លោក ថោ ជេដ្ឋា រដ្ឋមន្ដ្រីក្រសួងធនធាន និងឧតុនិយម និងលោក ពុយ គា ប្រធានក្លិបអ្នកកាសែតកម្ពុជា បានថ្លែងក្នុងសន្និសីទសារព័ត៌មានក្រោមប្រធានបទ «ការគ្រប់គ្រងសក្ដានុពលទឹក និងស្ថានភាពប្រព័ន្ធធារាសាស្ត្រកម្ពុជា« នៅទីស្តីការក្រសួងកាលពីថ្ងៃទី១ ខែមីនា។ រូបថត ហុង រស្មី
ភ្នំពេញ៖ ទោះបីជាប្រទេសកម្ពុជាមានធនធានទឹកដ៏ច្រើនសន្ធឹកសន្ធាប់ រួមទាំងបឹងទន្លេសាប និងប្រព័ន្ធទន្លេសំខាន់ៗក៏ដោយ ក៏ដំណាំកសិកម្មនៅតែបន្តប្រឈមនឹងការខ្វះខាតទឹក ដោយសារហេដ្ឋារចនាសម្ព័ន្ធប្រព័ន្ធធារាសាស្ត្រមិនគ្រប់គ្រាន់ និងតម្រូវការកើនឡើង។
លោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានលើកឡើងពីគម្លាតដ៏លំបាកមួយ គឺប្រព័ន្ធធារាសាស្ត្ររបស់ប្រទេសនេះអាចគ្របដណ្តប់បានតែពាក់កណ្តាលនៃផ្ទៃដីកសិកម្មរបស់ខ្លួន។
លោក ជេដ្ឋា បានថ្លែងក្នុងសន្និសីទសារព័ត៌មានក្រោមប្រធានបទ «ការគ្រប់គ្រងសក្ដានុពលទឹក និងស្ថានភាពប្រព័ន្ធធារាសាស្ត្រកម្ពុជា« នៅទីស្តីការក្រសួងកាលពីថ្ងៃទី១ ខែមីនា ថា៖ «នៅលើផ្ទៃដីកសិកម្មប្រមាណ ៤លានហិកតា ប្រព័ន្ធធារាសាស្ដ្ររបស់ក្រសួងធនធានទឹក អាចផ្គត់ផ្គង់ត្រឹមតែពាក់កណ្ដាល គឺត្រឹមតែ ២លានហិកតាប៉ុណ្ណោះ»។
លោកបានអះអាងថា៖ «ពីមួយឆ្នាំទៅមួយឆ្នាំ ក្រសួងពង្រីកផ្ទៃដីស្រោចស្របប្រមាណ ៣ម៉ឺនហិកតា ហើយនៅឆ្នាំ២០២៧ ក្រសួងទំនងជាត្រូវបង្កើនសមត្ថភាពលើសពីបរិមាណនេះទៀត»។
ប្រព័ន្ធធារាសាស្ត្រ ស្ទឹងស្រែងជំហាន១ ក្នុងភូមិសាស្ត្រ ស្រុកចុងកាល់ ខេត្តឧត្តរមានជ័យ។ រូបថត សហការី
លោកបាននិយាយថា ក្រៅពីការប្រើប្រាស់ទឹកស្រោចស្របដំណាំកសិកម្ម ផ្នែកឧស្សាហកម្ម ដូចជា រោងចក្រក៏ត្រូវការប្រើប្រាស់ទឹកជាច្រើនផងដែរ។
ជាក់ស្ដែង លោកបានលើកឧទាហករណ៍ថា រោងចក្រមួយត្រូវការទឹកមួយម៉ឺនម៉ែត្រគូបក្នុងមួយឆ្នាំ ចុះមួយពាន់រោងចក្រ?
គិតមកដល់បច្ចុប្បន្ននេះ ប្រព័ន្ធធារាសាស្ត្រមានចំនួន ២៣៥២ ប្រព័ន្ធ ក្នុងនេះប្រព័ន្ធធារាសាស្ត្រខ្នាតធំចំនួន ៥៦ ប្រព័ន្ធ ធារាសាស្ត្រខ្នាតមធ្យមចំនួន ១១៦៦ និងប្រព័ន្ធធារាសាស្ត្រតូចចំនួន ១១២២ និងអាងទឹកចំនួនខ្នាតធំចំនួន ៨ ដែលអាងនីមួយៗមានទំហំចាប់ពី ២៥លានម៉ែត្រគូប រហូតដល់ ៣០០លានម៉ែត្រគូប។
បច្ចុប្បន្ន ប្រព័ន្ធធារាស្ត្រមានចំនួន ២៣៥២ ដូចជា ធំចំនួន ៥៦ ខ្នាតមធ្យមចំនួន ១១៦៦ និងខ្នាតតូចចំនួន ១១២២ ហើយអាងទឹកខ្នាតធំចំនួន ៨ និងប្រឡាយប្រវែងប្រហែល ៧ម៉ឺនគីឡូម៉ែត្រ។
លោកបានថ្លែងថា៖ «ការកសាងអាងទឹក និងប្រព័ន្ធធារាស្ដ្រ គឺសម្រាប់ប្រើប្រាស់នៅរដូវប្រាំងប្រមាណ ៤០០០ លានម៉ែត្រគូបដោយមិនរាប់បញ្ចូលទន្លេធំ និងបឹងទន្លេសាប ហើយរដូវវស្សា យើងមានទឹកគ្រប់គ្រាន់នៅគ្រប់ទីកន្លែង»។
គម្រោងអភិវឌ្ឍន៍អាងទឹកដងកាំបិត ក្នុងខេត្តកំពង់ធំ។ រូបថត សហការី
យ៉ាងណាមិញ សម្រាប់រដូវប្រាំងឆ្នាំ២០២៥ នេះ ប្រជាកសិករធ្វើស្រែជាង ៩០ម៉ឺនហិកតា ដែលលើសការផ្គត់ផ្គង់ទឹករបស់ក្រសួងដែលមានសមត្ថភាពត្រឹមតែជិត ៦០ម៉ឺនហិកតា។
លោករដ្ឋមន្ដ្រីក្រសួងធនធានទឹក និងឧតុនិយម បានថ្លែងថា៖ «គិតត្រឹមឆ្នាំ២០២៤ ក្រសួងធនធានទឹក និងឧតុនិយមបានបង្កើនលទ្ធភាពស្រោចស្រពលើផ្ទៃដីចំនួន ១ ៩៦៩ ៨៤៣ ហិកតា ក្នុងនោះស្រូវរដូវវស្សា ១ ៣៨៧ ០៥១ហិកតា និងស្រូវរដូវប្រាំង ៥៨២ ៧៩២ហិកតា»។
ជាលើកដំបូង អាងទឹកនៅតំបន់ខ្ពង់រាបនៃភាគឦសានក្នុងខេត្ដមណ្ឌលគិរីត្រូវបានដាក់ឱ្យដំណើរការចំនួន ៣ សម្រាប់ផ្គត់ផ្គង់ទាំងដំណាំកសិកម្ម និងជាប្រភពទឹកស្អាត។
ការកសាងប្រឡាយទឹកជាង ២៦០គីឡូម៉ែត្រដើម្បីរំដោះទឹកចេញពីរាជធានីភ្នំពេញ វាក៏បានក្លាយជាប្រភពទឹកសម្រាប់ស្រោចស្របដំណាំកសិកម្ម ក៏ដូចជាឧស្សាហកម្ម។
ក្នុងរយៈពេល ៥ឆ្នាំទៅ ១០ឆ្នាំខាងមុខ កម្ពុជាអាចត្រូវការស្តុកទឹកពី ១៥០០លាន ទៅ ២០០០ លានម៉ែត្រគូបបន្ថែមទៀតដើម្បីបម្រើទាំងកសិកម្ម និងទឹកស្អាត។
លោក ជេដ្ឋា បានឱ្យដឹងថា៖ «ការពឹងផ្អែករបស់កម្ពុជាលើការនាំចេញអង្ករធ្វើឱ្យស្ថានការណ៍ត្រូវការទឹកកាន់តែច្រើន។ ក្នុងនាមជាប្រទេសនាំចេញអង្ករដ៏សំខាន់មួយ តម្រូវការទឹកនៅតែបន្តកើនឡើង ដោយដាក់សម្ពាធលើធនធានដែលមានភាពតានតឹងរួចហើយ»៕
