ទិដ្ឋភាពប្រព័ន្ធព្យាករឧតុនិយម (រ៉ាដា) តែមួយគត់នៅរាជធានីភ្នំពេញក្នុងបរិវេណក្រសួងធនធានទឹក និងឧតុនិយម។ រូបថត ភ្នំពេញប៉ុស្ដិ៍
ភ្នំពេញ៖ បច្ចុប្បន្ននេះ កម្ពុជាមានប្រព័ន្ធព្យាករឧតុនិយម (រ៉ាដា) តែមួយគត់នៅរាជធានីភ្នំពេញក្នុងបរិវេណក្រសួងធនធានទឹក និងឧតុនិយម ដែលធ្វើការព្យាករអាកាសធាតុ កម្ពស់ទឹក និងបាតុភូមិផ្សេងៗ ដោយគួបជាមួយស្ថានីយឧតុនិយមតូចៗទាំងស្វ័យប្រវត្ដិ និងមិនទាន់ស្វ័យប្រវត្ដិជាង ៣៨០ស្ថានីយទៀត។
សមត្ថភាពនៃការព្យាករទឹកភ្លៀង និងអាកាសធាតុ ត្រូវបានប្រជាពលរដ្ឋមើលឃើញពីភាពប្រសើរឡើង ដែលប្រជាកសិករ និងពលរដ្ឋទូទៅអាចទុកចិត្ដបាន។
លោក ថោ ជេដ្ឋា រដ្ឋមន្ដ្រីក្រសួងធនធានទឹក និងឧតុនិយម បានថ្លែងក្នុងវេទិកាសារព័ត៌មាន ស្តីពី «ការគ្រប់គ្រងសក្តានុពលទឹក និងស្ថានភាពប្រព័ន្ធធារាសាស្ត្រកម្ពុជា» ក្រសួងធនធានទឹកនិងឧតុនិយម ថ្ងៃទី១ ខែមីនា ថា៖ «យើងមានប្រព័ន្ធរ៉ាដា (តេជោ សែន) ធំនៅរាជធានីភ្នំពេញ និងស្ថានីយឧតុនិយមតាមបណ្ដាខេត្ដ»។
លោកបានបន្ដថា ការព្យាករនេះបានផ្ដល់សុក្រឹតភាពគួរជាទុកចិត្ដដល់ប្រជាពលរដ្ឋអំពីស្ថានភាពរដូវប្រាំង និងរដូវវស្សា ពេលណាមានភ្លៀវ និងកម្ពស់ទឹកភ្លៀងកម្រិតណាជាដើម។
ការពង្រឹង និងធ្វើទំនើបកម្មលើប្រព័ន្ធផ្តល់ និងព្យាករសេវាជលសាស្ត្រ និងឧតុនិយម ក៏ដូចជាប្រព័ន្ធផ្តល់ដំណឹងជាមុន (Early Warning System) ដល់សាធារៈណជន និងស្ថាប័នពាក់ព័ន្ធឱ្យបានទាន់ពេលវេលា។
លោក ថោ ជេដ្ឋា រដ្ឋមន្ដ្រីក្រសួងធនធាន និងឧតុនិយម និងលោក ពុយ គា ប្រធានក្លិបអ្នកកាសែតកម្ពុជា បានថ្លែងក្នុងសន្និសីទសារព័ត៌មានក្រោមប្រធានបទ «ការគ្រប់គ្រងសក្ដានុពលទឹក និងស្ថានភាពប្រព័ន្ធធារាសាស្ត្រកម្ពុជា« នៅទីស្តីការក្រសួងកាលពីថ្ងៃទី១ ខែមីនា។ រូបថត ហុង រស្មី
វាបានគាំទ្រដល់អន្តរវិស័យ រួមមាន វិស័យកសិកម្ម ឧស្សាហ កម្ម សំណង់ អាកាសចរណ៍ស៊ីវិល ទេសចរណ៍ និងនាវាចរណ៍ ក៏ដូចជា ជួយកាត់បន្ថយផលប៉ះពាល់ដោយគ្រោះធម្មជាតិផ្សេងៗ ដូចជា គ្រោះទឹកជំនន់ គ្រោះរាំងស្ងួត ខ្យល់ព្យុះ ការប្រែប្រួលអាកាសធាតុ។
យ៉ាងណាមិញ ដើម្បីសុក្រឹតភាពនៃការព្យាករកាន់តែជាក់ច្បាស់ លោករដ្ឋមន្ដ្រីក្រសួងធនធានទឹក និងឧតុនិយម បានលើកឡើងថា យ៉ាងតិច កម្ពុជាត្រូវការប្រព័ន្ធរ៉ាដាចំនួន ៣ គ្រឿង។
លោក ជេដ្ឋា បានថ្លែងថា៖ «យើងបានសិក្សារួចហើយថា នៅទូទាំងប្រទេស យើងគួរតែមានប្រព័ន្ធរ៉ាដាព្យាករយ៉ាងហោចណាស់ មាន ៣។ ចំណែកឯស្ថានីយតូចៗ ៣៨០ នោះ ត្រូវបន្ថែមដល់ជាង ១ពាន់ផងដែរ»។
លោកបានបញ្ជាក់ថា នៅក្នុងអាណត្ដិរាជរដ្ឋាភិបាលនេះ កម្ពុជានឹងពង្រឹង និងពង្រីកបន្ថែមនូវប្រព័ន្ធរ៉ាដា រួមទាំងស្ថានីយតាមបណ្ដាខេត្ដ។
កន្លងមក ក្រសួងធនធានទឹក និងឧតុនិយម ធ្វើការព្យាករអាកាសធាតុ កម្ពស់ទឹករៀងរាល់មួយសប្ដាហ៍ម្ដង តែបច្ចុប្បន្ននេះ ក្រសួងបង្ហាញលទ្ធផលនៃការព្យាកររៀងរាល់ថ្ងៃ ដែលជាភាពងាយស្រួលក្នុងការទទួលព័ត៌មានទាំងនេះសម្រាប់ប្រជាពលរដ្ឋ។
លោកបន្ដថា ប្រជាកសិករត្រូវការចាំបាច់ណាស់នូវការព្យាករមួយដ៏ត្រឹមត្រូវ ដោយអំឡុងពេលមួយសប្ដាហ៍ខាងមុខមានភ្លៀង ពួកគេអាចធ្វើការដាំដុះដំណាំរបស់ពួកគេ យោងតាមការព្យាករ ហើយលោកស្នើឱ្យប្រជាពលរដ្ឋប្រើប្រាស់ (MOWRAM Weather App) ដែលត្រូវបានធ្វើបច្ចុប្បន្នភាពរៀងរាល់ព្រឹក៕
