TikTok ណែនាំមុខងារត្រួតពិនិត្យសុវត្ថិភាព និងកម្មវិធីសុវត្ថិភាពគ្រួសារ ឬ Family Pairing ដែលអនុញ្ញាតឱ្យឪពុកម្តាយកំណត់ព្រំដែន និងគាំទ្រកូនៗជាក្មេងជំទង់ក្នុងការអភិវឌ្ឍទម្លាប់ឌីជីថលដែលមានសុខភាពល្អជាងមុន។ រូបថត ហុង រស្មី
ភ្នំពេញ៖ TikTok បានចាប់ផ្តើមមុខងារថ្មីមួយ ដើម្បីបង្កើតកន្លែងសុវត្ថិភាពសម្រាប់អ្នកប្រើប្រាស់ រួមទាំងអ្នកនិយមបណ្ដាញសង្គមដោយលើវីដេអូខ្លីៗនៅកម្ពុជាផងដែរ។
មុខងារត្រួតពិនិត្យសុវត្ថិភាពគឺជាឧបករណ៍ដែលត្រូវបានរចនាឡើងដើម្បីជួយអ្នកប្រើប្រាស់ឱ្យមានសុវត្ថិភាពក្នុងគណនីរបស់ពួកគេកាន់តែប្រសើរឡើង និងធានាសុវត្ថិភាពនៅពេលចូលប្លេតហ្វមនេះ។
មុខងារនេះអនុញ្ញាតឱ្យអ្នកប្រើប្រាស់ពិនិត្យមើល និងធ្វើបច្ចុប្បន្នភាពការកំណត់សុវត្ថិភាពដោយគ្រាន់តែអនុវត្ដវិធីសាមញ្ញមួយចំនួនប៉ុណ្ណោះ។
យោងតាម TikTok បានឱ្យដឹងថា៖ «ការត្រួតពិនិត្យសុវត្ថិភាពណែនាំអ្នកប្រើប្រាស់តាមរយៈវិធានការសុវត្ថិភាពសំខាន់ៗ ដូចជា ការភ្ជាប់លេខទូរស័ព្ទ និងអ៊ីមែលសម្រាប់ជម្រើសបម្រុងទុក បើកការផ្ទៀងផ្ទាត់ពីរជំហាន ក៏ដូចជាឧបករណ៍ត្រួតពិនិត្យដែលបានចូលទៅក្នុងគណនីរបស់ពួកគេ»។
ប្រភពដដែលបានបន្ដថា៖ «វាក៏ជូនដំណឹងដល់អ្នកប្រើផងដែរអំពីសកម្មភាពមិនប្រក្រតី និងណែនាំការផ្ទៀងផ្ទាត់លេខសម្ងាត់ ដែលផ្តល់នូវបទពិសោធន៍ចូលគណនីដោយមិនប្រើលេខសម្ងាត់ដ៏មានសុវត្ថិភាពជាងមុន»។
អ្នកស្រី KahnJi Siriprapa Weerachaising អ្នកគ្រប់គ្រងផ្នែកផ្សព្វផ្សាយ និងដៃគូនៅ TikTok បានឱ្យដឹងថា អ្នកប្រើប្រាស់ TikTok នៅកម្ពុជាអាចចូលប្រើមុខងារពិនិត្យសុវត្ថិភាពបានយ៉ាងងាយស្រួល ដោយចូលទៅកាន់ «Settings» និង «Privacy» ក្នុងកម្មវិធី ហើយជ្រើសរើស «Security & Permissions»។
អ្នកស្រី Weerachaising បានកត់សម្គាល់ថា TikTok បន្តវិនិយោគលើការការពារឯកជនភាព និងផ្តល់ធនធានអប់រំដើម្បីជួយអ្នកប្រើប្រាស់រក្សាសុវត្ថិភាពតាមអ៊ីនធឺណិត។
ទន្ទឹមនឹងនេះ TikTok បានណែនាំកម្មវិធីសុវត្ថិភាពគ្រួសារ ឬ Family Pairing ដែលអនុញ្ញាតឱ្យឪពុកម្តាយកំណត់ព្រំដែន និងគាំទ្រកូនៗជាក្មេងជំទង់ក្នុងការអភិវឌ្ឍទម្លាប់ឌីជីថលដែលមានសុខភាពល្អជាងមុន។
ឧបករណ៍ថ្មី រួមមាន មុខងារ Time Away ដែលអនុញ្ញាតឱ្យឪពុកម្តាយកំណត់បញ្ចប់ដំណើរ TikTok និងបង្កើនលទ្ធភាពមើលឃើញការលេងអ៊ីនធឺណិតរបស់ក្មេងជំទង់ រួមទាំងអ្នកដែលតាមដាន (follow) និងបិទខ្ទប់ (block) ពួកគេផងដែរ។
លើសពីនេះ ឪពុកម្តាយអាចត្រូវបានជូនដំណឹងនៅពេលដែលកូនៗជាក្មេងជំទង់របស់ពួកគេរាយការណ៍អំពីមាតិកាណាមួយ។
យោងតាម TikTok បានឱ្យដឹងថា៖ «សម្រាប់អ្នកប្រើប្រាស់វ័យក្មេងដែលមានអាយុក្រោម ១៦ ឆ្នាំ TikTok កំពុងដាក់ឱ្យដំណើរការនូវមុខងារបន្ថយល្បឿន (wind-down) ដែលលើកទឹកចិត្តបង្កើតទម្លាប់មើលអេក្រង់មានសុខភាពល្អជាងមុន ជាមួយការរំខានក្នុងការចុចដាច់យប់ជាមួយនឹងតន្ត្រីស្ងប់ស្ងាត់ និងសមាធិ»។
ការធ្វើបច្ចុប្បន្នភាពទាំងនេះ សំដៅលើកកម្ពស់សុខុមាលភាពឌីជីថល ក៏ផ្តល់ឱ្យក្រុមគ្រួសារក្នុងប្រទេសកម្ពុជានូវការគ្រប់គ្រង និងភាពបត់បែនបន្ថែមទៀតក្នុងការគ្រប់គ្រងពេលវេលាមើលទូរស័ព្ទផងដែរ។
កាលពីពាក់កណ្ដាលខែមីនានេះ TikTok បានអនុញ្ញាតឱ្យអ្នកបង្កើតមាតិកានៅកម្ពុជាធ្វើការរកប្រាក់ពីប្លេតហ្វមរបស់ខ្លួន។
នេះបើតាមការប្រកាសនៅក្នុងសិក្ខាសាលាបណ្ដុះបណ្ដាលសុវត្ថិភាពដែលរៀបចំនៅរាជធានីភ្នំពេញកាលពីថ្ងៃទី១៩ ខែមីនា ឆ្នាំ២០២៥។
ព្រឹត្តិការណ៍នេះត្រូវបានរៀបចំឡើងដោយ TikTok សហការជាមួយក្រសួងប្រៃសណីយ៍ និងទូរគមនាគមន៍របស់កម្ពុជា ដោយបានប្រមូលផ្តុំអ្នកបង្កើតមាតិកា អ្នកសារព័ត៌មាន និងអ្នកតំណាងរដ្ឋាភិបាល ដើម្បីពិភាក្សាអំពីសុវត្ថិភាពអនឡាញ និងគោលការណ៍ណែនាំសហគមន៍របស់ TikTok។
ជាមួយនឹងអ្នកប្រើប្រាស់ TikTok សកម្មជាង ១០ លាននាក់នៅក្នុងប្រទេសកម្ពុជា ការពង្រីកការរកប្រាក់ផ្តល់នូវឱកាសសម្រាប់អ្នកបង្កើតមាតិកាក្នុងស្រុកដើម្បីបង្វែរចំណង់ចំណូលចិត្តរបស់ពួកគេសម្រាប់ការបង្កើតមាតិកាទៅជាប្រភពចំណូល។
វត្តមានរបស់ TikTok នៅកម្ពុជាកំពុងរីកចម្រើនយ៉ាងឆាប់រហ័ស ជាផ្នែកមួយនៃនិន្នាការទូលំទូលាយ ដែលប្លេតហ្វមប្រព័ន្ធផ្សព្វផ្សាយសង្គមត្រូវបានមើលឃើញកាន់តែខ្លាំងឡើងថាជាមធ្យោបាយដ៏សំខាន់សម្រាប់ការបង្កើតមាតិកា ពាណិជ្ជកម្ម និងការកសាងម៉ាកយីហោផ្ទាល់ខ្លួន។
លោក ទេព អស្នារិទ្ធ អ្នកនាំពាក្យក្រសួងព័ត៌មាន បានក្រើនរំឭកអ្នកបង្កើតមាតិកាឱ្យប្រកាន់ខ្ជាប់នូវក្រមសីលធម៌ បង្កើតខ្លឹមសារផ្អែកលើការពិត និងរួមចំណែករក្សាសណ្តាប់ធ្នាប់សង្គម។
លោកបានជំរុញឱ្យអ្នកបង្កើតមាតិកាឱ្យមានការទទួលខុសត្រូវក្នុងសកម្មភាពអនឡាញរបស់ពួកគេ និងធានាថា មាតិការបស់ពួកគេផ្តល់អត្ថប្រយោជន៍ដល់សង្គម និងរក្សាភាពសុចរិតនៃកន្លែងសាធារណៈ៕
