ពលរដ្ឋដែលប្រើប័ណ្ណ ប.ស.ស. ទៅទទួលសេវានៅមន្ទីរពេទ្យព្រះអង្គឌួង កាលពីថ្ងៃទី១០ ខែមីនា។ ប.ស.ស.
ប្រជាពលរដ្ឋមួយចំនួនមិនសប្បាយចិត្តនៅពេលពួកគាត់មិនអាចចុះឈ្មោះធ្វើប័ណ្ណសុខភាព ប.ស.ស. នៅក្នុងដំណើរលើកទីមួយទៅកាន់ស្នាក់ការបេឡាជាតិសន្តិសុខសង្គម ដោយសារមិនបានធ្វើវិញ្ញាបនបត្រនៃអ្នកសេដ្ឋកិច្ចក្រៅប្រព័ន្ធដែលជាលក្ខខណ្ឌតម្រូវថ្មី។
ក្នុងមួយរយៈពេលចុងក្រោយនេះ ប្រជាពលរដ្ឋដែលមិនបានតាមដានអំពីការធ្វើបច្ចុប្បន្នភាពនៃការចុះឈ្មោះប្រើប្រាស់ប.ស.ស. បានប្រមូលឯកសារពាក់ព័ន្ធដើម្បីធ្វើដំណើរទៅទីស្នាក់ការកណ្ដាលរបស់ប.ស.ស. នៅខណ្ឌសែនសុខ ក្នុងនាមជាបុគ្គលស្វ័យនិយោជន៍។
ប៉ុន្តែ ដំណើរលើកទី១បានត្រឹមទទួលការណែនាំឲ្យចុះឈ្មោះនៅលើកម្មវិធីទូរស័ព្ទដើម្បីទទួលបានវិញ្ញាបនបត្រជាអ្នកសេដ្ឋកិច្ចក្រៅប្រព័ន្ធ ដែលជាលក្ខខណ្ឌតម្រូវថ្មី ដោយត្រូវបញ្ចូលឯកសារអត្តសញ្ញាណប័ណ្ណ រូបថតកាត និងទីតាំងអាជីវកម្ម និងព័ត៌មានបន្ថែមទៀត។ កិច្ចការនេះមិនពិបាកសម្រាប់អ្នកដែលចេះប្រើប្រាស់ទូរស័ព្ទ ប៉ុន្តែ នៅតែជាបញ្ហាសម្រាប់ពលរដ្ឋមួយចំនួន។
អ្នកដែលបំពេញលើកម្មវិធីទូរស័ព្ទនេះរួចដោយជោគជ័យ ត្រូវរង់ចាំការត្រួតពិនិត្យរហូតដល់មានសញ្ញាយល់ព្រម។ បន្ទាប់មក អ្នកស្នើសុំត្រូវព្រីនឯកសារនេះ ហើយយកទៅកាន់ស្នាក់ការប.ស.ស. ដើម្បីចុះឈ្មោះប្រើប្រាស់សេវា ប.ស.ស.។
ការវិវិត្តថ្មីនេះ ខុសពីឆ្នាំមុនៗដែលបុគ្គលស្វ័យនិយោជន៍គ្រាន់តែកាន់ឯកសារពាក់ព័ន្ធ និងឆ្លើយសំណួរពាក់ព័ន្ធនឹងអាជីវកម្ម ហើយអាចចុះឈ្មោះបានភ្លាមៗតែម្ដង។
លោក ហេង សុផាន់ណារិទ្ធ អគ្គនាយករងបេឡាជាតិសន្តិសុខសង្គម បានប្រាប់ភ្នំពេញប៉ុស្តិ៍ថា លោកទទួលស្គាល់ថា ពិតជាមានការលំបាកបន្តិចនៅដំណាក់កាលដំបូងនៅពេលមានការតម្រូវឲ្យចុះឈ្មោះដើម្បីបានវិញ្ញាបនបត្រសេដ្ឋកិច្ចក្រៅប្រព័ន្ធ។
ប៉ុន្តែ លោកបានបញ្ជាក់ថា ការចុះឈ្មោះយកវិញ្ញាបនបត្រនេះអាចធ្វើបានតាមកម្មវិធីទូរស័ព្ទដៃ ឬ ធ្វើតាមរយៈភ្នាក់ងារនៅតាមធនាគារដៃគូចំនួន ៦ រួមមានធនាគារអភិវឌ្ឍន៍ជនបទនិងកសិកម្ម ធនាគារសហគ្រាសធុនតូចនិងមធ្យមកម្ពុជា ធនាគារអេស៊ីលីដា ធនាគារអេប៊ីអេ ធនាគារវីង និងធនាគារវឌ្ឍនៈ ដែលផ្ដល់សេវានេះ។
បន្ទាប់ពីបានវិញ្ញាបនបត្រហើយ អ្នកស្នើសុំអាចយកទៅកាន់ប.ស.ស. និងឆ្លើយសំណួរពីបុគ្គលិកប.ស.ស. អំពីអាជីវកម្មរបស់អ្នកស្នើសុំ។
ពាក់ព័ន្ធការតម្រូវឲ្យអ្នកស្នើសុំប.ស.ស.ដែលជាបុគ្គលស្វ័យនិយោជន៍ត្រូវបង្ហាញអាជីវកម្មច្បាស់លាស់ លោក សុផាន់ណារិទ្ធ បញ្ជាក់ថា ប.ស.ស. មិនហាមសាធារណជនមិនឲ្យស្នើសុំប្រើប្រាស់ ប.ស.ស.នោះទេ គ្រាន់តែចង់ឲ្យមានភាពច្បាស់លាស់ថាតើអ្នកស្នើសុំមានមុខរបរអ្វីពិតប្រាកដ។
មួយវិញទៀត គឺដើម្បីចៀសវាងការមិនទទួលខុសត្រូវរបស់ថៅកែក្រុមហ៊ុន ដូចជាករណីក្រុមហ៊ុនមិនបង់ប.ស.ស. ឲ្យបុគ្គលិក ហើយតម្រូវឲ្យបុគ្គលិកបង់ដោយខ្លួនឯង។
បច្ចុប្បន្ននេះ ប.ស.ស. ដែលស្ថិតក្រោមការគ្រប់គ្រងរបស់ក្រសួងការងារ និងបណ្ដុះបណ្ដាលវិជ្ជាជីវៈ មានសមាជិកសរុបជាង ២,៧៧លាននាក់៕
