ពលរដ្ឋមកទទួលសេវាពិនិត្យព្យាបាលជំងឺនៅមន្ទីរពេទ្យរុស្ស៊ី នៅកន្លែងប្រើប័ណ្ណ ប.ស.ស. នៅខែកុម្ភៈ ២០២៥។ យូសុះ អាប់ឌុលរ៉ាស់ហ៊ីម
ករណីជំងឺមិនឆ្លងសុទ្ធតែមាននិន្នាការកើនឡើង ដោយក្នុងនោះករណីថ្មីជំងឺទឹកនោមផ្អែមជាង ២៣ម៉ឺនករណី កើនឡើងជាង ៥៩ភាគរយ ចំណែកអ្នកជំងឺមហារីកបានទទួលការព្យាបាលនៅមន្ទីរពេទ្យ មានចំនួនជាង ៣ម៉ឺននាក់ ក្នុងឆ្នាំ២០២៤។
បើតាមក្រសួងសុខាភិបាល នៅឆ្នាំ២០២៤ ករណីជំងឺទឹកនោមផ្អែមមានចំនួន ២៣ ០២៧៩ករណី ដែលក្នុងនោះមានអ្នកសម្រាកពេទ្យមានចំនួន ១ម៉ឺន៧ពាន់នាក់ (១៧ ៥៣៤) កើនឡើង ៤៣,២៥ភាគរយ ធៀបនឹងឆ្នាំ២០២៣។
ចំណែកករណីជំងឺមហារីកមានអ្នកជំងឺ ៣១ ៥១៨នាក់ កើនឡើង ៨៧,៤២ភាគរយ ហើយមានអ្នកស្លាប់ ១២៧នាក់។ ករណីមហារីកច្រើនជាងគេគឺមហារីកដោះ ដែលមាន២០,៤ភាគរយ និងមហារីកមាត់ស្បូន ជាង ១១ភាគរយ។
ករណីពិនិត្យជំងឺផ្លូវចិត្តមានចំនួនជាង ២៨ម៉ឺនករណី (២៨ ២៦១៥) កើនឡើងជិត២ដង (១៩៧,៨២ភាគរយ) ដែលមានអ្នកជំងឺសម្រាកព្យាបាលមានចំនួន ៨៧៩២នាក់ កើនឡើង ២៨,៥២ភាគរយ។
ក្រៅពីនេះជំងឺមិនឆ្លងផ្សេងទៀតក៏មានការកើនឡើងដែរ ដូចជា ជំងឺឡើងសម្ពាធឈាមដែលមានជាង៤០ម៉ឺនករណី (៤០១៩៣៦) កើនឡើង២១,៤៤ភាគរយ និងមានអ្នកជំងឺសម្រាកព្យាបាលចំនួនជាង ៣ម៉ឺននាក់ (៣៤៧៩២) កើនឡើង ២៩,៥៣ភាគរយ។
លោក ឈាង រ៉ាង រដ្ឋមន្ត្រីក្រសួងសុខាភិបាលបានថ្លែងក្នុងសន្និសីទសារព័ត៌មាននៅរសៀលថ្ងៃទី៣ ខែមីនានេះថា ការកើនឡើងនៃតួលេខមកទទួលសេវាព្យាបាលជំងឺមិនឆ្លងដោយសារតែប្រជាពលរដ្ឋយល់ដឹងកាន់តែច្រើនលើជំងឺទាំងនេះ សេដ្ឋកិច្ចរបស់ពលរដ្ឋកើនឡើង ហើយភាពជឿជាក់លើការផ្ដល់សេវារបស់រដ្ឋក៏កើនឡើង។
លោកថ្លែងថា៖ «ជំងឺមិនឆ្លងកើតឡើងនៅពេលជីវភាពរបស់ប្រជាពលរដ្ឋកាន់តែកើនឡើង ហើយជួបនៅគ្រប់ប្រទេសដែលមានការអភិវឌ្ឍបែបនេះ។ ដូច្នេះការកើនឡើងនៃជំងឺមិនឆ្លងគឺជាជំងឺរ៉ាំរ៉ៃ ដែលទាមទារឲ្យការបម្រើសេវាជំងឺនេះកាន់តែមានកម្រិតលម្អិតខ្ពស់ ហើយកាន់តែស្មុគស្មាញទៅ»។
លោកវេជ្ជបណ្ឌិត នុត សម្បត្តិ ប្រធានវិទ្យាស្ថានវេជ្ជសាស្ត្រ ជីវសាស្ត្រ និងកសិកម្ម នៃរាជបណ្ឌិតសភាកម្ពុជា ថ្លែងថា ជំងឺមិនឆ្លងកំពុងតែកើនឡើងនៅលើពិភពលោក ដោយសារតែការរីកចម្រើនផ្នែកឧស្សាហកម្ម។
ភាពរីកចម្រើននៃឧស្សាហកម្ម ធ្វើឲ្យមនុស្សមិនសូវបញ្ចេញពលកម្ម ការបរិភោគអាហាររហ័ស (fast food) និងការប្រើភេសជ្ជផ្អែម។
ស្របពេលជាមួយគ្នានេះ ការរីកចម្រើននៃវិទ្យាសាស្ត្រក៏ធ្វើឲ្យបញ្ហាផ្លូវចិត្តរបស់មនុស្សកាន់តែកើនឡើងផងដែរ ជាពិសេសក្នុងពេលមានបញ្ហាសេដ្ឋកិច្ច ដូចជាកង្វះលុយកាក់ជាដើម ដែលធ្វើឲ្យជំងឺមិនឆ្លងកើនឡើង៕
