លោក ស សុខា (ឆ្វេង) និងលោក វិល័យ ឡាខាំហ្វង ក្នុងជំនួបនៅប្រទេសឡាវ។ ស សុខា
រដ្ឋមន្ត្រីក្រសួងមហាផ្ទៃកម្ពុជា លោក ស សុខា និងលោក វិល័យ ឡាខាំហ្វង (Vilay Lakham Phong)រដ្ឋមន្ត្រីក្រសួងសន្តិសុខសាធារណៈឡាវ បានជជែកពិភាក្សាគ្នានិងព្រមព្រៀងបន្តកិច្ចសហប្រតិបត្តិការលើការទប់ស្កាត់បទល្មើសឆបោកតាមប្រព័ន្ធបច្ចេកវិទ្យា និង ការប្រយុទ្ធប្រឆាំងគ្រឿងញៀនខុសច្បាប់សម្រាប់ឆ្នាំ២០២៥។
ការពិភាក្សានេះធ្វើឡើងក្នុងអំឡុងនៃទស្សនកិច្ចរបស់លោក ស សុខា ទៅប្រទេសឡាវជិតខាងពីថ្ងៃទី២៤ ដល់ទី២៦ ខែមីនានេះ។
លោក រ៉េន រតនៈ អ្នកនាំពាក្យខុទ្ទកាល័យលោក ស សុខា ថ្លែងប្រាប់អ្នកសារព័ត៌មាននៅថ្ងៃទី២៦ ខែមីនានេះថា ក្នុងជំនួបទ្វេភាគីនេះ រដ្ឋមន្ត្រីទាំងពីរក៏បានពិភាក្សាអំពីការស្រាវជ្រាវទៅលើមុខសញ្ញាប្រព្រឹត្តបទល្មើសផ្សេងៗដូចជា ជួញដូរមនុស្ស និងសភាពការនៅតាមបន្ទាត់ព្រំដែនរវាងប្រទេសទាំងពីរ។
រដ្ឋមន្ត្រីទាំងពីរក៏បានដឹកនាំវាយតម្លៃលើកិច្ចសហប្រតិបត្តិការរវាងក្រសួងទាំងពីរនៅឆ្នាំ២០២៤ និងបានចុះកិច្ចព្រមព្រៀងលើកិច្ចសហប្រតិបត្តិការសម្រាប់ឆ្នាំ២០២៥បន្តទៀត។
ក្នុងកិច្ចព្រមព្រៀងនេះ ក៏មានវត្តមានអភិបាលខេត្ត និងស្នងការនៃខេត្តជាប់ព្រំដែនជាមួយឡាវ ដូចជាខេត្តព្រះវិហារ ស្ទឹងត្រែង និងរតនគិរី ដើម្បីធានាដល់ការអនុវត្តនៃកិច្ចព្រមព្រៀងនេះ។
លោក រ៉េន រតនៈ ថ្លែងថា៖ «ភាគីទាំងពីរបានបង្ហាញឆន្ទៈ និងការប្ដេជ្ញាចិត្តថា អ្វីដែលនៅសេសសល់យើងនឹងខិតខំជំរុញអនុវត្តឲ្យបានសកម្មថែមទៀត រួមជាមួយនឹងអ្វីដែលបានចុះនៅក្នុងកំណត់ហេតុនៃកិច្ចសហប្រតិបត្តិការឆ្នាំ២០២៥»។
លោកបន្តថា៖ «កំណត់ហេតុនេះមានការងារសំខាន់ៗពាក់ព័ន្ធនឹងការងារថែរក្សាសណ្ដាប់ធ្នាប់ ស្ថិរភាពសង្គម ការត្រួតពិនិត្យគ្រឿងញៀន ការប្រឆាំងនឹងអំពើជួញដូរមនុស្ស កិច្ចសហការការពារសន្តិសុខសណ្ដាប់ធ្នាប់តាមព្រំដែន ការចេញចូលឆ្លងកាត់ព្រំដែន ការទប់ស្កាត់និងបង្ក្រាបការឆបោកតាមប្រព័ន្ធទូរគមនាគមន៍និងបទល្មើសបច្ចេកវិទ្យាព័ត៌មាន ការងារផ្ទេរទណ្ឌិត ការផ្លាស់ប្ដូរគណៈប្រតិភូជាន់ខ្ពស់ និងកិច្ចសហប្រតិបត្តិការក្នុងវិស័យបណ្ដុះបណ្ដាល»។
បទល្មើសដែលតែងកើតឡើងឆ្លងកាត់ព្រំដែនឡាវ មកកម្ពុជា គឺបទល្មើសជួញដូរគ្រឿងញៀន ដែលដឹកចូលកម្ពុជាឆ្លងកាត់ខេត្តស្ទឹងត្រែង ឬ ព្រះវិហារ។ កាលពីខែពេលថ្មីៗនេះ គ្រឿងញៀនជាង ៤០០គីឡូក្រាមត្រូវបាសមត្ថកិច្ចបង្ក្រាបបានបន្ទាប់ពីបានដឹកចេញពីខេត្តស្ទឹងត្រែងឆ្ពោះទៅភ្នំពេញ៕
