រូបប្រាក់ដុល្លារ ១០០ដុល្លារ និង ២០ដុល្លារ ដែលជនជាតិចិនម្នាក់បានថតនៅអាកាសយានដ្ឋានអន្តរជាតិភ្នំពេញ។ GDI
អគ្គនាយកដ្ឋានអន្តោប្រវេសន៍បដិសេធការផ្សព្វផ្សាយតាមបណ្ដាញសង្គមរបស់ជនជាតិចិនម្នាក់ដែលថា ទិដ្ឋាការចូលមកកម្ពុជាមានតម្លៃ ១០០ដុល្លារ ហើយខ្លួនត្រូវបង់កម្រៃក្រៅផ្លូវការ២០ដុល្លារទៀត ដែលជាការបង្ខូចកិត្តិយសកម្ពុជា។
អគ្គនាយកដ្ឋានបានឲ្យដឹងថា នៅថ្ងៃទី១ ខែមីនា កន្លងទៅ អគ្គនាយកដ្ឋាន បានឃាត់ខ្លួនជនជាតិចិនម្នាក់ពាក់ព័ន្ធករណីថតរូបក្រដាសប្រាក់ ១០០ដុល្លារ ដោយអះអាងថាជាថ្លៃសម្រាប់ស្នើសុំទិដ្ឋាការចូលប្រទេសកម្ពុជាសម្រាប់ជនជាតិចិន។ ជនជាតិចិននេះ បានចូលមកប្រទេសកម្ពុជា តាមច្រកអាកាសយានដ្ឋានអន្តរជាតិភ្នំពេញ។
បន្ថែមពីលើនេះ ជនរូបនេះក៏បានថតរូបក្រដាសប្រាក់ ២០ដុល្លារ នៅបញ្ជរត្រួតពិនិត្យលើលិខិតឆ្លងដែនដើម្បីស្នើសុំបិទស្ទីកគ័រ ដោយអះអាងថា ជាថ្លៃសេវាបន្ថែមទៀត។
កាលពីខែធ្នូ ឆ្នាំ២០២៤ រាជរដ្ឋាភិបាលកម្ពុជាបានប្រកាសពីការទម្លាក់តម្លៃទិដ្ឋាការទេសចរណ៍ (e-Visa T) ដោយបញ្ចុះពីតម្លៃ ៣៦ដុល្លារមកនៅ ៣០ដុល្លារ ហើយតម្លៃទិដ្ឋាការធម្មតាត្រូវបានបញ្ចុះពី ៤២ដុល្លារមកនៅត្រឹម ៣៥ដុល្លារ។
អគ្គនាយកដ្ឋានបញ្ជាក់ដូច្នេះថា៖ «[សកម្មភាពបែបនេះ]ធ្វើឱ្យប៉ះពាល់ដល់ច្បាប់អន្តោប្រវេសន៍កម្ពុជា និងបានប៉ះពាល់ដល់កិត្តិយសមន្ត្រីនគរបាលអន្តោប្រវេសន៍ប្រចាំការនៅច្រកទ្វារអាកាសយានដ្ឋានអន្តរជាតិភ្នំពេញ ដែលមិនបានយកតម្លៃលើសពីការកំណត់របស់រាជរដ្ឋាភិបាលនោះឡើយ»។
អគ្គនាយកដ្ឋានបន្តថា មន្ត្រីនគរបាលអន្តោប្រវេសន៍ បានឃាត់ខ្លួនជនជាតិចិនរួបនេះមកសួរនាំ ជនជាតិចិននោះក៏បានសារភាពនូវរាល់កំហុសទាំងអស់ ពាក់ព័ន្ធនឹងតម្លៃមិនត្រឹមត្រូវនៃទិដ្ឋាការចូលប្រទេសកម្ពុជា។
អគ្គនាយកដ្ឋានអន្តោប្រវេសន៍បានស្នើធ្វើការបណ្ដេញជនជាតិចិនខាងលើពីប្រទេសកម្ពុជា និងមិនអនុញ្ញាតឱ្យធ្វើដំណើរចូលប្រទេសកម្ពុជា ទៅតាមកាលកំណត់របស់ច្បាប់៕
