រូបថតលោក ហ៊ុន សាន ដែលជាបងប្រុសទី១ របស់លោក ហ៊ុន សែន និងកំពុងឈឺធ្ងន់។ SHS
លោក ហ៊ុន សែន ប្រធានព្រឹទ្ធសភាកំពុងមានទុក្ខ ដោយសារតែភរិយារបស់លោកកំពុងឆ្លងកាត់ការវះកាត់ ខណៈដែលបងប្រុសទីមួយរបស់លោក គឺលោក ហ៊ុន សាន កំពុងឈឺធ្ងន់។ លោកបញ្ជាក់ថា នាពេលខាងមុខនេះ ភរិយាលោកនឹងអវត្តមានពីកម្មវិធីនានាមួយរយៈ។
ថ្លែងនៅលើបណ្ដាញសង្គមនៅព្រឹកថ្ងៃអង្គារ ទី២៤ ខែមីនានេះ លោក សរសេរថា៖ «ពេលនេះខ្ញុំពិតជាកំពុងមានទុក្ខធ្ងន់។ ម្ខាងភរិយាត្រូវវះកាត់។
បើទោះជាឆ្លងផុតដំណាក់កាលគ្រោះថ្នាក់មកដល់សុវត្ថិភាពហើយក៏ដោយតែក្នុងឋានៈជាស្វាមីនៅតែមានកង្វល់ព្រោះមិនអាចនៅកំដរនិងមើលថែទាំភរិយាបាន។
ចំពោះករណីរបស់លោក ហ៊ុន សាន វិញ លោកបញ្ជាក់ថា បងប្រុសរបស់លោកមិនអាចឆ្លងផុតពីការលាចាកលោកក្នុងពេលខ្លីខាងមុខនេះបានឡើយ។
លោកថា៖ «ក្នុងក្រុមគ្រួសារបានត្រៀមទទួលការឈឺចាប់ដែលមិនអាចជៀសវាងបាននេះរួចហើយ»។
បើតាមការបញ្ជាក់របស់លោក ភរិយារបស់លោកជំរុញឲ្យលោកទៅមើលបងប្រុសជាពិសេសក្នុងករណីបងប្រុសចែកឋាន។ លោកបញ្ជាក់ថា ក្នុងពេលឆាប់ៗខាងមុខនេះ គ្រប់កម្មវិធីច្បាស់ជាមិនមានវត្តមានភរិយារបស់លោកមួយរយៈ៕
លោក ហ៊ុន សែន កំពុងមើលថែភរិយា គឺលោកស្រី ប៊ុន រ៉ានី។ SHS
