នកសារព័ត៌មាន ឈ្មោះ គង់ កាន (Kong Kan TV) ឈ្មោះ ហ៊ុយ ឧត្តម (Oudom Tv) និងឈ្មោះ គង់ សាវី ដែលបានអត្ថាធិប្បាយថា ACU បានឃុំខ្លួនលោក ហេ គឿន ៦ខែ គឺជាព័ត៌មានមិនពិត ព្រោះ ACU មិនមានសិទ្ធិក្នុងការឃុំខ្លួនទេ។
លោកបន្តថា ការលើកឡើងរបស់អ្នកខាងលើថា លោក ហេ គឿន ជាបុគ្គលស្អាតស្អំមិនបានប្រព្រឹត្តិល្មើសជាដើម គឺការលើកឡើងដែលគ្មានមូលដ្ឋាន មិនស្របនឹងច្បាប់។
លោកថ្លែងថា៖ «បន្ថែមលើនេះ សវនាការនៅសាលាដំបូងខេត្តកំពង់ធំកន្លងទៅនេះ តុលាការបានសម្រេចផ្តន្ទទោស ហេ គឿន ជាប់ពន្ធនាគារ ៧ ឆ្នាំ និង ឈ្មោះ សែ សុងហេង ដាក់ពន្ធនាគារ ៦ឆ្នាំ ការសម្រេចនេះបញ្ជាក់ថា ហេ គឿន ពិតជាបានប្រព្រឹត្តិល្មើស ស្របតាមភស្តុតាងក្នុងសំណុំរឿងដែលអង្គភាពបានកសាង និងបញ្ជូនទៅតុលាការ។ ដូចនេះការលើកឡើងរបស់ពួកគាត់មិនបានឆ្លុះបញ្ចាំងពីការពិតឡើយ អង្គភាពនឹងបន្តនីតិវិធីតាមផ្លូវច្បាប់ វិធានការនេះក៏ជាការគាំទ្រ និងការពារ ដល់អ្នកសារព័ត៌មានដែលប្រកបដោយវិជ្ជាជីវៈដ៏ទៃផងដែរ»។
ពាក់ព័ន្ធនឹងសំណួរថាតើ ករណី ហេ គឿន និង សែ សុងហេង នៅមានជនសង្ស័យបន្ថែមទៀតឬយ៉ាងណា លោក ច័ន្ទវិចិត្របញ្ជាក់ថា លោកមិនទាន់ផ្តល់ព័ត៌មានបាន មូលហេតុប៉ះពាល់ដល់ការសម្ងាត់នៃការស៊ើបអង្កេត៕
